سؤال لخبراء الرينو كليو

**دكتور محمود 33** · 08-03-2013 04:29 PM

انا لسة شارى رينو كليو اتوماتك موديل 2005 ناس كتير خوفتنى منها عشان اسعار قطع الغيار وكمان لو حبيت ابيعها تقبلة اوى فى بيعها .....كمان عايز حد يقدر تمنها هى : رينو كليو موديل 2005 كاملة اتوماتك فابريكة دواخل رشة بالخارج بالكامل معاعدا الشنطة واجزاء من الجانبين فرش الصالون فبريكة اوى عاملة 84 الف كيلو صيانة فى التوكيل لحد ال 50 الف كيلو ياريت حد يجاوبنى بجد

**muhmado_furp** · 08-03-2013 04:40 PM

معلش انا أسف علي السؤال بس مش تطفل صدقني
المفروض ان السؤال ده قبل ما تشتري مش بعد
طالما اشتريت سيبك من أي حاجه واستمتع بالعربية
وكل عربيه ليها مميزات وعيوب وبعدين الرينو بوجه عام ناعم جدا جدا جدا
وان شاء الله اي عربية مع الصيانه المستمره بتعيش وتعمر
والعربية النضيفه بتفرض نفسها عند البيع متقلقش
وسيبها علي الله

**دكتور محمود 33** · 08-03-2013 06:05 PM

العربية انا لسة مدفعتش بقيت فلوسها وكمان جاية من واحد معرفة ومش عايز يكون ضاحك عليا فيها بس ارجو الافادة وجزاكم اللة خيرا

**demonarundo** · 08-03-2013 06:08 PM

أنا شفتها فى الوسيط معروضة بـ 55 بس ده طبعا مبالغ فيه قوى قوى
اولا هى 1200 ولا 1400 , تقريبا تعمل من 45 الى 50 على حسب الحالة
(انا بشوف مو 2008 1400 سى سى بتتباع بـ 50 منوال )

**benmatar** · 09-03-2013 12:30 PM

مبروك عليك العربية
بصفة عامة ولأي عربية مستعملة مهم جدا الحالة والفحص المتأني والكشف الدقيق وبالأخص الهيكل والشاسيه يكون سليم جدا. أي حاجة بعد كده تتفك وتتركب وتتغير.
الكليو بصفة عامة عربية ممتازة على غير الفكر الشائع بين ناس كتير، وده عن تجربة.
قطع الغيار متوفرة وأسعارها كويسة ومحدش ينكر والمثال خير برهان، يعني بداية من الموتور كله بالفيتيس بالمشتملات استيراد بيعمل حوالي 3800ج.م وتركبه زي الزيرو. سيور وفلاتر عادية خالص واسعارها عادية تماما بداية من 15ج.م لفلتر الزيت وحتى 50ج.م للأصلي، والتيل 70-90ج.م تركي والأصلي زيادة شوية والفوانيس زيرو بكرتونتها -185-220ج.م والرفرف اللي بيقولو عليه غيبر ووحش وبيتكسر يعمل 180-200ج.م وتشتريه وتركبه في ساعة زمن، ولو عربية تانية رفرفها صاج واتخبط مش هيتكسر صحيح بس سمكرة ودوكو وفرن في يومين وهيكلفك أكتر (بس احنا اللي عندنا أفكار تقليدية شويتين)
من ناحية توفير البنزين زي الفل وبالذات الموتور1.2 16صباب. والجري والثبات تمام جدا.
بس لازم أنصحك بمداومة الصيانة عند فني متخصص رينو (مش توكيل) بس ورشة متخصصة ومنهم موجود كتير. وكمان الفيتيس الأوتوماتيك مش بيكون قد كده مش عشان فيه عيوب وإنما عشان أغلب الناس بتهمل تغيير الزيت الأصلي بتاعه بشكل دوري، وده سبب مشاكل الفيتيس فيها وفي غيرها من العربيات الأوروبي زي البيجو وسكودا والرينو. طبعا المانيوال أقل أعطال وأقوى تحمل من الأوتو.
إنما بصفة عامة العربية كويسة واقتصادية

**ffff** · 27-03-2013 02:13 AM

فعلا تعملها حوالى 45 بالكتير أنا بايع موديل 2002 ب32 ألف من حوالى سنة ونص ....عربية حمالة أسية ومش هاركب زيها ترمى الفيرنا واللانوس على جمب كفاية إنها أوربى قطع غيارها متوفرة ورخيصة جدا وانا أعرف أماكن بيعها بالتفاصيل ومراكز الخدمة لو إحتجتها قولى وربنا يباركلك فيها