الموضوع: هركب جنوط وشكرا لخالد اسطى المتخصصون

المشاركة الأصلية كتبت بواسطة mhf_77

بص حضرتك وركز معايا
الابعاد اللى حضرتك حطيتها دى الاول (14) ده قطر الجنط وهتلاقىه مع رقمين كمان مكتوبين على الكاوتش مثلا 14-65/185 مثلا او 15-60/195 مثلا او 16-55/205 مثلا او 17-45/215 وهكذا
دول بيانات الكاوتش وابعاده اللى هيركبو عندك والرقم الاول (14/15/16/17......) رقم قطر الجنط وكل مايزيد كل مبياخد من نصيب الكاوتش لان المفروض ان القطر النهائى للفرده( الجنط + الكاوتش مجتمعين) لازم يكونو رقم ثابت يعنى هتزود فى قطر الجنط هتقلل من نصيب الكاوتش
والرقم الثانى (185/195/205/215.....) رقم عرض مداس الكاوتش على الارض كل مايزيد كل ما يدى ثبات والعكس
والرقم الثالث ( 65/60/55/45......) دا نسبه مئويه لحجم ارتفاع جوانب الكاوتش و كل مايزيد كل ما يريح العفشه والعكس
وشركات العربيات بتديك كذا اختيار لعربيتك ارقام مختلفه بس مجموعهم مع بعض يساوى نفس النتيجه يعنى ينزلك عربيتك بمقاس مثلا 15-65/195
ويكتبلك على القايم ليك اختيارين كمان غير دول متطلعش عنهم 16-55/205 او 17-45/215 مثلا
عشان الحسبه اجمالى تبقى بنتيجه واحده عشان اى تغيير فى الارقام دى يديك غلط فى قراية العدادات بتاعة السرعه والكيلوات ويأثر فى ارتفاع العربيه عن الارض يعنى هتلخبط كل حاجه
ده بالنسبه للرقم الاول اللى حضرتك حطيتو ال (14)
اما الرقم التانى (4*100) ده اسمه bolt pattern
وبيكون كمان معاه فى بطن الجنط رقمين كمان واحد اسمه center bore
والتانى اسمه offset وبيختصروه ساعات ل et
ال 100*4 ده متقلقش منه لان تقريبا كل جنوط مصر الاربع مسامير هتركب عندك لانه خاص بكام مسمار وابعادهم ولو العربيه خمس مسامير هتلاقى رقم مختلف مثلا 5*114 مثلا مش ده المهم
الرقم التانى center bore ده قطر سرة الجنط اللى بيركب على قطر سرة الطنابير -اللى هتركبلها رنجات لو قطر الجنط اكبر من الطنبوره او هتمسح الجنط لو قطر الجنط اصغر
اما الثالث offset اوet ده بعد الجنط او قربه من محور ارتكازه او نسبة دخوله او خروجه لجسم العربيه يعنى داخل تحت الرفرف وهيحك معاك ( وهتركبله فلانشات عشان تنطره بره )
ولا خارج بره الرفرف وهيبوظلك العفشه وليك تقلل او تزود 5 مم عن المقاس بتاعك
يعنى لو الاوفست بتاعك مثلا 40 ليك من 35/45
كل الارقام اللى كتبتها دى من اول ارقام الكاوتش لارقام الجنط المفروض ان الشركه كتباها دليل للمستهلك لسلامة وامان العربيه لكن صنايعية مصر بيعتبروها رفاهيه وان الخواجه اللى صنعها راجل فاضى فحب يملى وقت فراغه بكتابة اى ارقام عشان يحلل القرشين اللى خدهم فى تصنيعها
ياريت اكون قدرت اقرب ليك الصوره ومتكونش سرحت منى
واسف للاطاله

تسلم ياباشا كتر الف خيرك بس ياريتنى كنت استنيت شفت ردك دا
انا بالفعل ركبت الجنوط
وبكرة رايح اشترى كاوتش جديد بس هركبة نفس المقاس
بس هدور على حتة الاوفست والبار دى بكرة وانا بغير الكاوتش
هرفعلك صورة معذرة انا مش عارف اقولك ايه بجد بس انا نفسيتى فى الارض لسة حالا زجاج العربية الامامى مدشش