ماحدش يضحك.. ماشي؟

أصلي باحبها من زمان.. و متعلقة بيها اوي.. لما باشوفها ماشية في الشارع قلبي بيتخطف.. من ساعة ما حلمت انها تكون من نصيبي و لحد دلوقتي بتخطف عيني السيريون وهي ماشية.. من شهر 12 اللي فات و من ساعة ما قريت عنها هنا في المنتدى و شفت صورها ع النت و أيامها كنت بحاول أشوفها في الشارع و مش باشوف واحدة ماشية في الشارع إلا كل فيييييييييييين و فين.. و ساعتها عملت موضوع مخصوص اسمه هو ليه مافيش ولا سيريون في شوارع القاهرة؟

أيامها كنا بندخل انا و أعضاء معدودين نتكلم في السيريون.. و كنت كل ما أشوف سيريون في الشارع آجي في الموضوع و اعمل فرح ان هييييييييييه شفت سيريون في الشارع النهاردة

اما دلوقتي بسم الله ما شاء الله.. عدد مالكي السيريون بيزيد يوم عن التاني و بأه عادي اني أشوف ييجي 5 سيريون في المشوار الواحد.. بس برضه كل مرة شكلها بيخطف قلبي خطف

قلنا امنعوا الضحك

ايه بأه مناسبة قصيدة الغزل دي في السيريون؟ أصلي روحت المعرض النهاردة عشان اسأل على حاجة.. شفتها.. سيريون GLX حمرا.. لقيتني من غير ما أحس منجذبة لها و باركبها.. زي ما يكون مغناطيس بيشدني ليها.. حسيت ساعتها اني باحب البتاعة دي أوي

برضه مافيش فايدة.. سامعة صوت ضحك

راجعة من المشوار مبسوطة.. خصوصا اني قربت استلم خلاص.. انما في نفس الوقت داهمني احساس بالضيق.. ليه بأه؟ ثواني و راجعة اقول لكم حالا :)