الموضوع: التاكسى القديم سيتحول الى فيرنا فهل ستصمد هذه السيارة فى شوارع القاهرة؟؟

السلام عليكم ورحمة الله وبركاته

اللادا الروسى فقط

طبعا انا بقول ده لعدة اسباب هى :

1- الهيونداى المصرى كلها مشاكل وكفايه ان كل مالكى الفيرنا الزيرو بيشتكوا من ان العربيه بتحدف يمين وخفيفه وضيقه من الخلف وبتحك فى المطبات عند تحميلها ل3 اشخاص من الخلف ده غير مشاكل التصنيع والذهاب للتوكيل وانتوا عارفين الباقى
طبعا كل الحاجات الى ذكرتها اظن انها تكفى ان تخرجها تماما والى الابد من اعتقاد البعض انها تصلح كتاكسى فى المدن الكبيره والمكسره مثل القاهره والاسكندريه والزقازيق وغيرها وممكن ( مع الكثير من التحفظات ) ان تستخدم فى محافظات اخرى

2-الشاهين بقى زى الفل فى الملاكى وده ليه ! لان الملاكى مش هيحس بمشاكلها اقصد هنا مشاكل التقفيل المصرى تخيل حضرتك راكب عربيه الكاوتش والجنوط والطنابير وتيل الفرامل والفرش وحجات تانيه كتير مصرى
ده حضرتك اول توصيه من مهندسين الشركه انك اول متستلم العربيه تغير الكاوتش والجنوط علشان تحافظ على العفشه !!!
هى العربيه ممتازه للملاكى وهتعيش معاه لكن التاكسى حاجه تانيه

3- اللادا المصرى نفس عيوب الشاهين واكتر شويه نظرا لقله الخبره بالتوكيل عن توكيل الشاهين

4- اللادا الروسى هيه ديه الوحيده الى ممكن تبقى تاكسى ليه علشان الاتى :

1- قويه وتستحمل وصاجها جامد

2-قطع غيارها رخيصه جدا والاصلى كمان

3-سعرها زيرو 52 الف يعنى ارخص الموجود

4- موتورها ميكانيكته بسيطه وسهله جدا جدا

5-عملوا فيها تعديلات بحيث لا تتاثر بالحراره مثل الادا القديمه

6-الكاوتش من اغلى الانواع وتيوبلس

7- اوسع من الداخل من الشاهين والفيرنا

8- عفشتها بتاعت نصف نقل وعدلوا مشاكل البيض باللادا القديمه

9-اى حاجه تحصل فيها تصلحها بنفسك ومش محتاج لا توكيل ولا حتى ميكانيكى

10-التقفيل مش مصرى ( وديه اهم حاجه ) يعنى العربيه هتفضل مع السواق كام سنه على ما تبدأ مشاكلها

11- ممكن تركبلها شبكه وتحملها نصف طن ولا يهمك وشغاله


وحجات تانيه كتير ويعتبر شكلها القديم شويه هو مشكلتها فقط لكن التكنولوجيا القديمه ديه هيه الى تنفع شوارعنا وظروفنا ومستوى الدخل عندنا

واعتقد ان كلنا عارفين كويس قوى ان الكورى ورق والشاهين كمان بسبب ان صاجها تركى وحجات تانيه صينى على حبه مصرى يعنى كوكتيل وكله بيمشى فى مصر

لكن التاكسى عاوز عربيه جامده وتعيش ومش كوكتيل يعنى عربيه اصيله من بلادها علشان تشتغل وتوفر عليه فلوس ده فانوس الفيرنا ب 750 جنيه واللادا ب90 جنيه طبعا الفرق ده هيروح للسواق الى بيلف فى الشوارع المكسره وبيعمله 300كيلو متوسط يوميا

وشوف كمان باب الشاهين ولا الفيرنا ( الشاهين افضل ) هل تعتقد انه يستحمل فتح وغلق اكثر من 150مره يوميا طب وان استحمل شهر ايه الى هيحصل بعد كده انما الادا صاجها جامد جدا ومصممه للاستعمال الشاق وتستحمل كل ده وبالعكس بابها عاوز يتعامل بقوه علشان يقفل تمام !!

اكرر اللادا الروسى فقط

اللادا الروسى فقط

اللادا الروسى فقط

اللادا الروسى فقط

اللادا الروسى فقط


تحياتى وتقديرى

المشاركة الأصلية كتبت بواسطة MMamdouh

معنى كلامك هو حاجة واحدة فقط.. انت فهمتنى غلط

انا عمرى ما احتقرت انسان لانه فقير او غلبان و خلافة... انا احتقر الانسان الهمجى و اللى بيعتدى على حقوقى

و على فكرة انا لا اتولدت لقيت عربية باسمى ولا كان عندنا سواق... انا لحد وقت قريب كنت بركب مواصلات و احيانا بقديها مشى و العربية اللى اشتريتها جايبها مستعملة و فلوسها واخدها قرض من البنك... كلنا ولاد تسعة و اسال عنى اى حد فى المنتدى حتعرفنى كويس

المهم... نرجع للتكسجية...

لما ابقى ماشى فى الشارع و الاقى واحد عايز يخبط عربيتى و يبلطج و يقطع طريقى عشان يلف قبل منى او يدخل ملف من قدامى و يتسببلى فى حادث انا لوحدى اللى حتحمل تكلفتة يبقى اسف... لازم ابص عليه بالشكل دة... و انا لسة حاكى فى موضوع تانى عن التككسجى اللى لف شمال و قطع 3 حارات من قدامى عشان يلف من اليوترن و قبلها ب 3 اسابيع بتاع مكروباص لقى عربية راكنة فى مطلع اكتوبر راح محود يمين و دغدغ باب عربية والدى الافيو و اتكلفت 6 الاف جنية... يا راجل يا طيب دا مرة تاكسى وقف قدامى على كوبرى اكتور عشان واحد شاورلة.... تفتكر دة بنى ادم؟؟؟؟

و سهل اوى تلاقى تاكسى ماشى بسرعة 5 كيلو فى الساعة و كل زبون يشاورلة يقرب عليه و يقف... يسمع المشوار و ميعجبوش و يمشى تانى و يقف لواحد بعدة ب 3 متر و يسمع المشوار برضة و ميعجبوش برضة و يدخل على التالت و هكذا... كل دة و هو حاشرك ورا منة... طيب دة لو راجل بيدور على رزق و اكل عيالة ميرضاش يركب زباين بالشكل دة؟؟؟ و طبعا تبقى ليلة سودة لو مشيت قدام التاكسى و هو مركب زبون و انت ماشى بسرعة اقل من 190 كيلو لان الباشا معاه زبون و عايز يوصلة و الود ودة يطير من فوق الناس عشان يوصل بسرعة

دا احنا بنتكلم عن علاقة بينا و بين بعض على الطريق... تخيل بقى لما تركب مع تكسجى و تحس انه بيتقالط عليك عشان يقفلك و بعد ما تقولة على الحتة اللى عايز تروها يفكر شوية و لو معجبوش المشوار يحط اولانى و يمشى ولا اكنك كيس جوافة واقف... و لو ركبت معاه يقولك عايز 100 جنية فى مشوار ميساويش ربع جنية و ممكن ميرضاش يخش الشارع اللى تقولة عليه ولا اكنك بتشحت من اللى خلفوة

كل دة ان دل فهو يدل على عقلية السواق فى مصر و انا كنت وضحت ان مهنة السواق فى مصر لا تحتاج لاى مؤهل سوى نجاحك فى محاولة استخراج الرخصة المهنية و بالتالى اى عاطل يطلع رخصة يبقى سواق... دة ادى الى ظهور نوعية الشخصيات اللى بنشوفها فى الشوارع و سايقين العربيات الاجرة و المكروباصات

الفقر مش عيب... الجهل ممكن يتعالج... انما البلطجة و فتحة الصدر و العافية ملهاش دوا... و اللى الحاجات دى هى دستور حياتة و اللى معندوش مانع يدوس على الناس و يضرهم عشان مصلحتة يبقى ميستاهلش انه يبقى بنى ادم ولات يتعامل على انه بنى ادم

وصلت الفكرة؟؟

MMamdouh

بس كده تمام ,,, انت كده بتنتقد الحالة ما انتقدتش الفئة ,,, لان فعلا اللى انت بتقوله ده مشاكل موجودة وبنواجهها كل يوم ,,,, يعنى انا ياما ركبت مع سواقين تاكسيات بصراحة عشرة على عشرة ومحترمين جدا وفى ناس كان بيبقى هاين عليا لولا الحرمة انى اقلع اللى فى رجلى واضربه بيه لانه بيبقى من فئة الى انت بتقول عليهم دول

وعامة الخلاف ما يفسدش النقاش مادام باحترام وانا كل هدفى انى انبهك لحاجة لاحظتها فى كلامك مش اكتر وبرده انا مقتنع ان الحالة عامة بس اللى بيفرق بس ان اللى سايق ملاكى مش بيفضل يركن كل شوية عشان يركب حد ,,,, يعنى فعلا انا ساعات بركب مع ناس بيحسسنى انى راكب ميكروباص مش تاكسى كل اما يشوف حد يميل ويبصله لدرجة خلتنى اتخنقت وانا راكب تاكسى عشان اوصل شغلى بسرعة ,,, بس ما ينفعش انى اقول ان كله من العينة دى

وسلام مؤقت

اقولك برده يا اخ محمد على حاجة كده فى دماغى ,,, انا باعتقد ان قطاع التاكسى فى مصر الحكومة مصرة انها تسيبه كده ماشى بنظام البزرميط ,,, عشان الناس يفضلوا يعملوا مشاكل مع بعض ويلاقوا حاجة يتلهوا فيها وكمان عشان يبقى فى حاجة مميزة اللى هى تاكسى العاصمة وحاجة معفنة اللى هى التاكسى العادى ,,,, وانت عارف ان دى من مميزات بلدنا اللى بيتهيالى مش بتتكرر فى بلاد تانية ,,,, لان احنا بلد المميز والعادة


وربنا يرحمنا من اللى بنشوفه كل يوم يا اما بالهجرة يا اما باللى صعب اوى يحصل وهو انضباط الناس

المشاركة الأصلية كتبت بواسطة hazem_khidr

اللي بيسوق 124 و 1300 و العربيات القديمه دي بيبقي محترف و عارف هو بيعمل ايه
لما حيركب عربيه من الجداد مش حيخبط و لا الكلام الفاضي دا

لا حول و لاقوة الا بالله
هو حد قال انه هيخبط الناس !!!!!!!!!!!!!
انت بتجيب الكلام دة منين؟؟؟؟؟؟؟؟؟
احنا بنقول ان حتصله صدمة الانبهار و التحول من سيارة عدمانة الى سيارة سريعة و حديثة
و لاشك ان ذلك سيغير من سلوكه يا اما للافضل او للاسوأ

فلننتظر و نرى ماذا سيحدث فى المستقبل ان شاء الله
استهدى بالله كدة و لا تسبق الاحداث و لا تضع لنا كلام لم نقوله كالعادة

المشاركة الأصلية كتبت بواسطة hazem_khidr

اللي بيسوق 124 و 1300 و العربيات القديمه دي بيبقي محترف و عارف هو بيعمل ايه
لما حيركب عربيه من الجداد مش حيخبط و لا الكلام الفاضي دا بالعكس حيضايق شويه من الكبود اللي مش متعود انه ما يشفهوش لكن الامور حتبقي عاديه جدا
حتلاقي السواقين بيجروا بعقل و بيتحكموا في العربيه كويسه و دركسيون مضبوط و فرامل بتوقفه يعني مش حيعمل مشاكل لان سواق التاكسي دا سواق بجد مش واحد معاه قرشين راح اشتري عربيه يرازينا بيها في الشوارع و خلاص

انا متفق معاك يا حازم

يا جماعة الناس دي متعوده تسوق عربية فيها غيارين مبيجوش

و من غير فرامل و يوقف العربية بالتوقع

الردياتير مبيتحطلوش مية و الازازه جنبه و يدور العربية بسلكتين

و طبعا المرايات خيال علمي

عربية حديثة ايه و قديمة ايه ما هيا فرامل و بنزين و دبرياج

خلاص يعني نسيتوا العربيات القديمة ، و كلنا جيل التكييف و الباور و الأتوماتيك

و الرخصة هيجبهالي انكل شريف

المشاركة الأصلية كتبت بواسطة Ahmed Anwer

تسوق عربية فيها غيارين مبيجوش

و من غير فرامل و يوقف العربية بالتوقع

حلوة اوى حكاية انه يوقف العربية بالتوقع
لا و انت الصادق دا بيفتح الباب و يوقفها برجله