معايا رينو داستر دفع رباعى ، ومبسوط منها والحمد لله ولكن الكاسيت بيعلق ومابيشتغلش ألا لو حركت زرار أحد الأبواب مرة الباب بتاعى ومرة ماينفعش ولازم الباب اللى جنبى وأحيانا لا ده ولا ده ولازم نزر الصالون ، كمان بدأ دراع المالتى فنكشن يعلق زر خفض الصوت ويحلف مايشتغلش ألا بعد خمس ست مرات !!!
قلت مابيدهاش لما أروح صيانة الــ 5 ألاف أقولهم عليها وإن شاء الله بسيطة !
رحت فرع العبور يوم 19/2/2013 الحجز الساعة 11.30 وصلت قبل ميعادى بربع ساعة العربية أستلموها ودخلت الساعة 12 !! ووقع التوكيل الكبير قوى فى حيص بيص ومش عارفين يصلحوا العيب بالكاسيت !! وكمان الذراع مش موجود !! ياخبر أسود ياجدعان الساعة داخلة على 4 العصر ولسه مفيش حس ولاخبر !! وفى النهاية طلب المهندس إسلام زيدان أنى أسيبلهم الكاسيت وكلها يومين يتصلح وهما هيتصلوا بيا !!! طبعاً لم يحدث وأنا اللى هاريهم أتصال ومفيش فايدة لغاية لما عملت شكوى على موقع رينو مصر على الفيس بوك ، وكلمته بعدها بيومين قاللى الكاسيت خلصان ياباشا من ساعتها !!! قلت طيب خير وبركة أروح أستلمه ويركبوه وياريت يكون الدراع بتاع المالتى فنكشن جه بالمرة ،، قدمت إعتذار عن محاضراتى يوم الثلاثاء 12/3 ( يعنى تقريباً بعد 22 يوم) وصلت بالسلامة فرع العبور الساعة 11.15 وأستلمها مهندس تانى أسمه أمجد وشرحتله الموضوع وأن الكاسيت قال المهندس إسلام أنه خلص وجاي علشان تركبوه ونخلص !!
طبعاً كلموا بصوت واطى واطى ، وأنتظرت لغاية الساعة 3.30 العصر وفى النهاية مفيش نتيجة !!
بجد توكيل مش مظبوط خااااااااااااااالص والمهندسين كلامهم غير صادق !! السادة المحترمين بيحاولوا يقنعونى أنهم غيروا ذراع المالتى فنكشن وده طبعاً ماحصلش ولم يتم تغييره !!! تخيلوا توكيل مفروض أنه محترم يحصل فيه كدب وخداع !! والكاسيت ماكنش متصلح أساساً ولا حاجة !! وبدوأ محاوله تصليحه تانى !! بس برضه وقعوا فى حيص بيص ومعرفوش يصلحوه !! وعلى وعد بإصلاحه تانى وأنتظر مننا تليفون !! وحتى الآن لاحس ولاخبر !! عملت شكوى على الرقم المختصر !! وبرضه ماحدش بيرد عليا !!
بجد توكيل سئ جداً فالحين بس فى لم الفلوس فى الصيانات فقط ، ولكن حتى لما تيجى تلجأ لهم فى حق من حقوقك يحاولوا ييتهربوا منك ويخدعوك ويكدبوا عليك !! بدل مايقفوا جنبك زى كل التوكيلات المحترمة فى كل دول العالم اللى شفناها !! والله كل الدول العربية والأفريقية التوكيلات فيها محترمة جداً جداً ومفيش النصب وشغل الفهلوة اللى عندنا ده !!
بجد حسبى الله ونعم الوكيل فيهم وأفوض أمرى إلى الله إن الله بصير بالعباد !!!