بخصوص اوبل استرا كوزمو ٢٠١٣ عايز رايكم؟

**karim gamal** · 14-03-2013 09:02 PM

اولا عايز اسال بخصوص اوبل استرا سيدان كوزمو فرش الكراسي نصه جلد ونصه قماش فايه رايكم يفضل كده ولا يتعمل كله جلد وهل ينفع؛ ثانيا بيقولو ان شاشه الكاسيت اللي في تابلوه وجزء من الفيبر اللي تحتيها بتتشال وبيركب مكانها شاشه اكبر تاتش وفيها gps ووصله البلوتوث وبتعرض بيانات الusb والكاسيت وموجوده في اسكندريه معرفش اذا كان فيه في القاهره ولا لا عايز رايكم في ده كمان ، وكمان هل دواسات الارضيه وغطاء السياره بيتباع في التوكيل ولا اشتريها من بره ومنين ،،،،،،، واخيرا ايه رايكم في موضوع العزل الحراري للزجاج وهل فعلا بيحافظ علي التابلوه وبيطول عمر التكييف ولا اشتغالااات ،، مستني ردودكم ورايكم

**A.Adel** · 14-03-2013 11:01 PM

المشاركة الأصلية كتبت بواسطة karim gamal

اولا عايز اسال بخصوص اوبل استرا سيدان كوزمو فرش الكراسي نصه جلد ونصه قماش فايه رايكم يفضل كده ولا يتعمل كله جلد وهل ينفع؛

أنا شفت العربية و في راي المتواضع إنه كده أحسن
إنت كده واخد فخامة الجلد وفي نفس الوقت الظهر بيبقى قماش ودة أحسن في الحر

بالنسبة لتفصيل فرش جلد فوق اللي عندك :
معرفش إذا كان ينفع ولا لأ

المشاركة الأصلية كتبت بواسطة karim gamal

ثانيا بيقولو ان شاشه الكاسيت اللي في تابلوه وجزء من الفيبر اللي تحتيها بتتشال وبيركب مكانها شاشه اكبر تاتش وفيها gps ووصله البلوتوث وبتعرض بيانات الusb والكاسيت وموجوده في اسكندريه معرفش اذا كان فيه في القاهره ولا لا عايز رايكم في ده كمان

معنديش فكرة والله موجودة في القاهرة ولا لأ ؟
بس ال GPS ده عموما لذيذ
شاشة تتش و بيبقى فيه options أكتر
وبيشتغل فعلا على multifunction عادي

بس خد بالك ال quality بتاعت الصوت مش بتبقى زي ال original

**A.Adel** · 14-03-2013 11:21 PM

المشاركة الأصلية كتبت بواسطة karim gamal

وكمان هل دواسات الارضيه وغطاء السياره بيتباع في التوكيل ولا اشتريها من بره ومنين ،،،،،،،

الدواسات المفروض تلاقيها بتتباع في التوكيل
متوسط سعرها في التوكيلات في حدود 500-600 جنيه

هي أغلى من اللي بتتباع بره بس بتبقى أنضف بكتير و بتيجي بكلبسات تثبتها في الأرض
و بيبقى شكلها شيك

بس الغطاء ده ملوش لازمة تجيبه من التوكيل
هاته من بره و خلاص

المشاركة الأصلية كتبت بواسطة karim gamal

واخيرا ايه رايكم في موضوع العزل الحراري للزجاج وهل فعلا بيحافظ علي التابلوه وبيطول عمر التكييف ولا اشتغالااات ،،

المفروض الإزاز في ال cosmo بيبقى tinted أصلا كمان , ولا إيه ؟؟
الأوروبي كله فيه عزل , هتلاقي الإزاز فيه سنة خضار كده

ال citroen وال peugeot وال fiat وال VW و renault
و bmw و mercedes

**احمد فهمى** · 15-03-2013 12:01 AM

نصيحه بلاش فرش حالياً تفكيك فى عربيه جديده ولعب ملوش اى فائده استنى سنتين كده وركب فرش وبالنسبه للكاسيت ده هيركب بس هيلغى بيانات السياره يعنى الاعطال والمعلومات الخاصه بالعربيه مش هتعرف تظهرها على شاشة الكاسيت اللى هيركب والدواسات والغطا اشتريهم من اي محطة بنزين او من عند بتوع الكماليات انزل شارع دمشق هتلاقى دواسات فى كل المحلات وغطيان وبخصوص العازل كلو كلام فاضى وسرقه انا كنت مركب اغلى واحد الفى كول كان ب2600 جنيه وعادى مفيش فرق والامامى بيزغلل الرؤيه مش هتستحملو ركب ستاير كبس وارا وفى الاجناب وهتبقى كل حاجه تمام انا عامل كده عندى ومبروك العربيه ربنا يحفظهالك

**K.Ossama** · 15-03-2013 10:35 AM

المشاركة الأصلية كتبت بواسطة احمد فهمى

بالنسبه للكاسيت ده هيركب بس هيلغى بيانات السياره يعنى الاعطال والمعلومات الخاصه بالعربيه مش هتعرف تظهرها على شاشة الكاسيت اللى هيركبك

هى مش بيانات السيارة بتظهر فى الشاشة التانية اللى بين الامبيرات

**karim gamal** · 15-03-2013 11:44 AM

المشاركة الأصلية كتبت بواسطة k.ossama

هى مش بيانات السيارة بتظهر فى الشاشة التانية اللى بين الامبيرات

صحيح الكمبيوتر في الشاشه اللي في لوحه القياده ، الشاشه التانيه مسمينها شاشه بيانات جرافيك بس بردو بتعرض الاعطال ولا لا معرفش بصراحه ... لو حد يعرف يقولنا.......

**m.farouk** · 16-03-2013 12:44 AM

لا الاعطال فى الشاشة الموجوده بين العدادين الى بيتكلموا عليها دى بتاعة الفيكترا على فكره هى ليها الكسيت ده بايونير على السيت بتعها حوالى 4 موديلات وتشتغل على الملتى فانكشن على موقع اوبل اكسيسروز