㋡ ◣◥ سؤال هل انتا كأنسان محتاج اكتر من ١٠٠٠ جنية في الليلة !! ◤◢

**dolly13** · 15-03-2013 02:20 PM

المشاركة الأصلية كتبت بواسطة y a r i s

هههههههههههههههه
دحكتيني والله يا دولي يا اختي .... هههه ولا يهمك بكرة هستلملك المهندسين بس حددي هو مهندس مدني ولا طيران ولا بترول ولا مهندس بور

وصدقني يا دولي انتي ظلمة الطبالين والله ما بيطلعوا الف جنية في الليلة خالص. انتا ناسية ان السياحة اضربت والنقطة بقت شاحة :) ... ثم ان جتلوا حفلة المره دي. بيفضل قاعد في بيتهم طول الشهر ...و المهندس كزالك. يوم ما يتمعظم راتب المهندس المدني كام في الشهر سته سبعه. مش مهم بس بيكتفي بيه وبيبوس ايدوا وش وظهر ... ده غير التعب. وقد ايه بيعصر مخو في الرسم والحسابات ويجيلوا زبون ابن لاذينة او وحده مدلعه تقولوا لا لا لا. انا عاوزة الحمام في اوضة النوم. والمطبخ في البدروم والسرير في الدولاب وعاوزة بسيم فوق السطح وبعد ما يرسم ويحسب ياعيني ويتعب. ويوري الزبون التكلفة تبص تلاقي الزبون لا لا لا خلاص سوك على البسيم وسوك على الحمام. ولا اقولك قطع الرسمه وارجع ارسم تاني هههههههههه ده كفاية. بس الاحباط ياعيني بعد مايرسم ويتعب ويعصر دماغو وفي النهاية شغلوا كلوا يترفض ويقولوا عيد من تاني. تقولش فورة كوتشينا وكل شوية فنط ووزع :)

هههههههههههههههههههههه
لا هو مهندس معمارى ومقاول وفعلا لما كان بيرسم كان فيه ناس بتطلب حاجات لها العجب والله
لا وفيه فئة ناصحة اوى بقى يعنى يقوله لو انا هاعمل كذا اعمله ازاى ومنين على اساس يعرف ويظبط حاله هو فى حاجات فى الرخيص بعيد عن المهندس ويبقى استفاد استشارة ببلاش
وفيه اللى دماغه راكبة شمال ياعم ماينفعش حمام الضيوف يفتح على الريسبشن يقولك لا انا مش عايز الضيوف تدخل اللوبى
والله الراجل ده شاف بلاوى كتير وبيصعب علية اوى

**Y a r i s** · 15-03-2013 02:33 PM

المشاركة الأصلية كتبت بواسطة blazer

الانسان طمااااااااااااااااااااع ومحدش بيكتفى من الفلوس
و انت جيت على الجرح فعلا
والدتى ووالدى الله يرحمهم هما الاتنين أصيبوا الحمد لله بلسرطان
و شفنا دكاتره بلهبل "" والدى رحمة الله عليه كان طبيب" بس والحمد لله مكانش بيدخله ولا ربع الدخل الى انت بتتكلم فيه , مع انى اعرف دكاتره كشفهم بيوصل ل 750 جنية !!!!!! تخييييييييل والعياده بلحجز كمان
دا غير التحاليل والاشعة الى بتعملها فى المركز بتاعة برده
والادوية الى اسعارها فى السما وكل دا فى المركز بتاعة
يعنى عشا تروج اثل حاجه يبقى معاك 5000 جنية
للاسف الطب اتحول الى تجاره
ربنا يرحمنا ويهديهم

ربنا يرحمهم يارب ويجعل مثواهم الجنة قادر ياكريم
حبيبي يا بليزر. ماهو انا كمان ماشي في الموال الي بتقول عليه حضرتك وعندي ولدي نفس الحكاية كده ... ودي حال كثيرررر من المصريين ... ومنها عيادة لدكتور مشهور فاتح مستشفى في اكتوبر الاهي يجحمو قادر ياكريم ( من غير ذكر اسماء ) كاتب للحج دوى ب ١٣٠٠٠ جنية nexavar200وبعد ماجبنا الدوى. طلع الدوى مش للحج اساساً وتشخيص الدكتور خاطئ خاطئ وادى لتدهور صحة الحج ... والدكتور الزفت ده الي بقلكم عليه. في اكتوبر الكشف بتاعوا ب ٥٠٠ جنية وبالحجز كمان بالشهور ده غير التحاليل االي عندو. والي المعمل تبعوا كمان ١٢٠٠ جنية تحاليل وتيجي تروحلوا يلطعك اليوم كلو.
وفوق ده وده يكلمك من طراطيف منخيروا .... ولمن تيجي تسئلواتلاقي الممرضة واقفه زي المخبر ورى قفاك كده وتزعقلك وتقلك لمن الدكتور يسئلك. ابقى اتكلم غير كده رجاءً ما تزعجش الدكتور. ( لعنة الله عليها وعلى دكتورها )
والي مدايقني حقيقي هيا الناس الغلبانه الي اكتر غلباً مني مليون مره جين من اخر الدنيا من اسيوط وسوهاج والمنيا والي جي من الوحات وناس تصعب على الكافر وجين لاخر الدنيا علشان دكتور غبي زي ده.

**Y a r i s** · 15-03-2013 02:45 PM

المشاركة الأصلية كتبت بواسطة hossam_elwani

كنت بسأل نفسى نفس السؤال ده لما بتأمل المستوى ده من الدخل (اللهم لا حسد )

انزل سيتى سنتر وانت تعرف بيصرفوها فى ايه

فيه مستوى معيشه ممكن يخليك تصرف فى اليوم 5000 واكتر

وعلى فكره مش بس معيشه يوميه لا عندم تعليم عالى وممكن بره مصر وفلتين بطقم سفرجيه وخدامين كل واحد بمرتب والمصيف قى شرم او بره مصر كل ده بيبلع فلوس بلع فعلا انها شهوة المال حفظنا الله منها

ههههههه عندك حق يا حسام يا خويا
شوف النهردة اقل فنجان اكسبريسوا تمنوا كام ههههه ولا اجرة الخدم وازمة الشغالين ولا الحشم ههههه هو صحيح يعني ايه الحشم وبيعملوا ايه دول. في البيت ولا السواق لوحدوا شوف بياخود كاااام .... بس هقولك حاجة يا حسام يا عزيزي هل تلاتين الف جنية في الشهر مش كفاية :) ولو انا اديتك الف جنية وقلتلك انزل اتفسحلك شوية في سيتي استار معقول هتصرفهم. كلهم مره وحده ولا هتصرف جزء وتشيل جزء طبعاً انا باستثني الستات من الموضوع وبالذات مراتي الي ممكن تصرفهم وتصرف ابوهم وتستلف عليهم كمان هههه. ومش في الليلة الوحده لا في الثانية الوحدة :) هههه حبيبي يا حوسام باشا

المشاركة الأصلية كتبت بواسطة sasa44

اثنان لا يشبعان طالب علم وطالب ماااااااااااااااااااااااا ل

صدقت واللهِ يا عزيزي ساسا صدقت :)

**Y a r i s** · 15-03-2013 02:57 PM

المشاركة الأصلية كتبت بواسطة alexaway

طبعا شهوة المال مش واقفه علي حد معين او مهنة معينة ولكن الشئ الاكثر بغض من شهوة المال هو ان يكون دكتور ويتاجر بالام المرضي ,يعني تلاقي دكتور واخد حقة وزيادة وكمان مش عامل شغله كويس وتلاقي بعد العملية فى مشاكل او مضاعافات نتيجة اهمالة واستهتارة بالمريض .
انا خرجت مره من عند عيادة دكتور اسنان وانا دافع 950 جنية ( وسناني برضوا متعملتش كويس ورحت لدكتور غيره ) قلت انا لازم اعذر الحرامي والبلطجي , اذا كان الدكتور اللي حاصل علي اعلي الدرجات العلمية معندوش ضمير وسفاح فى الفلوس ,يبقي طبيعي ان البلطجي او الحرامي يسرق وينهب .

١١١١١+
الله ينور عليك يا اليكساوي يا عزيزي
وعلى قولت ابو حبيبة اصبت كبد الحقيقة :)
يعني فوق ما بندفع. وبندفع. هوبا تبص تلاقي التشخيص اي كلام او الحشو طلع تاني يوم مع اول لبانه بتاكولها او اول لقمة بتمضغها ... ولو مطلعش تلاقي كل شهر بيتفتت الحشو شوية شوية

ده غير تبص تلاقيه فاتح بوقك علشان يحشي الضرس الي تحت. تبص تلاقيه قاعد بيحفررر فوق. تقولوا بتعمل ايه يا دكتور يقلك استنى استنى انتا ابن حلال اكتشتفتلك فوق سوسة بتمشي الحمدالله اننا لحقناها قبل ما تخش في الضرس وتطلع من نفوخك ههههههه تقولوا طب كويس يالله بعد ما تخلص حفر فوق خوش على الضرس الي تحت. وهوبااااا تبص تلاقي بيحفر في حته تاني تقولوا بتعمل ايه يا دكتور الله يخرب بيتك ركز يقلك. لا لا. اصل وانا بحفررر تحت لقيت خير اللهم اجعله خير سوس كان عامل نفق ولا نفق سيدي جابر وطالع من اللثة في خالد ابن الوليد هههههههههههه ... وعلشان يحشيلك ضرس يكون خد سنانك كلها حفر وردم ... لدرجة مره بقول للدكتور بقولك ايه يا دكتور ما تشيلهم كلهم بالمره ونعمل طقم سنان اريح ههههه بعد ما حفرلي تلات تربع سناني يقولي لا لا خسارة
قال خسارة قال ده وانا طالع من عندوا سيبت الموبايل رهن عند التمرجي لغايت ما اجيبلوا باقي فلوس الحشو ههههههه كتر خيروا مقليش سيبلي الفنيلة. والليباس والبنطلوم رهن لغايت ما تجيب بقيت الي عليك :) وتحياتي

**Y a r i s** · 15-03-2013 03:14 PM

المشاركة الأصلية كتبت بواسطة s o p h o s

اكيد يكفي ويكفي اقل من كده بكتير
اي شئ يكفي مدام في رضا
بس في فرق بين شخص لوحده وبين اسرة من 6 اشخاص او 7 مثلا ..

ماشي يا بوحميد ياسيدي وقول عندو ٨ عيال بيصرف عليهم. ياترى محتاج اكتر من ١٠٠٠ جنية في الليلة علشان يربيهم. اومال الناس الي بتاخود او تقبض ٣٠٠ جنية في الشهر بمعدل ١٠ جنية في اليوم. بيعملوا ايه :)

المشاركة الأصلية كتبت بواسطة hondawy_2008

لو كان لابن آدم واد من دهب لتمنى أن يكون له واديان و لو عنده واديان لتمنى أن يكون له 4 و لا تملأ عين ابن آدم الا التراب

ااااه واللهي صدقت يا عزيزي. صدقت لا يملاء عين ابن ادم غير التراب
زي تمام لمن يكون شب لسه بيبدء حياتوا وهو وعرستوا. تقدر تقولي شقه اوضتين وصالة صغيرة ٥٠ او ٦٠ متر. وناس تقولك صغيرة. رغم ان البني ادم مش محتاخ اكتر من مترين يفرد فيهم جسمو ويريح .

المشاركة الأصلية كتبت بواسطة dolly13

الموضوع نسبى ياياريس
ممكن اوى 1000 جنيه يكونو كافيين وممكن لا
على حسب مكانتك والتزاماتك وطريقة انفاقك
تحياتى

ماشي هو فعلاً نسبي ... بس في قاعدة بتقول كلما زاد الدخل كلما كثرة المصاريف ثم هل الطبيب نبي من الانبياء كي. يعامل معاملة افضل من البشر ماهو زيوا زي اي انسان عادي يفرق ايه الطبيب عن المحاسب عن المهندس عن الظابط عن الطيار عن السواق عن النجار. الجميع يعمل من اجل لقمت العيش وليس من اجل المظهر الاجتماعي .... لكن عندما يتحول الموضوع لمظهر اجتماعي
ويصل ثمن الكشف لنص او ثلث مرتب انسان في ايام واسابيع. يعني واحد بياخود ١٢٠٠ جنية في الشهر. هل يعقل يروح يدفع ٥٠٠ جنية لدكتور !!!! يكشف عليه مدة لا تتعدى الخمس دقائق !!!

وبعدين يا دولي يا عزيزتي ... فين القناعة. الي هتبقى عندهم ... فين الرضا ... فين ان الانسان يحمد ربوا ويقول الحمدالله خلاص جبرت النهرده شطب يابني ولم العدة وإقفل الدكان. :) ههههههه

**Y a r i s** · 15-03-2013 03:27 PM

المشاركة الأصلية كتبت بواسطة egyzizo

على فكرة ، الدكاترة مش أكتر الفئات دخلاً ولا حاجة ، دول غلابة جنب فئات تانية ..
الدكتور زى الصنايعى بالظبط ، بيجيب لقمته بايده ، اشتغل النهارده هياكل النهارده ، ريح بكره ، يبقى مافيش مم ..

على عكس فئات تانية تربح أكثر بكثير من الدكاترة وبدون مجهود يذكر ، زى أصحاب المصانع والتجار بتوع الاستيراد، دول ممكن يبقوا فى شرم الشيخ ، والشغل ماشى لوحده والمكن شغال ويتابع بالتليفون، مش زى الدكتور لو رحت العيادة مالقيتهوش هتروح لغيره.

على أى حال ، أنا سمعت وجهة نظر مرة لدكتور من أصحاب الكشوفات المرتفعة واللى عياداتهم شغالة كويس (ودول على فكرة مش أكتر من 1% من الدكاترة فى مصر) ، وكان بيقول ان الاقبال على عيادته كبير جداً ومش معقول هيعمل 200 كشف فى اليوم ، فبيرفع السعر علشان الزبون عليه يقل شوية ويقدر يمارس حياته زى باقى البشر.

ماهو ال ١٪ دول ياعزيزي
مستولين على تلات تربع ثروات مصر ومش بس كده بيحبطوا الدكاترة زمايلهم ... يعني مثلاً انا دكتور بكسب فلوس من الهوى. يجيلي العيان اقولوا افتح بوقك يا بابا. وقول ااااااااااااء
واقوم كتبلوا على اي حبوب مسكن واقول دفي نفسك وانتا تبقى زي الفل واخود منوا ٥٠٠ جنية او حتى ٢٥٠ جنية.
وانتا دكتور شاطر ومجتهد وابن حلال وبتراعي ربنا ولكن كشفك ٣٠ او ٤٠ جنية تصور بقى اجي اعدي قدام منك وانا ركاب الحته الباجيروا بتاعتي وانتا. يادوبك غلبان ومعاك اوكتفياااا ههههه بزمتك مش هتحس بالاحباط هههههه انك لانك بتتقي الله محدش بيجيلك والتاني الي بيفتح المنجل والحنجل للزبون ويوهوموا الناس اومم اومم عليه :)

**Y a r i s** · 15-03-2013 03:35 PM

المشاركة الأصلية كتبت بواسطة blazer

ياباشا انا رحت مره المركز الطبى العالمى الى كان مبارك الله ينتقم منه بيتعالج فيه
ودخلت لرئيس قسم الاورام
مكتبة كانك داخل مكتب رئيس جمهورية و 3 ولا 4 دكاتره مساعدين
وفى الاخر عرفت من دكاتره تانيين بره انه ينطبق عليه المثل بتاع الصيت ولا الغنى يكتب تحاليل وآشعات ومناظير بكام الف عشان يحسسك انه بيعمل الى متعملش وفى الاخر بطيخ

دا غير طبعا مراكز المناظير والاشعة الى البهايم بتفهم عنهم

تصوروا والدتى عملت ليها ما يزيد عن 7 مرات منظار وآشعة وكل النتايج تقول ان مفيش اى وجود للسرطان
وفى الاخر اكتشفنا ان السرطان متوغل و مش عارف هل العيب فى الى بيشوف الاشعه ولا العيب فى الى بيعمل الاشعه مش عارف يوضحها وبيعملها غلط
وطبعا كل مره تدفع اد كدا و النتيجة تدهو فى الحاله
الى عاوز يتعالج ياخد بلاسباب ويسافر اى بلد تانية غير مصر يتعالج فيها

الدكترررررة فوق الفلوس الي لاهفينها كاتبين على تحاليل غلط في غلط
ويبقى المرض او الورم في حته وهما فاكرينوا في حته تانيه خالص زي الافندي الي كان فاكر ان الورم في الكبد وابتدى يدينا ادوية ليه وكل ما اقولوا طب نعمل تحليل انسجة للحج ويقول لا لا لا لزوموا ايه انا عارف بقولك ايه وفي النهاية طلع دكتور كووفته بعد ماخدنا عينة من الانسجة وقدرنا نحدد البؤرة فينا بس كمان برضوا. بعد فوات الاواااان. لان الدكتور البطيخ بتاع اكتوبر. ضيع وقتنا جمب منوا في الحجوزات والتحليل والادوية الي ملهاش لزمة :) بس كل الي حصلنا مش مهم. بس الي مجنني. ان لسه ناس بتروحلوا ويسمعوا عن الدكتور ده من شرقها لغربها ويدفعوا ال ٥٠٠ جنية على الرغم من انوا راجل عجوز ٧٠ او ٨٠ سنة. يعني المفروض طلع معاش من عشرين سنة ومع ذلك شغال. ورزق الهبل على المجانين :) وتحياتي

**Y a r i s** · 15-03-2013 03:51 PM

المشاركة الأصلية كتبت بواسطة زهير فكري

متفق مع حضرتك ان مهنه الطب من المهن التي لا تتفق مع مباديء المكسب والخساره و التجاره ... و للأسف نظرا ان في بلدك مهنه جليله زي دي يكون راتب الطبيب الشهري لا يفي بمتطلباته الشخصيه !!!!!!! . بالتالي ستجد انتشار واسع للعيادات الخاصه وكل واحد وشطارته ... والناس ماشيه مع الرايجه والشهره والطبيب المشهور بيكون عايز يعوض السنوات العجاف اللي عاشها و طبعا مفيش حد هيكون بيملك مهارات تجعله يعيش بشكل افضل ولن يستغلها دي طبيعه البشر ... بالاضافه ان ثقافه العلاج في المستشفيات الحكوميه اصبحت مؤلمه يعني اللي يدخلها ما يخرجش و ارتبط من يتم علاجه في المستشفيات الحكوميه والتأمين الصحي بالفقراء و المحتاجين و اصبح من يطلب العلاج هناك في منقصه اجتماعيه و سبه في جبينه !!!!! عايز تقضي علي التجاره دي ترفع مرتبات الأطباء بشكل كبير( راتب الطبيب في امريكا 200000 الف دولار سنويا ) .. اعمل مرتبات محترمه و بعدين حاسب ...

١١١١١١١+
بس ايه ده يا استاذ زهير. ٢٠٠.٠٠٠ دولار في السنة وفي امريكا
والدولار ب ٦.٧٥ جنية
يعني بالمصري يطلعوا ١.٣٥٠.٠٠٠ في السنة
طيب هنقسم المليون والتولتمية وخمسين الف جنية على ١٢ شهر
يطلع ١١٢.٥٠٠ جنية في الشهر وهو ده بالزبط الي كتير من الدكاترة في مصر بيعملوه في الشهر
يعني بمعدل ٣٧٥٠ جنية في اليوم بالذات بتوع التخسيس ودكترة القلب اودكاترة النفسين او المخ والاعصاب وبعض دكاترة الاسنان مش كلهم زي دكتور الاسنان الي في اكتوبر اشهر واحد حططلك بنتين استقبال وبنتين ممرضات من اوكرانيا مش عارف ولا من روسيا. وبت مصرية بس علشان تصب كوبايت ميه للمريض. يمضمض ويتف في الحوض وهيا تناولوا المناديل هههههههه. تصور يا استاذي. يوم الزبون يخوش عندوا ويقول انا حشيت سنة ولا عملت سوسة يدفع ٣٥٠٠ جنية وش كده واحنا بنتكلم عن زبون واحد فهل يعقل دخل الدكتور في امريكا زي دخل الدكتور المصري ... علشااااااان كده يقولك زميل الكلية الامريكية او البريطانية وبما انهم زمايل يبقوا بياخوا قد بعض ههههههه حبيبي يا استاذ زهير. تحياتي ليك يا غالي :)