مساء الخير
بفالي ٣ اسابيع ماشي على نظام بسيط جدا واي حد يقدر عليه بسهوله و خسيت حوالي ٨ كيلو و البقيه تاتي
مع العلم اني باكل عادي نوعا ما
نخش في المفيد
الفطار
كابتشينو كراميل او فانيليا
الساعه ٩:٣٠ تفاحه و دي هتسد نفسك و بتحرق دهون
الساعه ١١:٣٠ نصف رغيف جبنه جوده او شيدر على لانشون فراخ او لحوم
الغذاء
تديها طبق سلطه عائلي و ده مهم جدا و شكر خاص لصاحب موضوع السلطه يا منى و تمضغه جيدا
و بعد ما تكون تلتين بطنك تقريبا اتملت بالسلطه تبتدي تاكل نص الكميه المعتاده من الرز او المكرونه و ياسلام لو خضار مطبوخ و قلل كمية اللحمه و حط على الرز او المكرونه ٣ معالق سلطه تاني
و اتحداك لو عرفت تكمل و هتقوم شبعان على الاخر
العشاء
سلطة فواكه عباره عن تفاحه مقطعه و كنتالوب على كام حبة فراوله و عليهم زبادي منزوع الدسم و ملعقة عسل
و في البدايه ممكن كمان ربع رغيف جبنه و بعد ما تخس شويه و تحس ان الموضوع بقى ببطء شيل الربع رغيف بتاع العشاء هتنزل تاني بسهوله
و ممكن بعد شهر نقسم و جبة الغدا على مرتين بحيث يبقى النشويات مع الخضار المطبوخ الاول و بعديها بتلات ساعات البروتينات و كل مره نديها سلطه
و بكده ما نكونش رمينا الكروت كلها مره واحده عشان الجسم بعد ما بيخس في الاول بيضرب فرامل نقوم مغيرين و هكذا
يعني بنضحك عليه كاننا بنبتدي من اول و جديد
طبعا بالنسبه لي رجعت البس القمصان اللي كنت راميها و الحزام بيخش في فتحه زياده و ده بالنسبه لي ٥٠ في الميه من المطلوب و الموضوع انعكس في الرياضه بقت الحركه اسرع و مفيش النهجان من اقل مجهود
مع تمنياتي لكم بالصحه و النجاح
