الموضوع: نيسان تيدا2013

انا كنت في نفس حيرتك من شهر وأخيرا استقريت على التيدا هاتشباك. ودي المميزات عن أي عربية تانية في فئتها:

١- عزل ممتاز. مش حاتسمع لا صوت موتور ولا صوت شارع
٢- سحب وتجميع وتسارع ممتاز. مش حاتصدق ان العربية دي يطلع منها كده
٣- واسعة جدا جدا من جوه ومريحة فوق الوصف
٤- الشنطة بتبقى واسعة جدا لما بتزق الكنب اللي ورا لقدام
٥- طارة مالتي فنشكن وسماعات وكاسيت صوتهم رائع
٦- كراسي مريحة جدا وبتتحرك فوق وتحت
٧- توفير بنزين غير طبيعي. انا في الأول ماكنتش مصدق. وكفاية أقولك اني سافرت بيها البنزين ورجعت ولفيت في اسكندرية والتانك كان فيه قبل التلت الأخراني. شوف برضه الموضوع ده
٨- شكلها جميل جدا خصوصا اللون الأزرق. طبعا اللون أذواق بس هي بتلفت انتباه أي حد باشوفه
٩- دهان ممتاز وصاج ناشف جدا. امبارح في موتسيكل حك فيا بالجنب حكة ظويلة حسيت بيها في العربية كلها، لاقيت فيها بس خط أبيض من الموتوسيكل مسحته بفوطة وميه وراح.
١٠- ابعادها ملمومة وصغيرة وببتركن في أي حتة
١١- ليها توكيل اوتو ايجيبت أكتر من ممتاز كل قطع الغيار اللي ممكن تحتاجها موجوده في السوق ومتوافرة صحيح مش مرمية في كل حتة زي اللانسر والكوزي بس مش حاتحفى وراها زي الفرنساوي. بالعكس موجودة عند ناس معينة في دمشق والتوفيقية وفي موضوع في المنتدي عن قطع الغيار هنا في اللينك ده
١٢- قطع غيارها معمرة جدا.. نفس العربية موديل ٢٠١٠ عند عديلي وماغيرش فيها أي حاجة ولا عمه اشتكى منها
١٣- بالنسبة لإعادة البيع. فهي ليها زبونها. الميزة الكبيرة ان توكيل اوتو ايجيبت بنشترى العربيات المستعملة وبيعيد بيعها بعد تظبيطها. فممكن تبدلها بحاجة احدث من عندهم لو زهقت او عايز تغير
١٤- باور ستيرنج كهربا تحفة!! من احسن الباورات اللي سقتها في حياتي
١٥- الفئة التانية اللي معايا فيها ايه بي اس واي بي دي وكمان فيها جبة رفايع كده زي نور في الشماسة غيره
١٦ - التكييف ولا كلمة!!! تلاجة ياباني ولا احسن
١٧- كاوتش بريدجستون وقعتبيه في كذا حفرة ولا حصله حاجة
١٨- تقفيل مكسيكي محترم جدا،، وحط التيدا جنب الني وشوف فرق التقفيل حاتحس بيه
١٩- الثبات هو الحاجة الوحيدة اللي ممكن تكون مش متفوقة التيدا فيها وده راجع لأنها عالية فمركز الجاذبية بتاعها مش قريب للأرض زي العربيات الواطية زي اللانسر وغيرها. لكن ميزة العلو هو التعامل مع المطبات. انت في مصر برضه والأرض زي مانت عارف. ماينعش تقعد تعمل مروس كل خمس دقايق. التيدا ممتازة في المطبات. انا مرة أخدت مطب عالي جدا في شارع متفرع من دمشق في مصر الجديدة واخدته بسرعة ولا حتى لمس في العفشة.
٢٠- العفشة بقى حكاية ناعمة جدا وسلسلة وماتحسش بالخبطات والمطبات غير العنيفة منها

انا رأيي تتكل على الله على طول وبدون تفكير لأنها فعلا عربية تستاهل كل قرش فيها. ولو بتفكر في صني او كيا او شيفروليه انا نصيحتي تزود ١٠ او ١٥ وتجيب التيدا حاتعيش معاك وحاتحلف بيها.

وفي الآخر الموضوع ارتياح نفسي. انا اعرف ناس بتحب اللادا النيفا وبالنسبالها احسن حتى من البي ام .. جرب العربية مرة ومرتين وامشي بيها في الشارع وشوف انت ايه رأيك. وربنا يوفقك

وبالنسبة للشكل الجديد. انا سألت في اوتو ايجيبت وكل الناس قالت انهم ماعندهمش أي معلومة عن النسيان التيدا الشكل الجديد. وحتى ماحدش بعتهم يعملوا تدريب عليها أو ما شابه، وحتى لو نزلت حاتنزل غالبا بإسم جديد وأغلى من الحالي. وكده كده لما تيجي تشتريها حاتقع في حيرة انها لسه جديدة ،ومالهاش قطع غيار فانا رأيي تجيب التيدا ٢٠١٣ ولو نزل الشكل الجديد على آخر السنة ممكن تبتدي تغير عربيتك بعد سنتين يكون بان عيوب الشكل الجديد واسعار قطع غياره الخ الخ