زيارة 6 محافظات ف البحر الاحمر ف يوم

**bassemf** · 21-03-2013 11:52 AM

السلام عليكم،

عندى طموح اركب من سوبرجيت القاهرة بليل بحيث الساعة 9 او 10ص اكون ف مرسى علم هقعد فيها ساعة لساعتين وبعدين القصير برضة ساعة او ساعتين ثم سفاجة برضة .. ثم للغردقة ومش هقعد فيها بس علشان اركب الباخرة اللى بتودى على شرم ومنها على دهب برضة ساعة او ساعتين ثم ارجع على شرم لاركب الطائرة بليل الساعة 12ص.

او ابدأ من القاهرة لدهب وهكذا وارجع بالطائرة من مرسى علم.

هل المسافات بين هذة المدن تمكنى من زيارة هذة المدن بالترتيب بأعلى فى يوم ؟

هل بسهولة فى موقف الاتوبيسات او الميكروباصات استطيع ان اتنقل للمحافظة التالية.

كام تكلفة مواصلة مخصوصة من مرسى علم، القصير، سفاجا ويتركنى فى الغردقة ؟

شكرا شكرا لكل من هيفيدنى بمعلومة

باسم فهمى

**mohamed_selim** · 22-03-2013 07:46 PM

العباره من شرم للغردقه مش شغاله ... المواصله الوحيده اوتوبيس جوباص بيطلع مره فى اليوم و بياخد حوالى 9-10 ساعات
المسافه من مرسى علم للقصير حوالى ساعه و نص - ساعتين و من القصير لسفاجه ساعه - ساعه و نص و سفاجه الغردقه ساعه

هتاخد ميكروباص بس مش متاكد من الاسعار و التوافر و فى اوتوبيسات شركة الصعيد للنقل

الطيران مش من مرسى علم نفسها ... المطار جنب بورت غالب و ده فى نص المسافه بين القصير و مرسى علم و الطيران من مرسى علم اغلى كتير عن الطيران من شرم
لو تعرف حد فى شركة سياحه و ليهم شغل فى البحر الاحمر هيظبطلك موضوع المواصلات ده اما مع عربياتهم او عربيات شركات تانيه

انت هتعمل ايه فى مرسى علم فى ساعتين؟ يعنى القصير فيها قلعه عثمانيه بس غير كده مرسى علم زى القصير زى سفاجه بلد عاديه خالص .... اقل من دهب حتى ... على العموم ربنا معاك :)

**bassemf** · 23-03-2013 12:36 AM

اية الجمال دة .. والله مش عارف اشكرك ازاى بس ربنا يجزيك خير الجزاء

انا رايح اقابل اصحاب محل كومبيوتر او اتنين فوقت الزيارة مش هيطول.

شكرا جزيلا مرة اخرى

**mohamed_selim** · 23-03-2013 01:01 AM

شغل يعنى .... افتكرتك بتتفسح :)
يوم واحد مش هيبقى ممكن .... ممكن من باليل تركب توصل الغردقه الصبح بدرى و تنزل على مرسى علم و تاخد السكه فى الراجع (بس تسال فى الغردقه على معاد اوتوبيس شرم) و تظبط رجوعك على معاده او تبات فى الغردقه لو هتوصل بعد معاده
و توصل شرم تخلص مشاويرك و ترجع طاير