السلام عليكم انا عاوز اشتري عربية ماروتي برجاء نصائحكم

**abdo7000** · 24-03-2013 04:16 PM

السلام عليكم
انا مقبل علي شراء ماروتي مستعملةوذلك بسبب كثرة قرائتي عن الماروتي من الاخوة /عمرو بية اكسل ودكتور / محمود وغيرهم من الاخوة المحترمين رواد القسم بدون استثناء برجاء التكرم بالتفضل بأعطائي نصائح لشراء السيارة من حيث الاتي:-

1- الموديل المناسب ومدي توافق قطع الغيار للموديلات القديمة مع الموديلات الحديثة وهل هناك ضرورة لمعرفة الكيلومتر الخاص بالسيارة الذي مشيتة حيث انني سمعت انها بعد 150 الف كيلو للسيارة بتحتاج الي ماتور جديد وهل يوجد ماتور 1000cc للماروتي
2- اماكن قطع الغيار
3- اماكن اصلاحها
4- هل التوكيل افضل وسعرة مناسب بالنسبة للصوانعية ؟
5- الاهم السعر الخاص بالسيارة المستعملة
ولو عملنا مقارنها بينها وبين الالتو ؟ هل تنصحوني بشراء الالتو لو هناك زيادة في حدود 5000 فقط عن سعر الماروتي
انا اسف جدااااااااااا علي الاطالة
ومنتظر رأي حضراتكم
دمتم بالف خير
والسلام عليكم

**lidosasa** · 24-03-2013 04:44 PM

مبدئياً لازم تحدد المبلغ اللى أنت محدده لشراء العربية عشان الناس تقدر تفيدك أكتر
وعامة الأفضل هو من موديل 2000 وطالع لأن ده الشكل الجديد من الماروتى من وقتها لحد دلوقت نفس الشكل وكمان قطع الغيار متوفرة وبشدة وسعر قطع الغيار معقول جداً .
وأكيد عدد الكيلوات المقطوعة بالسيارة شىء مهم جداً ويكون متناسق مع سنة الصنع يعنى العربية تقريباً بتقطع 10000 كيلو فى السنة لو صاحبها إستهلاكه متوسط مش بيسافر كتير بالعربية أنا شاريها مستعملة موديل 2007 وكانت عاملة 52 ألف كيلو وكنت شاريها من حوالى 5 شهور ب 25500 وطبعاً السعر أختلف بعد زيادة اسعار العربيات الزيرو بس عدد الكيلوات مش هو الفيصل لآن ممكن العربية يكون صاحبها رجلة تقيلة عليها ومش بيراعى العربية فى الصيانة على الرغم من إن عدد الكيلوات المقطوعة مش كبير .
الماروتى ممتازة من كله ماعدا صغر حجممها اللى بيخلى الناس تستقلها لو حتقدر تتعايش مع الموضوع ده يبقى توكل على الله .
وبالطبع الألتو أفضل فى الشكل والتقفيل والكماليات بس المشكلة زى ما كل الأعضاء المحترمين فى المنتدى ما بيقولوا هو عدم توافر قطع الغيار

**micromoud** · 24-03-2013 05:40 PM

أكيد لو فى امكانياتك شراء سيارة ألتو اتوكل على الله واشتريها ... والاهم حالة العربيه ولو حتى موديل قديم فى عربيات ماشيه بقالها 10 سنين ومتحافظ عليها وعربيات ماشيه بقالها سنتين ومتهانه

**lidosasa** · 24-03-2013 07:47 PM

نصيحة بقى من أخ ولوجه الله
لو إنت متمكن فى السواقة إنسى المستعمل خالص
لو تقدر تدفع المبلغ اللى معاك مقدمة وتقسط الباقى تبع بنك وتشترى عربية زيرو حيكون أحسن أنا عشان كنت أول مرة فى حياتى أسوق وكان معايا حوالى 26 ألف جنيه ومكنش قدامى غير التقسيط أو المستعمل فجيبت مستعمل والحمد لله إنى مجبتش زيرو لأنى بهدلت العربية خالص فى الأول وأخدت بيها خبطتين على كيفك لو كانت العربية زيرو كانوا حيزعلونى كل لما أشوفهم ولو كنت بدفع ليها أقساط كنت حتحسر أكتر وأكتر
لكن بعد تجربة المستعمل بتفتح معاك فى المصروف والصيانة . أنا فى خلال 4 شهور صارف على العربية 4 آلاف جنيه تقريباً تغيير كاوتش وجنوط وقواعد موتور وسيور العربية ورايداتير وكبس كبالن وتركيب إنذار وكتاوت وتصليح إشارات وفوانيس وتغيير فلاتر وكل يوم تلاقى حاجة جديدة عايزة صيانة ولازم تتغيير وإلا العربية حتقف منك خالص .
عامة لو حتشترى مستعمل لازم تعمل حسابك على 2000 جنيه فوق تمن العربية يكونوا معاك لزوم تسجيل العقد وتغيير زيت العربية والفلاتر والسيور .

**max100x** · 24-03-2013 08:05 PM

سيبك من الماروتي المستعمل ... يا اما تجيب ماروتي عاملة كيلو متر قليل.

معاك بعد كده الالتو زي الفل علي ما اسمع

**Amr Axel** · 24-03-2013 11:41 PM

اكون سعيد بانضمام حضرتك لنسور السوزوكي :)
نجاوب ع سؤال سؤال

1- الموديل المناسب ومدي توافق قطع الغيار للموديلات القديمة مع الموديلات الحديثة وهل هناك ضرورة لمعرفة الكيلومتر الخاص بالسيارة الذي مشيتة حيث انني سمعت انها بعد 150 الف كيلو للسيارة بتحتاج الي ماتور جديد وهل يوجد ماتور 1000cc للماروتي

طبقا للمبلغ اللي معاك فممكن تجيب حاجة 2005-2007 اولا الميزة في الماروتي قطع غيارها من قديم الازال زي مهي اللي بيتغير بس الشكل و الفوانيس و الشكل الجديد نزل من 2000 و اللي منتشرة حاليا
سيبك من موضوع الكيلومتر سهل يقلبك العداد المهم الحالة الشاسيه و البدن - الموتور و العفشة - الكهربا - اخيرا الانتريور او الشكل الداخلي لكن طبعا كل ده بيتشد لو عايز
مفيش حاجة اسمها موتور 1000 سي سي للماروتي عمرها ما نزلت بيه الا لو هتولف عليها موتور من عربية تانية زي ما بيولفوا الفتيس الاوتوماتيك من الشاريد تقريبا لكن طبعا كل ده مش صح لأن العربية زي ما تقول حاجة متجانسة مع بعضها فالموتور مناسب ليها و كمان ديه عربية مدينة يعني مش بتاعت سباقات و الـ800 هتكفيك و تخليك تسافر كمان لو عايز
موضوع الموتور و الله ده ع حسب المالك السابق لو محافظ و سواقته كويسة الموتور ممكن يدخل معاك في 200 الف و يعدي بدون مشاكل لكن لو واحد اي زيت و ارمي و رص و حرق و مفيش صيانات هيقصف عمر الموتور
لكن عامة لو عايز تغيره باستيراد اعمل حسابك في 3000-4000 ج بالفتيس و في رأيي الشخصي طالما اساس الموتور سليم و عايز نص عمرة مثلا اعمل عمرة عند واحد كويس الميزة ان قطع الماروتي رخيصة لكن الموتور الاستيراد زي البطيخة انت و نصيبك ممكن يقعد معاك سنين و ممكن ميكملش معاك كام شهر لأنه مش هتفتح و تشوف الاجزاء الداخلية و مدي تآكلها لكن لو اساس الموتور تعبان يبقي اقلب و جيب استيراد احسن
بخصوص الفتيس هو فعلا حاراته واسعة شوية عايزة تعود مش اكتر

2- اماكن قطع الغيار

منفذ بيع قطع غيار مودرن في الدقي ش المساحة قدام السعودي ماركت
ليدرز ( أ \ محمد و أ \ حمد ) في الدقي ش ايران
سوزوكي سنتر ( أ \ هاني ) التوفيقية فوق اسماك ابو غالي
اكرم حمدي ( أ \ حامد ) ش دمشق
و فيه واحد فاتح جديد في الحي العاشر اسعاره كويسة جدااااا في التيول و البوجيهات و أصلية من الشركة المصنعة للمنتج بس لسه هشوف ايه الدنيا عنده في باقي القطع

3- اماكن اصلاحها

مراكز الخدمة التابعة لمودرن
مراكز خدمة تانية زي توب جيير ( م \ محمد فضالي )
او اي ميكانيكي شاطر و فاهم هيشتغل فيها لأن الماروتي شغلها سهل و لو عايز ميكانيكي عندي ميكانيكي كويس بنتعامل معاه هنا برده

4- هل التوكيل افضل وسعرة مناسب بالنسبة للصوانعية ؟

بصراحة مش عارف الاسعار التقريبية للماروتي فمش هقدر ارد عليك في النقطة دي

5- الاهم السعر الخاص بالسيارة المستعملة
ولو عملنا مقارنها بينها وبين الالتو ؟ هل تنصحوني بشراء الالتو لو هناك زيادة في حدود 5000 فقط عن سعر الماروتي

زي مقولتلك فوق المبلغ اللي معاك يجيبلك ايه
بس ازاي فرق 5000 بينها و بين الالتو الكلام ده غير صحيح الا لو هتجيب التو قديمة قبل شكل 2008 800 سي سي و ده لا ارجحه نظرا لقلة توافر قطع الغيار عكس التو 2008-2013 قطع غيارها متوافرة برة و في التوكيل بل في التوكيل الاسعار كويسة و قريبة جداا من برة كمان و انا بجيب من هناك

اهم حاجة لازم تعمل حسابك في مبلغ للمصاريف الترخيص و المصاريف الادارية و خلافه و مبلغ حوالي 1000 ج احتياطي لصيانات وقائية لما تجيب العربية ان شاء الله و تعملنا تقرير حلو كده هنقولك ع الصيانات ديه ان شاء الله

و اي استفسار يا باشا اتفضل