فين تجارب ملاك الـ c4 الشكل الاخير !!!!

صحيح ليه مفيش ناس كاتبة تجربتها مع الـ C4 الشكل الاخير ؟!!
ان شاء الله هشترى واحدة الشهر الجاى .. اخدت القرار دة بعد عوتى بالامس من اوتو سمير ريان ... صدمت ان الالنترا الشكل الجديد بـ 165 و يدوبك فيها ABS و اتنين Air Bags و الريو الهاتش باك خليجى بـ 145 حتى الاسترا الانجوى بقت بـ 173 !!!!!
رحت راجع من عنده على عز العرب العجوزة علطول و اخدت مواصفات العربية .. ابسط حاجة هقولها فيها ABS , EBD , EBA , ESP and 6 Air Bags غير باقى الاوبشنز اللى مش موجودة غير في عربيات فوق الـ 180 و طبعا خامات الصالون اللى تضرب الكورى بالنار !!
في حاجة سألت عليها ان سعر العربية زى ما هو من ساعة ما العربية نزلت اللى هوا 168 من غير ما يتأثر بسعر الدولار لأن انا توقعت لما قالو السعر دة ان دى تكون الفئة اللى كانت نازلة بـ 148 و زادت لـ 168 مع ارتفاع الدولار .. بصراحة دى كانت ملحوظة غريبة في صالح الوكيل !
باقى المواصفات في الصورة .
اتمنى ملاك السيارة يحكوا تجربتهم مع الموديل دة .

http://farm9.staticflickr.com/8384/8...a0f0d27d_o.jpg

والله مش بطالة وشكلها حلو مع تحفظى على شكلها من ورا مش عاجبنى اوى أو الفوانيس بمعنى أصح

وكفاية انك راكب حاجة أوروبى وأمان عالى والسعر مش بطال مقارنة بالباقى

طب ياباشا هيا فئة واحدة ولا ايه؟ولو هما كذا فئة ايه الفرق بينهم؟

وعايزينك تكلمنا عنها شوية بما انك شوفتها على الطبيعة :))

اللينك ده فيه شوية صور ليها للى عايز يتفرج :)

http://www.netcarshow.com/citroen/2011-c4/


http://img2.netcarshow.com/Citroen-C...llpaper_02.jpg

http://img2.netcarshow.com/Citroen-C...llpaper_19.jpg

http://img2.netcarshow.com/Citroen-C...llpaper_2f.jpg


:))))

أولا بالنسبة لتجارب الملاك :

مفيش حد معاه العربية على المنتدى

ثانيا : العربية سعرها غلي 4 الاف
كانت بـ 165 الاول

وكان فيه فئة بـ 148 بس دي بطلوا يجيبوها عشان الناس كلها بتجيب الفئة الأعلى

ثالثا : عاوز الفت نظرك لحاجة

رقم التسارع في الصورة ده مش سليم
المفروض 12.5 (أنا عارف إن ده ال brochure)

على فكرة العربية شكلها على الحقيقة اشيك كتير من الصور و اى حد شافها على الحقيقة هيأكد كلامى

و بصراحة بعد ارتفاع الاسعار بقى سعرها منافس جدا خصوصا انها تصنيع و تقفيل فرنساوى 100%

ايه الكماليات اللي جوا العربية ؟

اولا بعتذر للاستاذ احمد عادل علي عدم حضوري للمقابلة اللي فاتت بالرغم من تاكيدي للحضور بسبب حالة وفاه ارجو تقبل اعتذاري .
ثانيا بالنسبة للسي 4 الشكل الاخير للاسف ظهر معايا عيب رجرجة اثناء الفرامل ودي مشكلة عامة في الشكل الجديد للاسف وتم حل المشكلة بتغيير طنابير جديدة داخل الضمان طبعا وبدون اي مشاكل بصراحة ناس محترمين جدا فالتعامل عز العرب الصحراوي بالنسبة لاداء العربية انا راضي عنه بنسبة 90% ثبات ممتاز مع السرعات العالية فرامل فوق الممتازة مع السرعات العالية . يعيب السيارة بعض الاشياء اهمها :
1-العزل جيد وليس ممتاز سماع صوت الهواء والمحرك بعد سرعة 100 تقريبا.
2-التسارع بطئ شوية .
3-السرعة القصوى 203 دي اقصى سرعة وصلتلها.
4- الخامات المستخدمة في المقصورة ليست بكفاءة عالية تسمع صوت طقطقة خفيفة اثناء المطبات وده شئ معتاد من ستروين في جميع موديلاتها.
5- استهلاك البنزين جيد ولكن ليس كالموديلات السابقة ازيد شوية.
6-المفروض انها كانت تنزل باضاءة زينون نظرا لانها اعلي فئة.

من العيوب اللى حضرتك ذكرتها هل يوجد عربية اخرى احسن منها في نفس الفئة السعرية ( الميجان هاتشباك الفئة التانية بنفس السعر على كونتاكت كارز ) ؟ ام ان العيوب دى مش كبيرة قوى ... معلش انا بسأل كتير عشان انا مش خبير في السيارات ..

اقتباس:

---

المشاركة الأصلية كتبت بواسطة rotab3d

من العيوب اللى حضرتك ذكرتها هل يوجد عربية اخرى احسن منها في نفس الفئة السعرية ( الميجان هاتشباك الفئة التانية بنفس السعر على كونتاكت كارز ) ؟ ام ان العيوب دى مش كبيرة قوى ... معلش انا بسأل كتير عشان انا مش خبير في السيارات ..

---

من وجهة نظري العيوب المذكورة لا تمثل شئ كبير بجانب المميزات اللي حضرتك هتكتسبها من السيارة

اخر سؤال و انا اسف على الاطالة ... هل يمكن مقارنة السى 4 بالتويوتا كرولا ؟ نفس السعر تقريبا .

انا بس كل قلقى من الاوروبى هو اداؤه في عز حرارة الصيف مع تشغيل التكييف ؟!! الموضوع دة عامل ايه مع حضرتك في السى 4 ؟!

معرفش ليه البوست بتاع السى 5 دة شكله متفبرك و معمول مخصوص عشان الدعاية..
الموضوع هنا عن تجارب ملاك السى 4... و بعدين حضرتك كاتب بتقول شاريها من شهرين... و مكلفتش نفسك تعمل تقرير عنها و تفيد المنتدى.. بس ما استخسرتش تعمل حساب جديد مخصوص النهاردة الصبح عشان تكلمنا عن السى 5 و الاستاذ فريد شوقى فى موضوع ملوش علاقة اساسا بالسى 4 :)
عموما اشكرك على مشاركتك..

اقتباس:

---

المشاركة الأصلية كتبت بواسطة Rotab3D

معرفش ليه البوست بتاع السى 5 دة شكله متفبرك و معمول مخصوص عشان الدعاية..

---

+1

اقتباس:

---

المشاركة الأصلية كتبت بواسطة Rotab3D

اخر سؤال و انا اسف على الاطالة ... هل يمكن مقارنة السى 4 بالتويوتا كرولا ؟ نفس السعر تقريبا .

---

هي دي sedan و دي HB
بس ممكن ليه لأ

بإختصار كده

ال corrolla أحسن كانتشار و اعادة بيع و اعتمادية و وسع عشان sedan
بس شكلها خلاص هيتغير

ال C4 أحسن ك options و عوامل أمان و خامات و ثبات
بس اضعف كاعادة بيع بذات أول 3 سنين

اقتباس:

---

المشاركة الأصلية كتبت بواسطة Rotab3D

انا بس كل قلقى من الاوروبى هو اداؤه في عز حرارة الصيف مع تشغيل التكييف ؟!! الموضوع دة عامل ايه مع حضرتك في السى 4 ؟!

---

أنا ممكن اكلمك عن تكييف الشكل القديم
هو أحسن من تكييف ال megane ll بس مش زي الياباني

لحد 30 درجة مئوية , ممتاز
من 35-30 , جيد جدا
من 40-35 , جيد

بالنسبة ليَّ ,أنا شايفه مناسب جدا
وميزة التكييف في ال c4 إنه مش بيخنق العربية

شكرا على الرد استاذ احمد .. انت طمنتنى فى موضوع التكييف.

هو ياجماعة البوست بتاعى رقم 2 فين؟؟

انا مش شايفه :)))) والتوقيع بتاعى كمان بقه فى اول الموضوع؟؟؟!!!!!!!!!!!!1

حاجة غريبة !!!!!!!!!!

أنا جربت كذا متصفح ونفس النتيجة ؟؟؟ده عندى انا بس ولا ايه؟؟؟

ممكن تبعت البوست تانى :)

هو انا كنت حاطط صور للعربية ولينك لموقع فيه صور ليها

وكنت كاتب انها كويسة وسعرها معقول

طب هو مفيش عندك بوست رقم 2؟؟؟ ليا !!!!!

ايه اخبار اسعار قطع الغيار الاصلية بالمقارنة مثلا بتوكيل زى الكيا و الهيونداى ؟
واحد صاحبى كان هناك فى ابو رواش معرفش ليه مندوب المبيعات هناك حذره ان قطع الغيار غالية جدا !؟!

اقتباس:

---

المشاركة الأصلية كتبت بواسطة Rotab3D

ايه اخبار اسعار قطع الغيار الاصلية بالمقارنة مثلا بتوكيل زى الكيا و الهيونداى ؟
واحد صاحبى كان هناك فى ابو رواش معرفش ليه مندوب المبيعات هناك حذره ان قطع الغيار غالية جدا !؟!

---

قطع الغيار الأصلية من التوكيل بالنسبة للكورى مقاربة جداً للأوروبى و اليابانى ، الفكرة فى الكورى هى توافر البدائل و المضروب بكثرة و زيادة الطلب عموماً نظراً لانتشار السيارة فا تجار قطع الغيار مش هيعرفوا يستغلوا الموقف زى فى الأوروبى و اليابانى الغالى و الماليزى كمان...
شوف اللنك دا http://www.nilemotors.net/Nile/345362-rb.html

عموماً أنا فى بعض قطع الغيار الأصلية لسة سائل على سعرها فى أمير و جوزيف بالنسبة للسى 4 زى التيل الخلفى و قواعد الموتور و سير المجموعة و التكلفة الكلية لصيانة ال90000 فى عز العرب و أمير جوزيف

اقتباس:

---

المشاركة الأصلية كتبت بواسطة Rotab3D

ايه اخبار اسعار قطع الغيار الاصلية بالمقارنة مثلا بتوكيل زى الكيا و الهيونداى ؟
واحد صاحبى كان هناك فى ابو رواش معرفش ليه مندوب المبيعات هناك حذره ان قطع الغيار غالية جدا !؟!

---

صعب تلاقي حاجتها بره آه أنا معاك
بس اسعار قطع الغيار في التوكيل ارخص من الكوري والياباني

بص حضرتك كده على اسعار قطع غيار ال qashqai وال sunny الجديدة
هتلاقيها في قسم nissan

و برده بص على موضوع ال RB اللي hamaka جابهولك
هم بس عندهم تجار كتير بره بيبيعوا ارخص و كمان في مضروب كتير

بس لو هتكمل في الضمان و هتعمل الصيانة في التوكيل
هتلاقي أي ماركة اوروبي بقت ارخص

ده طبعا بدون مقارنة فرق قطع الغيار ال valeo و bosch
من mando الكوري

اقتباس:

---

المشاركة الأصلية كتبت بواسطة hamaka

عموماً أنا فى بعض قطع الغيار الأصلية لسة سائل على سعرها فى أمير و جوزيف بالنسبة للسى 4 زى التيل الخلفى و قواعد الموتور و سير المجموعة و التكلفة الكلية لصيانة ال90000 فى عز العرب و أمير جوزيف

---

على فكرة :)

امير و جوزيف ده غالي كمان مش رخيص

شكرا على المشاركة

أدى موضوع عن قطع غيار التيدا (زى الصنى الجديدة عشان مالقيتلهاش موضوع خاص بيها ، شكلهم لسة مجابوش كل أسعارها)
http://www.nilemotors.net/Nile/155219-2010.html
و أدى القشقاى http://www.nilemotors.net/Nile/284394-a.html
و دا بتاع الهوندا سيتى متصور من توكيل هوندا http://www.nilemotors.net/Nile/338743-1000-2012-a.html

بالنسبة بقى للأسعار اللى أنا عرفتها للسيتروين سى 4 ، صيانة ال90000 تكلفتها فى أمير و جوزيف 1400 شامل المصنعيات بيتغير فيها الفلاتر كلها بما فيها فلتر التكييف و الزيت 15000 كيلو مع فحص باقى الحاجات المعتادة فى الصيانة..
تيل الفرامل الخلفى فى قالولى فى نوعين : بسوستة و دا ب 350 و بزومبة (اسم عجيب جداً) ب 450 حسب اللى راكب عندك ، سير المجموعة ب 150 ، قاعدة الموتور فى تلات حاجات ، أكبر واحدة اللى على الشمال عند الكاتينة ب 850 (دى فى السيفيك بتاعة واحد صحبى من التوكيل ب 1100) و التانية اللى هى بتاعة الفتيس دى ب 250 و فى جلبة دى ب 150 ،و كل دى قطع الغيار الأصلية الفرنساوى بتاعة العربية ، دى الأسعار اللى عرفتها امبارح من أمير و جوزيف