تجربتي مع الفيرنا

**mr_bambino_dent** · 07-08-2008 06:00 AM

باختصار هقولكوا علي تجربتي مع الفيرنا

أنا جبت فيرنا سنة 2004 . . . 1600 أوتوماتيك كاملة ب 87000

مشيت معايا 130000 لحد دلوقتي

العربية جابت فتيس و خرب بيتي تصليح

بقالها أكتر من سنة بتسخن و معرفولهاش حل لحد ما جابت وش سلندر بعد ما صرفت الاف الجنيهات علي مشكلة الحرارة
و طبعا وش سلندر سحب مبلغ تاني

بتيجي فيها أصوات غريبة و مالهاش حل جذري

صوت العربية دلوقتي قريب من صوت الموتوسيكل الصيني الردئ منه كمان

التوكيل عصابة كبيرة همها الأول تلم فلوس مش تخدم العميل بأي شكل من الأشكال
و طول مانتا في الضمان يقولك كل حاجة كويسة حتي لو اشتكيت من حاجة يشتغلك عشان تمشي من قدامه بدون ما يصرفوا حاجة تبع الضمان و مدربين علي الموضوع دة 100 /100
بعد ما الضمان يخلص يطلعلك القطط الفطسانة في العربية عشان يخرب بيتك و يدفعك أكبر كم من الفلوس

الضمان خلص بدون ما يفيدوني بحاجة ذات قيمة ( بصراحة غيرولي الكلاكس مرة ) و رجع عطل تاني و اشتريت واحد من برة التوكيل

طبعا أنا ببيع العربية دلوقتي و مش طايق أشوف شكلها
و أنضح أي حد بيفكر في فيرنا انه ما يشتريهاش

شكرا

**blazer** · 07-08-2008 06:16 AM

انا اكتأبت

**mohamed_mohsen** · 09-08-2008 05:45 PM

المشاركة الأصلية كتبت بواسطة blazer

انا اكتأبت

و أنا كمان و الله

**limo** · 09-08-2008 06:05 PM

ملعش الفرنا فى الاول والاخر عربيه كورى فى الاول بتبقى كويسه جدا وبعد ما تعدى ال 90 او 100 الف تبداء تفتح بوقها
وبعدين 130 الف كتير برضو
حاول تستحملها على كده او تبعها وتجيب حاجه جديده
بس انا عايز اعرف انت عملت ايه مع الفتيس الاتومايتك وكلفك اد ايه

**Hacker5** · 09-08-2008 07:38 PM

بدون تعصب من اسوأ السيارات التى قمت بتجربتها :(

**mr_bambino_dent** · 10-08-2008 05:27 AM

المشاركة الأصلية كتبت بواسطة limo

ملعش الفرنا فى الاول والاخر عربيه كورى فى الاول بتبقى كويسه جدا وبعد ما تعدى ال 90 او 100 الف تبداء تفتح بوقها
وبعدين 130 الف كتير برضو
حاول تستحملها على كده او تبعها وتجيب حاجه جديده
بس انا عايز اعرف انت عملت ايه مع الفتيس الاتومايتك وكلفك اد ايه

يا باشا انا فعلا عارضها للبيع خلاص
أنا بقيت أخاف أسافر بيها مشوار زي الساحل الشمالي

و بالنسبة للفتيس صرف كتير و برضه بيعلق كتير و تلاقي العربية سقطت الغيار علي الأول و ما تنقلش
و بعد فترة ممكن تنقل و الفترة دي مش محددة
عموما هي كانت حلوة في الأول بس نهايتها زي الزفت
دة غير اني غيرت لها مارش و أغلب الخراطيم بتاعت الموتور
و قاعدة فتيس و علي وشك تغيير راديتير
و كفاية عليكو كدة عشان اللي لسة شاري العربية ما يولعش فيها

**medo_msmsa** · 10-08-2008 01:03 PM

Limo
مش كل الكوري بعد 100 الف كيلو بتفتح بقها انا كان معايا لانوس وفضلت معايا لحد 160 ألف وعادي جدا وعمري ما الفتيس حصله حاجة ولا الماتور اشتكى كل اللي كنت بغيره الصيانات العادية وتظبيات العفشة
على فكرة معظم اللي معاه الفرنا بيبقى فرحان بيها جدا اول لما يشتريها لان تجميعها وهي جديدة احسن من المنافس التقليدي ليها اللي هي الانوس اما مع الوقت بريق الفرنا بيقل وبتظهر عيوب غريبة
ربنا يبارك ليكو في عربياتكو ومتعملش معاك دقات ناقص

**limo** · 10-08-2008 03:28 PM

المشاركة الأصلية كتبت بواسطة medo_msmsa

Limo
مش كل الكوري بعد 100 الف كيلو بتفتح بقها انا كان معايا لانوس وفضلت معايا لحد 160 ألف وعادي جدا وعمري ما الفتيس حصله حاجة ولا الماتور اشتكى كل اللي كنت بغيره الصيانات العادية وتظبيات العفشة
على فكرة معظم اللي معاه الفرنا بيبقى فرحان بيها جدا اول لما يشتريها لان تجميعها وهي جديدة احسن من المنافس التقليدي ليها اللي هي الانوس اما مع الوقت بريق الفرنا بيقل وبتظهر عيوب غريبة
ربنا يبارك ليكو في عربياتكو ومتعملش معاك دقات ناقص

انا برضو كان معايا لانوس اتوماتيك والفتيس ابتدى يهبل على 95 الف كم بس كان شغال ودع غير طلبات العربيه الكتيره بعد ال 80 الف كم
وصاحبى معاه كيا سفيا والفتيس برضو ابتدى يهبل على 120 الف كم
+طلبات العربيه الى ابتدت تكثر
انا بتكلم عن ظروف التشغيل العاديه
يعنى طريقى كله جوه البلد فى حتت زحمه وممكن امشى بيها على الدائرى والمحور كل فين وفين وسفر كل سنه مره

**medo_msmsa** · 10-08-2008 04:17 PM

Limo
شكرا لردك وانا اقصد ان اعطال الانوس اقل من الفرنا ومشاكلها بتتحل بسرعة وسهولة وقطع غيارها موجود بكترة ، في واحد بيسأل على سعر الفتيس الاتو للانوس في قسم الدايو معظم الردود بتقول ان سعره من 1000-1500 وده سعر ممتاز جدا ورخيص لو حتى هتغير فتيس كل 100 ألف