الموضوع: من أعلي نقطة على الهرم الاكبر ..!

المشاركة الأصلية كتبت بواسطة mahora

يا سيدى متبقاش حنبلى اوى كده. . . ما هو لما يبقى عندك اللى بيقولك نغطيها بالشمع يبقى لو سبناها لقطر يبقى فل اوى :-) بس عندك حق فى موضوع العقد و الشروط اللى هتخرب بيتنا لو فكرنا نفسخ العقد و الكلام ده لان الحداية مش بتحدف كتاكيت و برضه عندك حق فى موضوع اليهود ده بل انه ممكن يكون هو التفسير الحقيقى لاهتمام قطر بالاثار اللى ملهاش اى اهتمامات ثقافية. . . لان ده حلم اليهود من زمان انهم يرجعوا يسيطروا على اللى بنوه اجدادهم. . . مش مناحم بيجين قالها للسادات قدام الهرم لما قاله ده بناه اجدادى. . . اجداده اللى جم مصر بعد بناء الهرم بألف سنة. . . بس نعمل ايه فى التضليل. . . فكرتنى مرة من زمان كنت فى المتحف المصرى و امام النموذج طبق الاصل لحجر رشيد لقيت اتنين بيتكلموا عن ان الكتابة اللى على الحجر ده كتابة عبرية!!!! بصراحة مستحملتش و روحت متدخل بطريقة مهذبة و قلتله سؤال بسيط. . . قلتله هل حد فيكم يعرف عبرى؟ قالوا لأ. . .قلتلهم اومال عرفتوا ازاى ان الكتابة عبرية ؟ قالوا قرأنا كده!!!! روحت منتهز الفرصة و حكيتلهم اصل و فصل حجر رشيد و كمان انواع الكتابات عليه و بالمرة طريقة فك رموز حجر رشيد و اكتشاف طريقة قراءة اللغة المصرية القديمة. . . ما كانوش مصدقين. . . قلتلهم ارجعوا لكتب علمية محترمة عن مصر و انتو تتأكدوا من كل المعلومات اللى قلتهالكم. . . مش مجرد كتب سريعة و ادلة سياحية معلوماتها قد تكون مغلوطة. . .

بخصوص موارد قطر. . . عملت بحث سريع عن دخلهم من البترول و الغاز لقيت شوية ارقام لوز. . . و متنساش انه لو مساحتها الفعلية زى شبرا الا ان المياه الاقليمية اللى بمئات الاميال حولها من كل جانب تخلى مساحتها تبقى زى مساحة اكتوبر :-) و اسيبك مع الارقام:
qatar’s gas income exceeds oil revenue - emirates 24/7

قطر زي ماحضرتك عارف عبارة عن شبة جزيرة وهما بيطلقو عليها الجزيرة وقريبة جدا من دول تانيه زي البحرين والسعوديه والامارات وبالتالى أكيد المياة الاقليميه مش هتكون بالمساحات الطبيعيه الكبيرة لانهم لزقين فيها من تحت والشمال واليمين فوق بس هو الى واسع وممكن تاخد مساحات طبيعيه من المياه الاقليميه بس المشكله ان فوق دي مشتركه مع ايران :)

التقرير بتاع حضرتك بيأكد كلامنا
الجزء السفلي منه بيوضح العقليه الاقتصادية الفذة والنمو الغير عادي للاقتصاد القطري ( الحكومه القطريه الى مش بنسمع عنها حاجات هايفه ابدا انهم بعتو عربيه يتعملها صيانه فى اوروبا على طيارة مخصوص ولا اشترو أغلى قارب فى العالم ولا اشترو جزء كبير من عقار بكام مليون استرليني فى اغلى عقارات لندن مش بنسمع ابدا انهم مهبولين على الدنيا عشان هما مركزين فى اقتصاد بلدهم بس وشغالين يا عيني ليل نهار ) مهو يا اما كده يا اما فى فريق اداري غير ظاهر هو الي بيدير الشئون الاقتصادية لقطر

والجزء العلوي بيقول ان صادرات قطر من الغاز 25 مليار دولار وان دول ضعف صادراتها من البترول الزيت معنى كده ان اجمالى صادرات قطر 25+12.5 = 37.5 مليار دولار فى السنه
هنا فى سؤال الـ 37.5 دول نصيب قطر لوحدها ولا ثمن المصدر بالكامل ؟ لان معروف ان الدوله " فى افضل التعاقدات " بيكون ليها 51% فقط من المستخرج والباقى بيكون للشركه الاجنبيه الى نقبت واستخرجت
وعلى افتراض ان 37 مليار بالكامل ليها فيعتبر رقم متواضع جدا بالنسبة للى بنسمعه عن قطر انها عماله تشتري هنا وتشتري هنا بالمليارات منين الفلوس دي كلها وهيا لا عندها لا تجارة ولا سياحه ولا صناعه ولا زراعه
يبقى بتجيب منين المليارات دي كلها الا لو كان معاها شركاء من المستثمرين اياهم ( حلوه كلمه مستثمرين اياهم دي )

بخصوص استهبال اليهود (اياهم) وادعائهم انهم الى بنو الاهرام للاسف فى مصريين كتير بتسمعهم بيرددو : " ايوه يا عم مش الفرعنه كانوا بيستعبدو اليهود يبقى اكيد خلوهم هما الي بنو الاهرام امال الفراعنه هما الى كانو هيشتغلو بأديهم يعني والعبيد والخدم اليهود موجودين " عشان تقعد تفهمه ان الاهرامات كانت موجوده قبل ألف سنه من دخول سيدنا يوسف مصر وبعد كده دخل والده سيدنا يعقوب واولاده الـ 11 التانين الى هما اصل اليهود
وان الاهرامات كانت موجوده حتى من قبل ميلاد سيدنا يعقوب عليه السلام
لكن دي عادة اليهود ديما انهم ينسبو اى حاجه ليهم لكن نرجع ونقول ديما ان العيب مش عليهم العيب علينا احنا لان احنا الى بنديهم الفرصه لكده

عارف النكته بتاعة الكروان الى كان واقف يغرد على فرع شجره وعدى عليه امريكي ومصري وياباني وصيني وايطالي والماني وفرنسي وهندي ويهودي وخليجي وكل واحد فيهم كان ليه رد فعل مختلف تجاه الكروان برغم انها نكته بس فيها جزء كبير من الواقع

بخصوص عقد الانتفاع بالاثار هتلاقى فيه بنود " تذل " مصر
- مثلا : التزام الدولة المصريه بتهيئة المناخ الامني للسياحه
يجي شوية اعتصامات او شوية حوادث يقولك انت مهيأتليش المناخ الامني وخسرتني ادفع بقى قيمة الشرط ويروح خاصم كام مليار
- هيكون اكيد فى العقد بند يسمحلهم بكتير من الامتيازات والصلاحيات الى هتكون عبء علينا ووسيلة ضغط ليهم
- هيحددو هما رسوم دخول الاماكن السياحيه وهيرفعو التذاكر جدا عشان يمنعو المصرين من دخولها بطريقه غير مباشرة وطبعا الافواج السياحيه الى جايا من بره هيكون ليهم اسعار خاصه اقل من تذكرة دخول صاحب البلد "صاحب الحضارة"
- هتكون مناطق الاثار غير خاضعه للرقابه عشان يسهل عليهم يزورو فى التاريخ براحتهم وكمان يحفروا ويسرقو ويهربوا ويبيعوا براحتهم خصوصا ان اغلب التماثيل المتوسطه والصغيرة يقال انها لم تكتشف بعد
يعنى خسارة من كل ناحية وزي ما حضرتك قولت " الحدايه مش بتحدفش كتاكيت "
وحتى الكام مليار الى قطر قرفانا بيهم عباره عن وديعه "بفائدة" وجزء صغير عبارة عن منحة قيمته نفس قيمة الفائده على الوديعه يعني قطر ماسبتلناش مليم جدعنه

وآسف على الاطالة