نصيحة في شراء كاوتش جديد و مساعدين جداد منين و بكام؟

السلام عليكم أحبتي في نيل موتورز، اتمنى أن تكون جميعاً بخير. أنا عاوز أغير الكاوتش اليومين دول للانوس بتاعتي هو هانكوك كوري إلي راكب دلوقتي و عامل 58,000 كم و عارف اني متأخر في التغيير ... المهم أنا ساكن في 6 أكتوبر رحت فيت اند فكس عندنا هناك و قلي في بريدجستون b250 ب-530 جنيه و فيرستون tz700 ب-360 جنيه تايلاندي و بيقولي هو نفس مصنع bridgetone أو تحت اشرافه.... السؤال هنا في حد عند ال-b250 بسعر أرخص؟ أو في نوع كاوتش مشهور تاني و بسعر كويس؟ أنا عند واحد صاحبي قال ليه قريب هو وكيل أو مستورد لإطارات هانكوك - الهانكوك بصراحة محترم بس ناشف و مزعج شويتين... و أنا عند شواية مشاكل كدة في ضهري و عاوز طراوة كويسة في الكاوتش و كفاية صداع! تنصحوني بأيه يا قوم؟ و لو ممكن كمان أغير المساعدين سمعت إن منرو محترم أجيبه منين و بكام؟ و لو فيه نوع مريح تاني يا ترى اه هو و أجيبه منين و بكام؟ معلش طولت عليكم لكن ربنا يطرح البركة فيكم - أخوكم أحمد سامي

أشهد أن لا إله إلى الله و أن محمد رسول الله...

عفواً إلا

متابع

هو انا مش عارف مقاس الجنط بتاعك كام بس هو لو من ١٤ ال ١٧ ارشحلك البريجستون turanza GR90 . الفرده كأنها فيها كاتم للصوت و مريحه في المطبات و خاماتها محترمه جدا .

مقاس الجنط يا فندم هو الاوريجينال بتاع المصنع مقاس 13 - و شكراً لإهتمام حضرتك بالرد يا أستاذ land cruiser.

انا شاريهم من شهر كان ب 425 مش عارف غليو اوى كدة لية
مقاس 13/70/175 بريدجستون تايلاندى b250

بس طرى ومريح صراحة

فى كمان تويو يابانى او جوديير او ميشلان

المقاس 13/70/175 - و عوز أبيع الاستبن الجوديير إلي تقريباً زيرو عشان مينشفش و 3 كاوتش مستعمل و أجيب أنضف وحدة مستعمل و أخليها استبن... و يا ترى سعر الكاوتش بتاعي في الحالة دي يتراوح ما بين كام و كام؟ مع الشكر

متااابع باهتمام

أيوا يا قوم ايش الكلام؟ أحسن كاوتش جيد إيه و بكام و عند مين؟ و المساعدين نفس الوضع؟

باركولي يا قوم أنا أخيراً ربنا أكرمني و جبت طقم كاوتش بريدجستون b250 ب-370 جنيه للفردة الواحدة صناعة تايلاندي - إجمالي الحساب 1480 جنيه و أخد القديم قال فيه 2 ميتين و اتنين نص نص و دفعت الصافي 1400 جنيه مكان الشراء للافاده شركة الايمان أولاد بيومي قرب ميدان الدقي تاريخ الانتاج الاسبوع ال-35 أو 39 مش فاكر من سنة 2012 - إدعولي بالبركة و ربنا يستر طريقي و طريقكم, أخوكم أحمد سامي

آه نسيت... بالنسبة لطاقم المساعدين إيه النوع المحترم و بكام و منين و ربنا ما يحرمنيش من مشاركتكم.

الف مبروك كدة السعر معقول اومال اية 530 الى كنت قايلها دى

الله يبارك في عمرك، لو حضرتك تراجع كتابتي في الاول تلاقي إن السعر دة من عند محل فيت & فكس في 6 أكتوبر و بصراحة إتصدمت من الرقم و مش عارف تفسير فرق السعر ده جي منين بظبط؟

اولا الف مبرووك عالكاوتش
ثانيا بالنسبه للمساعدين ... انا ارشحلك kyb ياباني عن تجربه و كانو عاملين من 7 شهور تقريبا 370 جنيه الامامي
تحياتي

شكراً يا جماعة للرد و المباركة، بس أنا يا أستاذ حسانين سمعت كتير إن ال-kyb معظم دلوقتي مضروب.... و سمعت المنرو هو الافضل حالياً؟ ده صحيح طب أجيب الحاجة الاوريجنال منين؟ و بكام؟ مع الشكر أحمد سامي

فقط للعلم أنا كلمت غبور إلي هو توكيل منرو للمساعدين من حوالي 10 أيام و قال الجوز الامامي ب-450 جنيه و الجوز الخلفي ب-380 لكن الخلفي ناقص شوية يمن فاضل أسبوع أو 10 تيم و كونتينر جديد يوصل.