الموضوع: بلاك لست فى البنك المركزى( ممكن حد يفيدنى)

انا مشكلتي تتلخص في اني اخدت قرض 10الاف جنيه استلمتهم 9500 مش فاهم ازاي والمفاجأة بقي اني سددته تقريباً 20 الف يعني الضعف "ههههههه عبط صح!!!!! للأسف ده اللي حصل"
وكمان كنت واخد كرديديت وبرده ضافوا عليا مديونية رغم اني كنت موقف التعامل بيها نهائياً

وطبعاً الموضوع اخد بيني وبينهم سنين كتير وقضية انتهت اني سددت باقي المبلغ اللي فرضوه عليا وهو مبلغ 3900 جنيه للفيزا و400 جنيه مديونية الكريديت "وده كان الاتفاق مع موظف ادارة التحصيل واسمه وليد كمال "حسبي الله ونعم الوكيل فيه"

بعد ما اتفقنا وروحت دفعت وبعتله صور الايداعات لحساب القرض والكريديت زي ما اتفقنا وكنت مأكد عليه وكلمته وانا مع موظف البنك وقاله خلاص القرض هيتقفل بمجرد انه يعمل الايداع وبعد ما عملت الايداعات خليته يكلمه ويبعتله اميل فيه صور من الايداعات

بكلمه بعدها بيومين علشان يبعتلي ورقي "الشيكات والمخالصة النهائية"زي ما اتفقنا قالي لا السيستم ضاف عليك 400 جنيه كمان قولتله ازاي احنا اتفقنا وانت وعدتني ان القرض خلاص اتقفل وهتبعتلي ورقي قالي السيستم وانا مقدرش اعملك حاجه ولازم تدفع 400 جنيه..وسلمت امر لله وروحت عملت ايداع ب 400 جنيه تاني وكلمته وانا باعمل الايداع برده وقولتله هبعتلك صورة الايداع علي الميل عن طريق موظف في الفرع وقالي خلاص خلاص كده تمام انا هقفلك القرض انهارده وهبعتلك الورق علي فرع البنك بتاعك خلال اسبوعين..كان ميعاد جلسة القضية في المحكمة قرب قولتله اسبوعين كتير ابعتلي مخالصة قضائية..قالي خلال يومين تكون عندك وفعلا بعدها بيومين اخدت المخالصة وروحت بيها للمحكمة وكان فيه مندوب من البنك في المحكمة لانهاء القضية بالتصالح والمخالصة و القضية اتقفلت

تخيلوا اتصل بعدها بشهرين اقولهم باستفسر هل ورقي "الشيكات والمخالصة النهائية"وصل للفرع واللا لسه قالولي القرض لسه مفتوح وعليك مديونية 900 جنيه بصراحة اتوهمت من الصدمة اقولها ازاي انا قافل القرض مع موظف التحصيل واخدت مخالصه منكم وخلصت القضية بتاعتي تقولي حضرتك انا بقولك اللي موجود قدامي في حسابك قولتلها غلط
قالتلي كلم الموظف اللي اتفقت معاه وانا هعملك شكوي وهيردوا عليك خلال يومين
روحت كلمت وليد كمال تاني"وطبعاً لازم افكره بنفسي رغم اني كلمته اكتر من 50 مره وكل مره كنت بشرحله فيها مشكلتي وكنت باتفق معاه علي اجراءات لكن طبعاً هو ولا بيفتكر وبيقولي ازاي انا هقفلك القرض وانت لسه عليك مديونية قولتله طيب وانت ازاي هتبعتلي مخالصه قضائية وانا لسه عليا مديونية خليني انا مجنون وانت عاقل المهم قولتله...انتم بتسجلوا المكالمات اللي بينا صح قولتله راجع المحادثات بينا في التاريخ اللي انا سددت فيه..تمام وقفل معايا واتفقنا انه هيراجع المكالمات ويرد عليا

وبعد يومين كلمته انا طبعاً وقالي معلش انا اسف فعلاًاحنا اتفقنا وعملنا ديل وانا نسيت ومقفلتش القرض...عامةً انا هقفلهولك بعد ما ارجع من الاجازه قولت ماشي مش فارقه اسبوع كمان

كلمته بعد مالبيه رجع من اجازته قالي خليك معايا وهقفلهولك حالاً وعلي كلامه انه قفله خلاص وانا معاه علي التليفون

قالي كلم بقي خدمة العملا بعد يومين اطلب ورقك وشيكات والمخالصه النهائية قولت ماشي

بعد يومين اكلمهم لقيت نفس المشكله القرض لسه مفتوح والمديونيةزادت وبقيت 1200 جنيه "حسبي الله ونعم الوكيل"

اعمل ايه مفيش في ايدي حاجه اعملها وبكلمه مبيردش كل يوم اكلمه مبيردش

وطبعاًاتصل بخدمة العملا مره واتنين وتلاته وكل مره اخد نص ساعه اشرح لشخص جديد مشكلتي واني قفلت القرض ازاي هو لسه مفتوح وليه ؟يقولي السيستم قدامي وهعمل لحضرتك شكوي

وكل مره نفس الكلام من شخص مختلف

وبعد شهر تقريباً كلمت وليد قولتله يا اخي انت مش قفلت القرض قالي قرض ايه وبرده اضطريت احكيله القصه تاني للمره المليون.

تخيلوا قالي ايه

قالي انا سبت بنك باركليز وحالياً شغال في البنك الاهلي المتحد
قولتله طيب ايه الحل قالي انا قفلتك القرض طالما انا قولتلك اني قفلته يبقي قفلته وكلمهم علشان يبعتولك ورقك

ومن ساعتها انا يأست ومش عارف اعمل ايه ومش عارف اعمل كريديت في اي بنك علشان انا بلاك ليست رغم اني معايا مخالصة ومسدد القرض والله العظيم مسدد القرض كله وبزيادة الضعف"وحسبي الله ونعم الوكيل- ربنا علي كل ظالم وجبروت

انصحوني يا أهل الخبرة

واسف جداً جداًَ علي الاطالة

انا صيدلي اعمل في شركة ادويه , و في شهر 10/2012 حضر لمقر الشركه مندوب من بنك باركليز و اقنعني بعمل بطاقة إئتمان و انها في حالة عدم استخدامها لمدة 6 اشهر تصبح منتهيه و بالفعل عملتها و لم استخدمها و في شهر يناير 2014 فوجئت بالبنك يتصل بي و يخبرني بان يجب على دفع 485 جنيه لان الكارت جدد تلقائيا في 10/2013 و من ثم يجب دفع مصاريف الكارت و غرامات تأخير و بعد مفاوضات كثيره توصلت لتسويه و هي دفع 185 جنيه مصاريف الكارت فقط و لكن رفضوا اغلاق الكارت حتى يوم 30/9/2014 , و الان معي كشف حساب يثبت ان ليس على مبالغ و لكن فوجئت بنزولي بلاك ليست في البنك المركزي , فماذا افعل ؟