هل التوجه السياسى ممكن يكون عائق لأختيار الزوجة ؟

السلام عليكم

زمان كنت تسأل الواحد إيه مواصفات فتاة احلامك يقولك مؤدبة محترمة متدينة اى حاجة وممكن يشوفها يحصل توافق وتبقا الحياة زبادى خلاط ( مش فى كل الأحوال طبعا )

لكن بعد الثورة بقا فى معيار جديد دخل المنافسة لأختيار الزوجة بس هل ممكن يكون معيار مؤثر على الحياة بعد كدا ولا لأ ودرجة تأثيره قد إيه

المعيار دا هو التوجه السياسى !

لأننا للأسف من بعد الثورة بقينا شعب مسيس واكيد مش هتلاقى حد بدون توجه سياسى معين :argue2:

ياترا بقا لو لقيت واحدة وعجبتك كل مواصفاتها لكن لقيت توجهها السياسى غيرك او حتى اتجاه مضاد ليك :waaaht:

هل هتفركش الموضوع ولا هتكمل وليه ؟ وياريت لو حد عنده خبرات فى الموضوع دا يفيدنا بس بعيدا عن الدخول فى السياسة نفسها الله يكرمكوا :)

اكيد يفرق

ما هو ما ينفعش مثلا واحد ثورجي يتجوز واحدة من انصار شفيق و سليمان او العكس


او سلفي يتجوز ليبرالية او العكس


الخ الخ الخ

موضوع جميل بصراحه ولفته مهمه

لو بحبها وهي بتحبني

اكيد الموضوع ده هيبقي أصغر من اني افكر فيه

وهنكتب في العقد يمتنع في البيت النكد والسياسه
الاحتياط واجب برضو

اكيد ياثر طبعا ل

مش فارقه قوى , لان التوجهات بتختلف من وقت للتانى , يعنى احنا كنا بنقول اة للثوره , بعد كدا الدنيا بدات تختلف ناس مع الاخوان وناس مع السلفين وناس ليبراليين وناس فلول , وعادى جدا انك تلاقى بيت واحد فيه اكتر من طائفه .
وعموما فى الحياة الزوجيه فى حاجات تانيه اهم من السياسه بيكون عليها الخناق او الاختلاف.

في حاجة مشتركة بين الاتنين (الدين) (مسلم او مسيحي) ودة اكبر من انكم تعملوا مشاكل بخصوص خلافات علي توجهات معينة .

غير ان في ناس في السياسة لها توجهات سياسية لاكن في اسلوب الحياة بيكونوا متفقين في حاجات كتير .

مهو احنا خلاص بقينا مهتمين بالسياسة والبنات بقت بتتكلم اكتر من الرجاله فى السياسه(ياريتهم كانوا بيتكلموا عن الطبيخ كده :d) واشى التيار ده ضد حرية المرأة واشى المرشح ده مسمسم واشى اللى بينتقد ده مثقف وهكذا ... فطبيعى انه بعد كده هيكون فى خلاف فى التوجه الا اذا بقى فى حب وطرف بيتبع التانى فى توجهاته ودى حاجه انت لازم تلمسها من البدايه وتفهمها هل الطرف التانى ده من النوع العنيد اللى شايف انه تفكيره الصحيح فى كل حاجه ولا من النوع اللى بيمشى على هوى غيره فانت اتناقش معاها فى مرة وحاول تتمسك بارائك السياسيه وانتقد التوجه اللى بتؤمن بيه وشوف ساعتها من تعبيرتها ونظراتها هى بتفكر ازاى فى النقاش والخلاف ودا برضه له علاقه بالشخصيه.

هو هيبقى سبب للعكننة فى الجواز بعد كده فى كل الاراء و الافكار و المواقف الجديدة..... و بينى و بينك الاسباب دى يوجد منها ما يكفى بعد الجواز :)

مش المهم رأيه السياسي
المهم نشاطها السياسي يعنى لو بتروح مظاهرات و بتحضر مؤتمرات وحاجات كده يبقى لا
لكن لو مجرد رأي يبقى كبر دماغك ومتفتحش الموضوع معاها

عايز أقولك اني مستمتع بالخلاف ده بالرغم اننا متجوزين من 16 سنة...انا رأي وهي الراي الاخر يا أخي هو حد يطول لما يكون نصك التاني مختلف.....:F_eyeb1[1]:
تخيل هي أهلاوية متعصبة جدا وانا أهلاوي بالوراثة فقط يعني بشجع اللعب الحلو ولو ألأسماعيلي او الزمالك بيلعبو حلو قدام ألأهلي ممكن جدا اشجعهم والماتش شغال انا اشجع وهي تشجع ونناقر في بعض وكمان الولاد يخشو اللعبة عمر مع مامتة ومريم بنت بابا طبعا معايا وفعلا ولا كاننا في استاد القاهرة ..... :new:
قيس علي كدة نفس الموضوع في السياسة عندي المدام بكت من الحزن والخوف علي البلد لما عمر سليمان اذاع بيان تنحي مبارك وانا كنت في منتهي السعادة وبتنطط من الفرح علشان الثورة ..... ولما شفتها بتبكي صعبت عليا جدا واخدتها في حضني وطبطبت عليها وبقيت أقولها اللي جي أحسن .........:s1[1]:
الفكرة اننا نتقبل بعض ونتناقش ونسمع في حدود اداب الحوار وهي كلها وجهات نظر مش حاجة شخصية ومجرد ما الموضوع يخلص يبقا خلاص احنا في البيت وننسي هو احنا كنا مختلفين في أيه !!!.....:S_thum1[1]:
بالمناسبة تاني يوم التنحي اخدنا الولاد و رحنا التحرير مع الملايين اللي راحت وهي كانت لسة زعلانة وفي وسط زحمة الميدان قلتلها هتفكيها ولا نقول عليكي فلول ونسيبك ونخلع انا والولاد............. :3mla:

تحياتي من مكة (:

الرأي السياسي مش عقيدة .. زي العقيدة الدينية .. الرأي السياسي .. قابل للمراجعة و التعديل حسب نضج الانسان وتجاربه و المتغيرات حوله .. مش مطلوب ان شريكة الحياة تبقى نسخة بالكربون .. بالعكس بعض الاختلاف المقبول يحفز على النقاش و المراجعة .. طبعا أؤكد على ضرورة انه يكون في اطار الاختلاف المقبول .. هههه .. علشان ما تكونش نهايتك سطرين على صفحات الاكشن !

لو اخوانية او سلفية هفركش فورا.

بصراحه انا شوفت تفاهات بعد الثوره

ناس صحاب بقالهم 93457387 سنه مع بعض
و قاموا قطعوا علاقاتهم ببعض
عشان ده فلول و ده اسلامي
عشان ده تبع حمدين و ده تبع مرسي

تفاهه و عبط ما بعدها تفاهه بصراحه

الله يخربيت السياسه اللي عملت كده في الناس

كل بيت دلوقتي في 98374 تيار سياسي
هل كل واحد هيقطع علاقته بابوه و امه و اخواته عشان السبب ده ؟

اقرب الناس ليا من مؤيدين حبايبنا الحلوين
و عمر ما علاقتنا اتأثرت بحاجه

احنا مش بنقبض منهم حاجه و لا احنا عبيد عندهم
عشان يحصل اللي بيحصل في البلد دلوقتي

دي وجهه نظري

حسب
يعني لو من اتجاه مش مضاد اوي , شغال
لو الاتنين بيتعاملوا مع الامر ببساطة , شغال
لو حد فيهم مجنون , انسى :)

اقتباس:

---

المشاركة الأصلية كتبت بواسطة screenplays

بصراحه انا شوفت تفاهات بعد الثوره

ناس صحاب بقالهم 93457387 سنه مع بعض
و قاموا قطعوا علاقاتهم ببعض
عشان ده فلول و ده اسلامي
عشان ده تبع حمدين و ده تبع مرسي

تفاهه و عبط ما بعدها تفاهه بصراحه

الله يخربيت السياسه اللي عملت كده في الناس

كل بيت دلوقتي في 98374 تيار سياسي
هل كل واحد هيقطع علاقته بابوه و امه و اخواته عشان السبب ده ؟

اقرب الناس ليا من مؤيدين حبايبنا الحلوين
و عمر ما علاقتنا اتأثرت بحاجه

احنا مش بنقبض منهم حاجه و لا احنا عبيد عندهم
عشان يحصل اللي بيحصل في البلد دلوقتي

دي وجهه نظري

---

انا نفسى اعرف بس انت ايه توجهك يعنى انت تبع مبارك وشفيق ولا حمدين وجبهه الانقاذ ولا مع مين ضد مين بس ؟؟؟؟؟؟!!!!!!

اعتقد مش هتفرق
لازم يكون في فرق فالاراء ولو تشابه فكل شئ مش هينفع

اقتباس:

---

المشاركة الأصلية كتبت بواسطة seiffoz

لو اخوانية او سلفية هفركش فورا.

---

ياباشا فين اللى بتقول عليه ده من النادر انك تلاقى بنت مع الاخوان او السلفيين اغلبهم مع ابو دم خفيف والمسمسم والامور وضد اللى هيلبسونا الحجاب وهيخلونا نلبس واسع

اقتباس:

---

المشاركة الأصلية كتبت بواسطة micromoud

ياباشا فين اللى بتقول عليه ده من النادر انك تلاقى بنت مع الاخوان او السلفيين اغلبهم مع ابو دم خفيف والمسمسم والامور وضد اللى هيلبسونا الحجاب وهيخلونا نلبس واسع

---

لا موجودين كتير

حصل قدامي
واحد شاب اخواني كان عاوز يخطب واحدة زميلته وكان فيه شبه موافقة من البنت لكن والدها علماني وبيكره سيرة الاخوان
والمشروع اتفركش بسبب الموضوع ده
والولد راح خطب واحدة اخوانية وريح دماغه
والبنت في انتظار عريس علماني يعجب والدها

بالرغم انه الموضوع محير جدا بس زى ما قال احد الأعضاء انه لو فى ناس مستعدة تتنازل شوية الحياة بتمشى ودا شوفت مثال ليه حى قدامى مع انهم من اتجاهين متضادين تماما .. انما بقا لو هى تهمها نفسها اكتر ومتشددة فى اتجاهها السياسى فهتلاقيها بتعمل حاجات تغيظ او من وجهة نظرك مش صح بس هى مقتنعة بيها تماما وهتقولك انا كدا عاجبك عاجبك مش عاجبك بالسلامة

اقتباس:

---

المشاركة الأصلية كتبت بواسطة airforces

بالرغم انه الموضوع محير جدا بس زى ما قال احد الأعضاء انه لو فى ناس مستعدة تتنازل شوية الحياة بتمشى ودا شوفت مثال ليه حى قدامى مع انهم من اتجاهين متضادين تماما .. انما بقا لو هى تهمها نفسها اكتر ومتشددة فى اتجاهها السياسى فهتلاقيها بتعمل حاجات تغيظ او من وجهة نظرك مش صح بس هى مقتنعة بيها تماما وهتقولك انا كدا عاجبك عاجبك مش عاجبك بالسلامة

---

لما العند يختلط بالسياسة ابقي قول يا رحمن يا رحيم