تركيب الطارة المالتي فنكشن والكروز كنترول للتيجو
بسم الله الرحمن الرحيم
يا شباب كنت ناوي من فترة اني اعمل شوية تظبيطات في التيجو بما انها ان شاء الله قاعدة معايا شوية كمان ، كنت قبل كده ركبت دي في دي وجي ام وغيرت سماعات الابواب لسوني 3 واي، المهم قعدت افكر واعصر دماغي لغاية ما قررت اني اركب المالتي فنكشن بتاع العربية، طب هنحتاج ايه يا عم الحج، هنحتاج الزراير وهنحتاج تغيير الكابل اللي في الطارة اللي راكب فيه الايرباج والكلاكس، للكابل التاني اللي زيادة فيه كابلات المالتي فنكشن
http://www.nilemotors.net/Nile/[IMG]...ultifuncti.jpg[/IMG]
وبعد كده هنحتاج الزراير المالتي فنكشن بتاعت الدريكسيون، قابلتني مشكلة ان الدريكسيون اللي بينزل في مصر مالوش زراير عشان البلاستكة صغيرة ومحتاجين الدريكسيون التاني اللي نازل في عربيات الشرطة علي الاقل
المهم قولت ما دام كده كده هنغير يبقي الاحسن بأه أغير الدريكسيون بالشكل اللي نازل في ال2010 بره بزرايره بايرباجه بسلطاته ببابا غنوجه
طبعا قعدت استفسر واسأل هي نفس قطمة الدريكسيون قالولي هي واحدة ما اتغيرتش قولت ماشي اشحن يا عم، ووصل الدريكسيون والكابلات وركب يا باش مهندس، بسم الله ما شاء الله، الشكل اتغير تماما، اللي ينتقم منك يا ابو الفتوح، وتم تركيب المالتي فنكشن علي الكاسيت وكل شيء تمام التمام والحمدلله
http://www.nilemotors.net/Nile/[IMG]...0364705951.jpg[/IMG]
ركب الدريكسون يا عم الحمدلله، اعمل ايه تاني اعمل ايه تاني، أركب مكروز كنترول، قعدت اشقلب النت علي كروز كنترول لغاية ما وصلت لواحد ينفع يركب علي التيجو عشان دواسة البنزين كهربا، اشحن يا سيدي ، وصل الكروز مصر، والمفاجأة المانيوال بالصيني، ايه يا عم اللي باعته ده، اركبه ازاي انا والكهربائي اصلا اول مرة يشوف الحاجة ديه :)
روحت مكلم واحد صيني وقولتله بص بقي انت الامل ، ترجم يا مسعود، الراجل ما كدبش خبر وقعد يترجم فيه اسبوع :)، المهم بعتلي المانيوال من هنا وطلعت علي الكهربائي بص يا سيدي ركب ديه في ديه والفيشة ديه هنا والاسلاك ديه هناك ، بصراحة اجدع حاجة في الكهربائي انه ما كانش بيفتي، ركب هنا يركب هنا ، هناك يركب هناك، المهم وقف الموضوع علي السلك بتاع حساس السرعة يركب في انهي سلك من ال 30 سلك اللي ورا العداد؟؟؟ المهم اضطريت اكلم الواد الصيني تاني ، قالي هو السلك رقم 27 وهما مترقمين، ركبنا وظبطنا وقفلنا وكل حاجة ماشية تمام تمام واللهم لا حسد.
http://www.nilemotors.net/Nile/[IMG]...1713421751.jpg[/IMG]
http://www.nilemotors.net/Nile/[IMG]...1713421754.jpg[/IMG]
انا في الخدمة وتحت أمركوا في اي سؤال، وان شاء الله أفيدكوا
