الموضوع: غيرت لكونتيننتال؟؟؟؟

من كام يوم تخطيت حاجز الخمسين الف كيلو وحسيت اني خلاص جه ميعاد تغيير الكاوتش وكمان لاني فيه كاوتش عندي من الخمسه طرقع وانا ماشي عليه وهو نايم ومكنتش واخد بالي ده غير اني سمعت اني فيه زياده نازله علي اسعار الكاوتش 10% من يوم الاتنين الجاي المهم تشجعت وخدت قرار اني اغير اربع كاوتشات وبصراحه لقيت ناس كتير شكرتلي في كونتيننتال فقررت اني اغير لكونتيننتال فلقيته موجود عند وكيل بيريللي اللي في الخلفاوي وكان ContiEco.......™ 3

195 65 R15 91H وسعر الفرده كان 550 ومن هنا لهنا وصلنا اني اخد الاربعه ب 2150 بالترصيص بس فيه شوية استفسارات عندي:-

1- دلوقتي انا كان الكاوتش اللي عندي 185 وغيرت ل 195 وصاحب المحل قال عادي مفيهاش حاجه واني ده بيدي ثبات اكتر للعربيه فهل ده فيه اي مشاكل؟
2- سعر الكاوتش كده مناسب ولا غالي ؟؟؟
3-رأيكم في كاوتش كونتيننتال وتجاربكم ليه من حيث الصوت والفرامل؟؟
4-دلوقتي انا سبتله الاربع فرد القديمه وكان فيهم واحد بايز ورجعت وواحد صاحبي قالي كنت خدهم منه وبيعهم لاي محل او بيعهملو فانا بصراحه اول مره اغير كاوتش فمش عارف المفروض ايه اللي بيحصل؟؟؟
5-انا قلتله يشوف انضف كاوتش في الاربعه القدام من ناحية الحاله ويخليه استبن مع العلم اني القديم ده عرضه 185 ولا الاستبن كمان لازم اغيره واخليه 195 زيهم ؟؟؟
6- الكاوتش مكتوب عليه Germany وواحد قالي اني كونتيننتال فرنسي فقلتله ازاي ده الكاوتش مكتوب عليه الماني وحسيت اني اتلغبطت؟؟؟
7- تاريخ الكاوتش الاسبوع 44 من 2012 فكده تاريخ انتاجه قديم ولا كويس ؟؟؟