ادارة المرور الأتاوة بشكل لطيف ( القطت رادار اقرأ عشان ممكن تكون مكاني)

بسم الله الرحمن الرحيم

اخوتي في الله !

عايز اقولكم حاجة بغض النظر عن رأيي يحتمل الصواب ويحتمل الخطأ

انا بقيت مقتنع انه الإدارة العامة للمرور هي البلطجة ولكن بشكل لطيف ! وده رأيي الشخصي معرفش فيه حد متفق معايا ولالا

اللي حصل كالأتي

خارج من الرحاب الساعة 10 بالضبط رايح مساكن شيراتون اجيب ورق وراجع على طول

خارج النقطة اللي عند محور مصطفى كامل معايا هيكتور "الكلب" واخويا دخلت على اللجنة
الضابط : من فضلك الرخص
انا : اتفضل
هو : ممكن رخصة الكلب ؟
انا : لا مش ممكن عشان انا مش سايقه دلوقتي !
هو : حضرتك بتهزر ؟
انا : هوة يعني لما تطلب مني رخصة الكلب وانتا ضابط مرور يبقى انتا اللي بتهزر !
هو : حضرتك اركنلي على جنب وانزلي
انا : لا حضرتك انا ها اركن على جنب بس مش ها انزل !
هو : هيا فتونة ؟
انا : لا حضرتك انا بتكلم بأدب حضرتك مش ضابط مباحث عشان تفتشني او تفتش العربية حضرتك كجهة مخول فقط بأنك تفحص ورق العربية سليم ومطابق ولالا ! وورقي سليم
ممكن تقولي اركن عشان تستعلم عن حاجة في الرخصة عن طريق الجهاز انما انا ولا مشتبه فيه ولا حاجة عشان تنزلي اقف في اللجنة زي المتسولين
هو : برطم بكلام كده شتيمة وقلة ادب
انا : طول ما كلية شرطة بتاخد من 50% عمرنا ما ها نتحسن ابدا !
هو : اتفضل رخصك ومع السلامة
انا : تصبح على خير يا فندم

خرجت من اللجنة وانا مبسوط اني مخرجتش عن الأدب ولا تعديت حدودي في الكلام معاه !

المهم خرجت على طريق السويس واخدت اليوتيرن عشان اخد اتجاه مصر الجديدة !

قبل الطريق الدائري بحوالي 700 متر لقيت بوكس شرطة راكن على جنب
البوكس ده دايما موجود عشان لما سيادة الرئيس يعدي البوكس بيطلع منه اتنين امناء شرطة بيوقفوا طريق السويس عشان الريس يعدي ! فأنا متعود على وجوده

ماشي 100 وفي اقصى اليسار ومفيش حد غير عربية ورايا غير بحوالي 30 متر تقريبا

فجأة لقيت فلاش ضرب في وشي وبركز لقيته طالع من البوكس ركزت اكتر شوية لقيت اتنين قاعدين على الرادار عيني عينك ومش مستخبيين حتى واللي ماشي يشوفهم كمان عادي
فالطبيعي انه الرادر صورك مدام مفيش لجنة يبقى تكمل طريقك عادي

فأنا اصريت اركن وانزل

بقوله حضرتك صورتني صح ؟
هو : اه
انا : بأنهي وجه حق
هو : حضرتك ماشي مخالف
انا : حضرتك طريق السويس طريق سريع بدون تقاطعات السرعة الحرة عليه 120 كيلو في الساعة وانا كنت ماشي 100 !
هو : لا السرعة هنا 90 كيلو
انا : هاتلي يافطة على طريق السويس بتقول الكلام ده يا بيه !
هو : حضرتك ملكش الحق تتكلم معانا احنا بنصور وبس ممكن تبقى تعمل تظلم في الموضوع !
انا ساعتها سامع صوت الاسلكي شغال وبركز وماشي خلاص وبحسبن في سري
سمعت صوت الضابط !
انهي ضابط

نفس الضابط اللي في اللجنة !

اخويا اصر ساعتها اننا ننزل ونعملهم مشكلة عشان هيا كده تحولت لأتاوة عشان معرفش يعملي حاجة في اللجنة بلغ الرادار !
بس انا في يقيني ان مستحيل الدناوة تكون وصلت للدرجة دي انه بيخرجني من اللجنة عشان يبلغ عني الرادار يصورني وانا ما زلت مصر وعارف انه الطريق الحر بدون تقاطعات السرعة المقررة فيه 120 ! ولا حياة لمن تنادي

عايز حضراتكم تقولولي اتصرف ازاي دلوقتي

ادفع المخالفة فين وازاي واستعمل ازاي اصلا ؟ لأن العربية مش بإسمي ومش عايز استنى لحد ميعاد التجديد فعايز ادفعها دلوقتي ادفعها فين واستعلم ازاي ؟؟؟

حسبي الله ونعمل وكيل فيا لو انا ظالمه وحسبي الله ونعمل وكيل فيهم لو ظالمني !

هتدفعها مع التجديد 305 جنيه
بس الطريق دة 90 فعلا

تحياتى لك على حوارك المؤدب

و لكن السرعه فعلا 90 و دى كانت من فتره و كان هناك كام لوحه بس الله اعلم اتشالوا ازاى و امتى

ما زلنا في دولة البوليس ورما فيش حاجة اتغيرت ولا حاتتغير

كنت سيب عليهم الكلب يخلصنا منهم
مفيش فايده في البلد دي للاسف

معتقدتش ان فيه طريق سريع فى مصر مسموح فيه بسرعه اكتر من 100 كم/س

فى السعودية انظف واوسع طريق شوفته كان الطريق بين مكة والمدينة 6 حارات رايح و 6 حارات جاى
والسرعة القانونية كانت 120 كم/س وديه كانت اقصى سرعة قانونية فى السعودية

أولا هدّي نفسك يا فندم . طبعا هو بيستظرف في حكايه رخصه الكلب دي و بدل ما يضيع وقته في الظرف ده يبقي يستغله في القبض علي العربيات المتبلغ عنها بقطع الطريق و تثبيت عربيات تانيه و هما مكسلين يمسكوهم. بالنسبه لموضوع الرادار انا معاك في انه فخ للايقاع بالسيارات علشان يطلعوا منها مخالفات و فلوس و بيبقي ليهم نسبه منها لكن بصراحه استبعد تماما موضوع انه استقصدك فسلط عليك الرادار لانه ببساطه ما يعرفش حضرتك كنت رايح فين ما جايز كنت تكون رايح في اتجاه السويس مثلا و لا علشان اي سبب هتلف و ترجع تاني فمش منطقي انه كلم بتوع الرادار و قاللهم خليكم مستعدين هتعدي عربيه لونها كذا ماركتها و نمرها كذا فاعملولها مخالفه رادار مثلا و بعدين خللي بالك هما بيشغلوا الرادار و هو اللي بيلقط لوحده السيارات اللي متجاوزه السرعه القصوي ما ينفعش يعملوا الكلام ده بطريقه يدويه حتي لو مستقصدين حضرتك فلو كان في حد بيجري زيك اكيد هتلاقيه اتصور مع حضرتك و لو الظابط عايز يغلس كان اخد النمره و حطلك عليها مخالفات قد كده تكتشفها لما تروح تجدد علشان تكون نسيت الموضوع . بالنسبه للسرعات القصوي في المنطقه اللي حضرتك اتصورت فيها و لحد الهيئة العربيه للتصنيع هي ٩٠ فعلا وهناك يافطه بس انا مش فاكر مكانها بدقه بس هناك يافطه اكيد و من بعد الهيئة العربيه للتصنيع السرعه القصوي ٦٠ و برضه في يافطه بالسرعه دي

اقتباس:

---

المشاركة الأصلية كتبت بواسطة elawany13

معتقدتش ان فيه طريق سريع فى مصر مسموح فيه بسرعه اكتر من 100 كم/س

فى السعودية انظف واوسع طريق شوفته كان الطريق بين مكة والمدينة 6 حارات رايح و 6 حارات جاى
والسرعة القانونية كانت 120 كم/س وديه كانت اقصى سرعة قانونية فى السعودية

---

طريق العين السخنه يا باشا السرعه القصوي ١٢٠

بص يا باشا أنت قلتها حكمة طول ما كلية الشرطة بتاخد من مجموع متدنى يبق عليه العوض ،،وأنا أحسدك ع حوارك انت جرئ لدرجة تحسد عليها ،،تحياتى .

يعني
بصراحه اول مره اعرف ان ضابط شرطه يسال علي رخصه كلب
الطريق ده ان بامشي منه يوميا
ولا الكمين اللي في مدخل الرحاب طريق طلعت مصطفي
ولا الكمين بتاع مدخل الرحاب من المدرسه البريطانيه اللي بيودي اسكان الشباب
بيوقفوا عربيات من الاساس
حتي اخر مدخل للرحاب من علي طريق السويس نادرا النادر لما الاقيه شغال وبيشتغل علي النقل وعربيات الاجره
حتي انا استغربت جدا من وجودهم ومش شغالين
اما البوكس قبل الدائري
بيمشوا بعد ما مرسي بيعدي مباشره
ومفيش حد اكتشف حكايه الرادر قبل كده
انا مش باشكك في كلامك لا سمح الله احسن تفهمني غلط
لكن مستغرب من اللي حصل معاك

ياباشا بغض النظر عن غتاتة الظابط الاولاني بس الرادار علي تسعين في مصر السويس ومصر الاسماعيليه كمان ثم اني الرادار مش مصمم عشان يلقط عربيه معينه هو بيبقي مظبوط علي سرعة الطريق بس لو كان فعلا شتم كان المفروض متسكتلوش وتاخد حقك منه وفيه طرق كتير ياما تعرف اسمه ومكانه ورتبته وتشتكيه علي موقع الوزاره ياما تروح ادارة التفتيش والرقابه في الوزاره وتقدم فيه شكوي انا واحد صاحبي حصلت معاه مشكله بس اكبر منك شويه وعمل شكوي وكان معاه محامي والرد جاله بعد 48 ساعه بميعاد النيابه وخدو حقهم منه عامة طرق انك تاخد حقك منهم كتير بس هما بيستغلو جهل ناس كتير وبيعملو كده وعلي فكره انت اما قولتله الكلمتين دول حس انك فاهم فحس انك ممكن تعمله مشاكل وسابك انما لو حد حسسه بجهله كان ممكن يتسلي عليه

سرعة الطريق ده فعلا زي ماكل الإخوه أكدوا 90 وماظنش الموضوع كان فيه إستقصاد لأن الرادار بيبقى مضبوط ع السرعه مالوش دعوه بنوع ولا نمرة العربيه ... والله أعلم .

حسبى الله ونعم الوكيل

معلش فداك اصل احنا كده عمرنا ما هنتعدل كلنا بنضرب ونأكل وننهش فى بعض بس كل الهم ازاى افرض سيطرتى عليك وازاى اخد منك فلوس غير كده ما تلاقيش فى مصر

عادي جدا لسه زي ما احنا انهارده كنت رايح طنطا وطبعا علي الطريق الزراعي العربيات في المقابل بترعش نور عشان تعرفك ان في كمين والمكان دا في ردار دايما والسرعه 60 في المكان دا هديت السرعه وعدت من جمبي عربيه بسرعه دخل علي الكمين وانا كنت وراه وكانت سوبر دارك طبعا وقفه ثواني وكان ماشي عاااااااااااادي يا باشا كبر دماغك اللي يفكر في البلد دي يجيله شلل رعاش

بغض النظر عن مشكلتك البلد والمنظومه الامنيه فيها من اوسخ ما يكون انا قابلت في شهرين تلات مواقف نفس قله الادب توكتوك تاكاتيك توكتوك ايه وعربيات اجره من غير نمر وفوضي ما بعدها فوضي واللجنه مش بتوقف الا العربيات الملاكي وتختار واحد شكله محترم واحدة ست عربيه شيك ويجرب اتمسكت وكانت رخصتي منتهيه وطبعا المرور كان اتحرق اثناء الثوره وكمان كنت جاي من السفر لسه وعايز ياخدني مخالفة وانا طبعا مخالف وملتزم بس سالت الظابط انتم بتختارو العربيات وموقفين بنات وعربيات ملاكي وسايبين التكاتيك والميكروباصات والفوضى دي كلها تخيل رد قال ايه معلش اصلها مراحل شويه شويه لسه شويه وبعدين نمسك الحاجات دى ارد عليه اقوله ايه ؟ بعدها تاني باسبوع اتمسكت باسبوع ووريته الايصال اخني تاني مخالفه بعدها بشهر ونص كلبش العربيه انا الوحيد في شارع شهاب ومن قدامي ومن ورايا الشارع كله صف تاني سالت الظابط اشمعني انا والله قال اصل دول اصحاب محلات وقاعدين هنا يعني اعمل مشاكل بالظبط كده قلت له كلبش العربيات اللي حولي اشمعني انا وفي الاخر دفعت ونش طول اليوم بيلف في شارع شهاب وسوريا ولبنان وسايبن الازمه الحقيقيه في كل مكان هما عايزين فلوس وبس اقصد مش مطلوب حل المشاكل ولا تخفيفها المطلوب تجميع فلوس واتاوات من الناس اللي تقدر عليها مؤسسه الامنيه سواء شرطه مرور مرافق تموين سياحه الخ الغالبيه العظمي زباله وفاسده ومش تنظف وده الطبيعي والقانون بيطبق علي ناس ناس وقبلها الموسسه القضائيه في مصر هل في وكيل نيابه بيدفع مخالفات هل في وكيل نيابه مرور بيغرم زميل مهنه فلان بيه وعلان باشا ومعظم المخالفين عربيات عليها الهيئات القضائيه الباتش علي النمر او نيابه هل في حاجه اسمها في القانون نمر عليها لوجو النيابه معناه ايه انه فوق القانون مميز طز فينا مين اللي بيفيم عربيته ومين اللي بيضلرب نمر صغيره محدش يعرف يقراها ويضرب نمر سودا والله شفت النمر الجديدة مضروبه بويه سودا وعليها شعار النيابه ومكتوب هيئه قضائيه يعني اللي المفروض يطبق القانون وينفذه ويحمي دوله القانون اللي هى الداخليه والهيئه القضائيه نسبه كبيره منهم ومن اقاربهم هما المخالفين وفوق القانون وطز في البلد قانون ساكسونيه وطالما كده تبقي متاكد ان ممكن يحصل لاي حد اي حاجه وكان الله بالسر عليما

طريق السويس القاهرة 100 كم - س
لما بتدخل الجزء المخصص في القاهرة السرعة بتقل ل 90 كم - س

الطريق الوحيد في مصر اللي سرعته 120 هو طريق العين السخنة القاهرة
و كل الطرق الصحراوية الأخرى يا أما 90 كم -س يا أما 100 كم - س
==========

عايز رأيي

موضوع رخصة الكلب ده معرفش عنه حاجة .

أنما بقية الحوار .......... و موضوع الرادار ....... حضرتك مكنش لازم تتكلم معاهم بطريقة مش كويسة .

أنا بصراحة عمري ما حد من الظباط رزل عليّ في أي شئ
بعدي على أي لجنة و بكلمهم بكل أدب و أحترام من صغيرهم لكبيرهم (هم بشر زينا ) و بيكلموني بكل أدب و أحترام .
و أنا مش ظابط على فكرة و مش بعشق الشرطة يعني .

بس ياريت الردرات دي تكون موجودة في كل مكان و تمكسنا و أحنا بنتجاوز السرعة ..... علشان بصراحة الموضوع بتاع السرعة ده بقى ماسخ قوي .

بالنسبة أن حضرتك فاكر ان الطريق سرعته 120 كم - س ...... دي مشكلة عندك و لازم تبقى عارف الطرق اللي انت بتمشي عليها سرعتها كام علشان تبقى في السليم .

أنا آسف جدا إذا كلامي معجبش حضرتك ........ بس معلش آسف أعذرني .... حال البلد أصبح مُزري بصراحة و الناس بقت حاجة صعبة في التعامل .

بالنسبة لموضوع 50 % في الثانوية العامة .... حضرتك غلطان و ده جرح لمشاعره .
و خارج مصر ....... رجال الشرطة هم الأقل في الدرجات العلمية
أما بتوع المباحث هما دول اللي بيبقى دارسين جامد
هي التقسيمة برة مختلفة عن مصر في العمل الشرطي و لكن ده شئ عالمي أن بتوع الشرطة مش لازم يبقى عالم ذرة .

ثالثا نظام بلدنا كدا ...... و حضرتك قلتله كلمه بصراحة ملهاش لزمة .. موضوع الثانوية و 50 %

اقتباس:

---

المشاركة الأصلية كتبت بواسطة sayed911

انا : حضرتك طريق السويس طريق سريع بدون تقاطعات السرعة الحرة عليه 120 كيلو في الساعة وانا كنت ماشي 100 !
هو : لا السرعة هنا 90 كيلو

---

إدفع المخالفة طالما خالفت السرعة

-
-

بص يا باشا بخصوص السرعة هي فعلا في الجزء ده السرعة القصوي 90 و في الجزء اللي قبل الدائري من ناحية الماظة و جاردينيا و ما قبلها السرعة 60 كمان و فيه يفط محطوطة بتشير لذلك
اما الردار في المنطقة ديه دايما بيبقوا واقفين عادي و تشوفهم و بيبقوا قدام العربية اول ما تقرب من عندهم تشوفهم سواء ع كبوت العربية او ع الارض يعني الموضوع مش استقصاد لسبب بسيط هو الظابط هيعرف طريقك منين

اما نقطة التعامل عايز اقولك حاجة لو حصل تعسف او اي حد شتمك او استعمل القسوة معاك المفروض بتشتكي و يا حبذا لو تعمل محضر باللي حصل و يكون معاك الاسم و الرتبة و فين او تقدم شكوي مباشرة و لو فيه شاهد يبقي تمام
بس طالما محدش عملك حاول متخبطش معاه فيه الكلام لأنه لو عايز يغلس عليك هيغلس و بشكل قانوني و مش هتقدر تسلك معاه لو انت مش عارف القانون
انا بصراحة مفيش مرة في لجنة حد غلس عليا او حتي كلمني بشكل غير لائق بل بالعكس دايما التعامل باحترام و انا ردي بالمثل و بالقانون
اما موضوع رخصة الكلب فديه جديدة بصراحة ان مرور يطلبها الا لو كان فيه بند في القانون و احنا منعرفش هههههه بالرغم اني أؤيد الاجراء ده بشدة لسببين احيانا الكلاب بتكون مسروقة و ثانيا احيانا بتكون كلاب مخدتش التطعيم و بالتالي ممكن يكون الكلب مريض او خطر في حالة انه عض شخص


و بخصوص هكتور يا تري نوعه ايه ؟؟؟

كنت خليت هيكتور هو اللي يديله الرخصة بنفسه ههههههههههه، هدي نفسك يا باشا الموضوع مش مستاهل
طيب أنا وقفني مرة رئيس مباحث النزهة في كمين بشارع الطيران وكان معايا أخويا والمدام بص في الرخص وبيقولي جاي منين.. قلتله من المكان الفلاني قاللي طيب إيه اللي جاب حضرتك من هنا قولتله يعني إيه ؟؟!! قالي أصل العنوان في الرخصة على العنوان الفلاني حضرتك ماشي من هنا ليه..
بصتله باستغراب وقلولتله هو أنا المفروض أمشي على العنوان اللي في الرخصة فقط ولا إيه !!!!
قمة الاستفزاز.. بس الصراحة في النهاية الراجل قعد يعتذرلي بس طبعا بعد ما عرف إني صحفي، مع العلم إن تصنيف الناس ده أكثر حاجة باكرهها في حياتي في أي شىء بس الصراحة كنت زهقت منه ومن كلامه الغريب

افضل شئ انك استحملت
بالنسبة للطريق فسواء 90 او 120 مفيش تغير عندهم

أرجو من صاحب الموضوع معذرتي لصراحتي ولكنه مخطئ على طول الخط فيما سطر

أولا من حق ضابط المرور الاطلاع على رخص الكلاب وفي حالة الكلاب الغير مرخصة يتم سحبها والتعامل معها بمعرفة الإدارة العامة لتدريب كلاب الأمن والحراسة على ما أعتقد

كما أنه من حق أي ضابط داخل نطاق دائرته التفتيش والاطلاع على رخص الكلاب المتواجدة في الشارع العام ... وإن كان ذلك لا يتم تطبيقه بصورة مكثفة فهو لا يعني إلغاؤه أو عدم العمل به في حالة الشك أو الحاجة إلى التيقن ... والمفروض حضرتك لو عايز تمشي مضبوط يكون مع حضرتك رخصة الكلب باستمرار

وللأسف الضابط اللى حضرتك اتعاملت معاه كش وخاف لما لقاك بتكلمه باسلوب ناشف شوية ومش خايف منه فهو اللى خاف منك وافتكرك حد مهم ولا حاجة وممكن تؤذيه فلم الدور ... وللسبب ده احنا لسة عايزين شرطة جديدة مش بتخاف من اللى يهب فيها عمال على بطال .. وعمرنا ما نتظبط طول ما ضباط الشرطة بتوعنا بيخافوا من الشعب ... بس العيب مش عليه .. العيب على اللى مشغله


ثانيا ... مش من حق حضرتك تقوله جملة زي ... طول ما كلية شرطة بتاخد من 50% عمرنا ما ها نتحسن ابدا ... لأن ده نظام الدولة المعمول به ... وعلى فكرة ده النظام المعمول به في كل أو معظم دول العالم ... لكن المشكلة مش في المجموع .. المشكلة في التعليم نفسه ... خدنا إيه يعني من كلة الطب ولا الهندسة اللى بتاخد أعلى مجموع في البلد وفي الآخر بتطلع شوية من الجهلة اللى مش فاهمين حاجة وبيطلعوا يتعلموا في الخلق وبيموت بسببهم آلاف سنويا ... إلا من رحم ربي


ثالثا ... السرعة على طريق السويس لغاية الدائري وانت جاي من مصر الجديدة 60 ك /س ... والسرعة من الدائري لغاية مدينة الرحاب ومسافة كبيرة بعدها 90 ك / س ... والسرعة في بقية الطريق لغاية السويس 100 ك / س ... واليفط والعلامات بالسرعة موجودة على جانبي الطريق

ملحوظة ... الطريق الوحيد في مصر اللى السرعة عليه 120 ك / س ... حاليا هو طريق القاهرة - العين السخنة ... وطريق الكريمات - أسيوط الجديد

أرجو المعذرة مرة أخرى كون أسلوبي جاء حادا قليلا ... ولكن ما أثار حفيظتي هو ردود العديد من الأخوة الأعضاء التي تلعن وتسب في الداخلية برمتها بسبب واقعة .. المخطيء فيها ليس الداخلية ولا أفرادها

أولاً هدي نفسك
أنا معرفش ضابط المرور من حقه أنه يشوف رخصة الكلب ولا لأ ؟
لكن أعتقد إن شرطة المرور بالذات دلوقتي أتحسنوا عن زمان خالص
وردودهم أصبحت مؤدبه غير الأول
دا من حكاوي زمايلي الرجال في الشغل
لأن المعاملة طبعاً بتختلف مع السيدات للأحسن
وأنا شخصياً أحتكيت بيهم إمبارح بس وكنت أنا المخطئة وماشية عكسي ومع ذلك ملاقيتش منهم سوء معاملة غير بعض الأخطاء الفردية
ربنا معاك لو كنت حسيت بالإهانة أو الإستأصاد
وربنا يعوض عليك لو كنت مظلوم

بعيدا بس عن الموضوع الرئيسي
ايه موضوع رخصة الكلب ده؟
هي الكلاب ليها رخصه؟؟

اقتباس:

---

المشاركة الأصلية كتبت بواسطة dr.a.nabil

بعيدا بس عن الموضوع الرئيسي
ايه موضوع رخصة الكلب ده؟
هي الكلاب ليها رخصه؟؟

---

الكلب بترخصه من مديرية الطب البيطري التابع لها محل سكنك تقريبا أو مستشفيات الكلب المنتشرة في كل أنحاء الجمهورية بمبلغ حوالي 50 جنيه أو حاجة زي كدة والمبلغ ده شامل التطعيم ضد مرض السعار وشامل الرخصة الحديد التي يتم تعليقها في الطوق الخاص بالكلب

والرخصة بيتم تجديدها سنويا مع التطعيم

وأصحاب الكلاب الغير مرخصة بيتم الحصول منهم على إقرار يتعهدون فيه كتابيا بترخيص الكلب ليتم تطعيمه ضد مرض السعار وفي حالة عدم إقرار صاحب الكلب بذلك الإقرار المفترض أن يتم سحب الكلب أو إعدامه من قبل أفراد الشرطة ... لكن طبعا صعب جدا إعدام الكلب وصاحبه متمسك به .. عشان كدة بيكتب إقرار على نفسه بإنه سوف يقوم بتطعيمه

و فائده الترخيص ده بقي كذا حاجه :

(1) لو الكلب بتاعك عض حد غريب ميبقاش فيه مشكله او خطر قانوني عليك بأي شكل


(2) لو اي حد قتل الكلب بتاعك باي شكل حتي لو كانت دوريات الشرطه ... بيكون من حقك انك ترفع قضيه عليهم و تطالب بتعويض

عشان بس منظلمش سيد بيه في موقفه و حديته مع الظابط
علي حد معرفتي بيه هو مر بموقف قبل كده اكيد ما زال ماثر فيه و مخليه ماخد منهم موقف

و ده رابط الموضوع لو حد مهتم

http://www.nilemotors.net/Nile/265598-a.html

اقتباس:

---

المشاركة الأصلية كتبت بواسطة d . A .\ ayman

الكلب بترخصه من مديرية الطب البيطري التابع لها محل سكنك تقريبا أو مستشفيات الكلب المنتشرة في كل أنحاء الجمهورية بمبلغ حوالي 50 جنيه أو حاجة زي كدة والمبلغ ده شامل التطعيم ضد مرض السعار وشامل الرخصة الحديد التي يتم تعليقها في الطوق الخاص بالكلب

والرخصة بيتم تجديدها سنويا مع التطعيم

وأصحاب الكلاب الغير مرخصة بيتم الحصول منهم على إقرار يتعهدون فيه كتابيا بترخيص الكلب ليتم تطعيمه ضد مرض السعار وفي حالة عدم إقرار صاحب الكلب بذلك الإقرار المفترض أن يتم سحب الكلب أو إعدامه من قبل أفراد الشرطة ... لكن طبعا صعب جدا إعدام الكلب وصاحبه متمسك به .. عشان كدة بيكتب إقرار على نفسه بإنه سوف يقوم بتطعيمه

و فائده الترخيص ده بقي كذا حاجه :

(1) لو الكلب بتاعك عض حد غريب ميبقاش فيه مشكله او خطر قانوني عليك بأي شكل


(2) لو اي حد قتل الكلب بتاعك باي شكل حتي لو كانت دوريات الشرطه ... بيكون من حقك انك ترفع قضيه عليهم و تطالب بتعويض

---

شكرا يا صديقي على المعلومات الجميله
افادكم الله

اقتباس:

---

المشاركة الأصلية كتبت بواسطة horas3000

عشان بس منظلمش سيد بيه في موقفه و حديته مع الظابط
علي حد معرفتي بيه هو مر بموقف قبل كده اكيد ما زال ماثر فيه و مخليه ماخد منهم موقف

و ده رابط الموضوع لو حد مهتم

http://www.nilemotors.net/nile/265598-a.html

---

طبعا أنا لم أقرأ الموضوع التاني ده من قبل ... ولكن لا تزر وازرة وزر أخرى .. ومش معنى إن كان فيه ضابط سيء يبقى التعامل مع الباقين كلهم يكون من نفس العينة اللى اتعاملنا بيها مع الضابط السيء

وعموما هم الرد عليهم لازم يكون جامد وبدون خشية منهم لأن برضه في منهم نسبة كبيرة لما بيحس إن اللى قدامه خايف منه بيسوء فيها وبيتنطط عليه ... ودي مالهاش علاقة بالمجموع على فكرة ولكنها التربية التي تنقصنا جميعا كمصريين بكل فئاتنا حاليا للأسف ... ولكن الرد يجب أن يكون حازما في حدود اللياقة والحق ... وفي النهاية الحق أحق أن يتبع دون تمييز طرف على آخر سواء بسبب فئته أو الجهة التي ينتمي إليها ... ومن يخطئ يجب محاسبته وبالذات من يتعامل مع الجمهور

وربنا يحفظنا ويصلح حالنا جميعا

يا سيد اهدى وصلي عالنبي الحكاية مش مستاهله وانت خالفت السرعه ،،،، حوار الظابط ده خاف و جاب وراا سيبك منه

المرة الوحيدة التى سحبت فيها رخصة القيادة الخاصة بى كان فى طريق السويس من عدة سنوات و كانت سرعنى 95 كم فى الساعة

ادفعها وقتي ب 150 بدل ما تترحل و تبقى ب 300 ج

اقتباس:

---

المشاركة الأصلية كتبت بواسطة horas3000

عشان بس منظلمش سيد بيه في موقفه و حديته مع الظابط
علي حد معرفتي بيه هو مر بموقف قبل كده اكيد ما زال ماثر فيه و مخليه ماخد منهم موقف

و ده رابط الموضوع لو حد مهتم

http://www.nilemotors.net/nile/265598-a.html

---

اقتباس:

---

المشاركة الأصلية كتبت بواسطة d . A .\ ayman

طبعا أنا لم أقرأ الموضوع التاني ده من قبل ... ولكن لا تزر وازرة وزر أخرى .. ومش معنى إن كان فيه ضابط سيء يبقى التعامل مع الباقين كلهم يكون من نفس العينة اللى اتعاملنا بيها مع الضابط السيء

وعموما هم الرد عليهم لازم يكون جامد وبدون خشية منهم لأن برضه في منهم نسبة كبيرة لما بيحس إن اللى قدامه خايف منه بيسوء فيها وبيتنطط عليه ...
ودي مالهاش علاقة بالمجموع على فكرة ولكنها التربية التي تنقصنا جميعا كمصريين بكل فئاتنا حاليا للأسف ... ولكن الرد يجب أن يكون حازما في حدود اللياقة والحق ... وفي النهاية الحق أحق أن يتبع دون تمييز طرف على آخر سواء بسبب فئته أو الجهة التي ينتمي إليها ... ومن يخطئ يجب محاسبته وبالذات من يتعامل مع الجمهور

وربنا يحفظنا ويصلح حالنا جميعا

---

على فكرة أنا أتعرضت لموقفين قبل (في أقسام مش في لجنة مرور )
من ظابطين معقدين نفسيا و مش متربيين .

و ده ما خلنيش أحكم عليهم كلهم أنها كدا ......... لأن الواحد بيقابل ناس كويسة وناس تانية وحشة في كل المجالات .

ظابط الشرطة يجب أن يحترمه الشعب ..... والعكس تماما صحيح ...... يجب أن يحترم ظابط الشرطة الناس و يعاملهم بأحترام و آدمية .

أما البلطجية و الخارجين على القانون يجب أن يكون لهم معاملة آخرى .
و ربنا يهون على الأستاذ سيد صاحب الموضوع .... خصوصا بعد ما قرأت الموضوع الآخر الخاص بالوالدة
و لكن كما قال الأستاذ أيمن ........ لا تزر وازرة وزر آخرى