الموضوع: الدائرة الكهربية بداخل السيارة

الدائرة الكهربية بداخل السيارة

عندا شوية أجزاء كدا في العربية وهي أساسيات الدائرة الكهربية هنحكي مع بعض فيها شوية

اولا البطارية :
البطاريه بتكون موجوده في أي عربيه سواء كبيره او صغيره أي عربيه اتصنعت وبتختلف في الحجم من عربيه للتانيه
وظيفتها انها بتمد العربيه بالطاقه الكهربيه المسؤله عن تشغيل المحرك في البدايه والتيار بتعها تيار مستمر وليس تيار متغير
طبعا مش يهمنا الفرق في التيار المستمر والمتغير بس احنا بنحتاج المستمر لان التيار مش ينفع نغير اتجاه التيار الكهربي يعني نبدل الاسلاك بتاعت السالب والموجب
علي عكس التيار المتغير ممكن نبدل الاسلاك عادي جدا زي ما بيحصل عندنا في البيت ممكن نقلب الفيشه ونركبها عادي جدا انما في العربيه مينفعش نركب الموجب مكان السالب او العكس
في حجات بنسمع عنها وانا شخصيا سمعت عنها ومكنتش اعرفها غير لما دورت علي معاني المصطلحات دي وسألت اكتر من شخص فيها
زي الفولت والامبير

الفولت ودا بيكون الفرق بين جهد القطبين "السالب والموجب"
الامبير دا قوة الدفع الكهربايه للمصدر وهنتكلم عنه كمان شوية


لما نتكلم عن البطاريات في انواع يمكن انا معرفهاش بس هتكلم عن الي موجود عندنا
البطاريه الحمضيه "السايله" ودي بنستخدمها في كتير من عربياتنا "زي عربيتي الفارهه" ودي بتكون مقسمه من الداخل لارباع "فيها ربع ضارب يا بيه"
داخل البطاريه الواح من الرصاص وماء نار "خليط من حامض الكبريتيك والماء المقطر"
عشان كدا بلاش حد يفكر يلعب معاها لان ماء النار دي خطر وبتحصل بقئ شوية تفاعلات مش مهم نعرفها لان الموضوع كبير كبير يعني
وفي بطاريات جافه ودي اغلي من الحمضيه شوية وهي فكرتها نفس فكرة الحجاره القلم الي بنجبها للريموت ولعب الاطفال بس علي كبير شوية
وعشان نحافظ علي البطاريه ممكن نعمل كام حاجه كدا
هنتابع نسبة السائل"الحامض" الي موجود في البطاريه كل 3 شهور تقريبا "للبطاريات الحمضيه"
ونثبت البطاريه كويس عشان متلمش وتعمل حريقه لقدر الله زي ما حصل في عربيتي الاولي وولعتلي في علبة التكييف ونربط القواطيش كويس جدا ويا سلام لو نغطي القواطيش باي حاجه جلد تبقئ كدا تمام اوي
طبعا البطاريات بتختلف من عربيه لعربيه حسب حجم الموتور


ودي الحمضيه "السايله


ودي الجافه




ثانيا ًالدينامو :
الدينامو بيقوم باعادة شحن البطاريه وطبعا عشان يشحن البطاريه لازم يدي تيار مستمر زي ما البطاريه ما بتخرج تيار مستمر وبيشتغل بطرية ميكانيكيه خزعبليه مقدرتش استفسر عنها كتير بس المهم انه بيعيد شحن البطاريه
طبعا الدينمو متصنع من حجات ثابته مع اختلاف الخامات وشوية حجات فوق بعض
القميص-البوبينه"الي بتلف"-السيليكونات"ودي الاسلاك الي ملفوفه جوه"- "الكتاوت "ودي الي بتنظم الشحن وممكن تكون جوه الدينامو او بره الدينامو مش بتفرق لان كل مهمتها تنظيم التيار مش اكتر"
ثالثا المارش :
المارش دا بقئ حكايته حكايه دا الي بيخلينا نزق زق لو زعل عشان كدا لازم نظبطه ليزعل زعلته وحشه اوي
ايه الي مستخبي في المارش من جوه
المخدات"بارات نحاس"-البوبينه"بتلف بردو ودي بارات نحاس بردو"-ترس البندكس "الي بيشغل"-الاوتوماتيك "المسؤل عن اللقط
سؤال بسيط هي المخدات والبوبينه معمولين من النحاس ليه عشان تستحمل الامبير العالي الي بيحصل من عملية التشغيل
تعالو نشوف بيشتغل ازاي
المارش لو بصينا عليه هنلاقي في تلت اجزاء بيتم توصلهم
الموجب والسالب والاتوماتيك "اللقط"
بصو بقئ
الموضوع سهل وبسيط
احنا عندنا طرفين موجب وسالب وسبنا من الاتوماتيك دلؤقتي لان دا كل مهمته انه بيعمل غلق للدايره لما حضرتك بتشغل من الكونتاك
طيب لما بتتقفل الدايره الكهربيه بيحصل جزب للبسكوته"الحافظه" عشان توصل كهربه للمخدات وفي نفس الوقت الاتوماتيك بيضغط علي مود صغير متوصل بترس البندكس عشان يعشق مع ترس الفلام ولما ترس الفلام بيتحرك الموتور بيشتغل


رابعا البوبينه :
ودي اسماه مولد الشرر ودي الي بتوصل كهربه بس طبعا بتولد تيار عالي عشان الاسبراتير"موزع الشراره" ويغذي بيها الشمعات "البوجيهات" ليتم الاحتراق داخل الفرن واحنا شرحنا قبل كدا المحرك شغال ازاي من جوه
ودي بتحول بتزود التيار الي واصل للشمعات يعني لو التيار الي واصل للبوبينه 12 فولت ممكن يرتفع 30 الضعف يعني 12*30=360 دا مثلا بس انا معرفش هو بيزود قد ايه


خامسا الاسبراتير:
ودا الي بيوصل الكهربه للشمعات "البوجيها" بس ليه وقت معين حسب ترتيب الاسطوانات مش بيوصل وخلاص
وفي منه نوعين اسبراتير عادي وفي الاليكتروني الاتنين بيعمل نفس الوظيفه بس الاختلاف في طريقة اداء الوظيفه
الفرق في اداء الوظيفه ان الاسبراتير العادي بيشتغل علي حركة ميكانيكيه
طيب الاسبراتير العادي فيه جزئين مهمين جدا الابلاتين والكوندنسر
الابلاتين دا الي بينظم عملية نقل الشراره للشمعات وتوقيت التغذيه بالشراره لكل شمعه
الكوندنسر دا بقئ عباره عن منظم بينظم التيار الي رايح لكل شمعه ليكون عالي اوي ولي منخفظ اوي
الاسبراتير الالكتروني دا في شوية حجات الالكترونيه كدا نتعامل معاه معاملة يا راجل كبر مخك لانه في حجات مش حولت اهمها او كله دواير اللكترونيه

الاسبراتير العادي

الاسبراتير الالكتروني
الي عليه مربع احمر وراكب في الوحش الي نايم دا

موعدنا المره الجايه مع الفرامل

"تذاكر الدخول مجاننا لاصحاب الفيرنا"

معلش صدعتكم بشوية كلام فاضي

ولو في مشكله قابلتك ومش فاهمها بيع العربيه وريح دماغك

تقبول تحياتي

AhMeD MeTwAlY

المشاركة الأصلية كتبت بواسطة aw2100

الله ينور كلام جميل بس محتاج كثير من الشرح فى الفنيات بالاخص الالكترونية وان شاء الله سوف اوضح بعض النقاط الملتبسة فى موضوعك بكرة علشان انا خلاص شطبت النهاردة معادنا بكرة تصبح على خير !!!

الله يخليك يا غالي الشرح دا من خلال معرفتي الضيقه
وطبعا الموضوع هيكون احلي وافضل بكتير لما حضرتك تضيف الاجزاء الي انا نسيتها او مش عارف اوضحها ويا ريت الاداره تعمل تعديل للموضوع بالاضافات الي حضرتك هتضفها في الموضوع
وانا سعيد جدا ان حضرتك هتشاركني في الموضوع
وانت من اهل الخير