تقرير مصور لاستبدال الكاوتش لالنترا md والمفاجئة... ببلاش
بسم الله الرحمن الرحيم
والسلام عليكم و رحمة الله و بركاته
نبتدي التقرير بالتفصيل الممل، مش عشان اغيظكوا، بس عشان الفائدة تعم بقدر الإمكان ان شاء الله.
من أسبوعين و قبل رجوعي من الأسكندرية لإصدار الباسبور البحري - الله يحرقه - قلت يا واد يا نشأت بص علي الكاوتش للاطمئنان قبل ما اطلع علي الطريق.
والمفاجئة !!!!! :I_angr1[1]:
http://nileup.com/up/uploads/nilemotors_13655956571.jpg
الفردة الأمامية اليمين طلعلها كاللو..
المهم، بعد الاندهاشة عشان مش عارف بقالي قد ايه بالظبط ماشي بالمنظر المريع ده، نزلت الاستبن و غيرته و طلعت علي القاهرة.
نظراً لظروف والدي الصحية المتدهورة جداً - ادعوله بالشفاء - أهملت الموضوع لفترة.
ربنا الهمني ان انا و انا بستلم العربية، استلمت ضمان منفصل للكاوتش من هانكوك، و عليها روحت مطلعه و لقيت نمرة تليفون لفرع مصر.
اتصلت لقيته في الإسكندرية، لكن ليهم فرع في القاهرة في الدقي. شركة مصر للتجارة العالمية - هانكوك. اخدت نمرتهم واتصلت بيهم، قالولي تيجي يوم الاثنين من الساعة ٣ الي ٥ و ده وقت تواجد الخبير الكوري كل اسبوع و هو المسئول عن الضمان.
طنشت اسبوع عشان نفس الظروف السابق ذكرها و روحت اول امبارح الاثنين ٨ أبريل ٢٠١٣..
استقبلني موظف محترم هناك و آخد بياناتي و بيانات العربية و الكيلومتر.
الخواجة الكور ي وصل في تمام الساعة ٣:١٥ و عاين الكاوتش و صوره.
http://nileup.com/up/uploads/nilemotors_13655956572.jpg
و بعدين راح قايس عمق الكاوتش عشان يحدد كمية الاستهلاك.
و استخدم في ذلك digital vernier او digital tire depth gauge
http://nileup.com/up/uploads/nilemotors_13655968581.jpg
http://nileup.com/up/uploads/nilemotors_13655968582.jpg
آخد ثلاث قرائات في أماكن مختلفة و طلعت ٧.١ و ٧.٢ و ٦.٩. آخد أعلي قيمة و قسمها علي ٧.٧ و هو العمق الأصلي للفردة الجديدة قاللي نسبة استهلاكك ٦٪ " و انا باعتذر لحضرتك عشان انت حا تضطر تدفع ٤٥ جنيه نظير استهلاكك و تاخد الفردة الجديدة ديه"
http://nileup.com/up/uploads/nilemotors_13655956573.jpg
و اعتذر تاني لعدم توفر نفس النقشة، بس قالي ده افضل عشان V و قاللي خليها استبن و لما تيجي تشتري كاوتش ابقي هات نفس النقشة ده بعد كده عشان كمان صوتها اهدي Ventus me 01 و هي افضل من Kinergy eco و خاصتاً في السرعات العالية. و قاللي احنا مش بنستورد النوع و ده خط إنتاج خاص بهيونداي.
اخدت الفردة مع صنايعي من الشركة و روحنا ركبناها عند محل اصلاح علي شارع الدقي الرئيسي و ها هي بعد التركيب.
http://nileup.com/up/uploads/nilemotors_13655956585.jpg
نصيحة أخيرة بلاش تركبها عند محل الإصلاح ده عشان جرحلي الجنط من الاطراف بالمكنة اللي بيطلع بيها الكاوتش من الجنط عشان كبس زيادة عليه.
http://nileup.com/up/uploads/nilemotors_13655956574.jpg
أرجو اني أكون أفدت قدر الإمكان.