السيراتو بتعوم بعد ال 120

**weels74** · 13-04-2013 08:59 AM

سيراتو 2011 جنط 17 اول مرة اركبها , وعلى طريق كويس بعد ال 120 العربيه بتعوم جامد فى كل الاتجاهات وبحس ان العربية بتخف جامد جدا , هل العربية كده فعلا ولا محتاجه يتظبط فيها حاجه , هوا وجودة الكاوتش مثلا او الزاويا , انا بصراحة خوفت لانى لسه نازل من اوبترا وبصراحه ثابتها كان كويس مع السرعات , عاوز رأيكم ايه اتعود على كده ولا ابص على حاجه فى العربية .

**M.Al-Hefnawy** · 13-04-2013 09:40 AM

أعتقد إنك محتاج تشوف زوايا العربية وتربط على العفشة كويس

**khaabas** · 13-04-2013 10:06 AM

مع احترامى السيراتو أكفء من الاوبترا بمراحل
ومن الواضح ان محتاج تعمل زوايا وترصيص وتشوف حالة الكوتش وتغيره اذا كان محتاج تغيير

**mhf_77** · 13-04-2013 10:19 AM

اول مره فى حياتى هدافع عن السيراتو
120 بتعوم يبقى فى حاجه غلط
وبالذات وانت جنط 17 يبقى فى حاجه غلط اكيد
هى اه مع السرعات العاليه ( 150 وانت طالع) بتخف بس طبعا مش لدرجة 120
راجع ضغط الاربع فرد 32
ونقشتهم نسبة المسح اد ايه
وضبط الزوايه
ولو فى رعشه راجع ترصيص
واربط عفشه كويس
وتوكل على الله

**lanos2004** · 13-04-2013 11:09 AM

العومان عفشه بايظه اكتر منه زوايا
الزوايا بتخلى العربيه تحدف يمين او شمال او العجل يصرخ جامد فى الملفات
انما العربيه لما تلاقى اعصابها بايظه اكيد عندك عيب فى العفشه وخاصه لو المقصات بايظه

**mahserry** · 13-04-2013 12:24 PM

بص يا باشا

انا من تقريبا سنة كان عندي نفس الكلام الي بتتكلم علية بالظبط كان معايا اوبتر 2008 مانيول بعتها و ركبت سيراتو 2010 high line جنط 17 و الحبشتكنات الي انت فاهمها
اول ما ركبت العربية كان الاربع فرد في الضياع غيرتهم بعد 1000 كم تقريبا و عملت صيانة و زوايا وجربت العربية الي180 كم/ساعة طيب اية الفرق بين الاثنين :
1- الاوبترا انعم بمراحل ودة علشان فرق من 14 حديد الي 17 اسبور وlow profile وحجات متنفعش مع مصر اساسا
2- السيراتو الاستجابة للموتور احسن شوية بعد ال100 من الاوبترا
3- السيراتو اثبت من الاوبترا في الملفات بس خلي بالك من حاجة (دة احساس فقط ) السيراتو العفشة بتاعتها فيها مشكلة مع اي ملف و مطب هوا تلاقي ظهر العربية بيلعب بيك مطبات الهوا بتحس انك في دريم بارك عكس الاوبترا عفشة منفصلة خلفية بتلاقي العربية ثابتة
4- السيراتو لو دخلت في فاصل من بتوع الدائري بتحس العربية بتلعب بس لو انت عارف كدة عادي لو هتتغاشم عليها هتقلبها .....

نرجع للمشكلة الي عندك :

ممكن يكون عند حاجة من :

1- الكاوتش ممسوح او فية عالي و واطي (من الطرق او مساعد بايظ ) دة مع ال17 مصيبة علشان الlow profile
2- العفشة و غالبا المقصات ربط عليها عند عفشجي مش بنزينة لانهم بيستسهلوا
3- شوف ممكن يكون في الزوايا العربية قالبة في الزوايا و السيراتو زاويا ثابتة فمع اي مطب جامد بتقلب زوايا و تحف معاك وتحس انك راكب 125 من غير صفرة في العجل و تبقي هتتجنن .
4- ظغط العجل و خصوصا مع ال17 لازم يكون 32 مش 28 دة هيخلي العربية تعوم و هيخربلك الفرد بس هيريحك شوية في الدبدبة .لازم 32
5- في ال17/215/45 كل الهنكوك الي بيركب فية سهم (نصف العجلة الخارجي ) لو مقلوب هيعمل معاك انك تكون ماشي و تحس العربية بتحدف و ترجع مع نفسها

دة و جهه نظري و ممكن حد تاني يفيدك اكتر

**weels74** · 13-04-2013 12:58 PM

شكرا ياوحوش الف شكر على الاهتمام وسرعة الرد , مبدئيا انا اول مرة اعرف معلومة ان الكاوتش يكون 32 انا على طول بظبط 30 , ثانيا هانزل ان شاء الله اشيك على العفشة والزاويا واشوف , مع انى او ل لما اشتريت العربيه روحت بيها مركز صيانه اسمه القاهرة اوتو اللى عند كوبرى الجيش بتاع اربعه ونص وشيكوا وقالولى ان العفشه سليمة وتمام , الكاوتش انا شكله حاسس انه لسه سليم النقشه لسه عاليه بس انا مش بفهم فى الكاوتش يعنى ازاى اعرف انه لسه كويس او كده , وان شاء الله اوفيكم بالتقرير , وشكرا ليكم

**2CODE** · 13-04-2013 04:05 PM

ما شاء الله يعني الاخوه افادوك جداً والحمد لله

**hmotors** · 13-04-2013 05:21 PM

بالنسبة لثبات السيراتو مشاء الله الأعضاء وضحو نقاط كتير، و طبعاً فى على اليوتيوب ناس قامت بتجربة العربية بطريقة معتقدش ان حتى شركة كيا عملت فيها كده بسرعات فوق ال 180 كم

[youtube]http://www.youtube.com/watch?v=sA5u6zCUhoc[/youtube]

[youtube]http://www.youtube.com/watch?v=XLvwMgTtwkg[/youtube]

.
.
اعتقد العربية ثابتة بشكل كبير ودى فئة اقل من الجنط ال 17 بكتير

مش عارف ثبات العربية دى هيكون ازاى ان بجد لما شوفتها متخيلتش انها بتمشى ده شكلو بيمشى علطول بس مبيلفش

[youtube]http://www.youtube.com/watch?v=1Rk-GUpI4Jk[/youtube]

بس نهاية التجارب والتفحيط ده بتكون وخيمة
زى الفديو ده فى هيونداى سوناتا وفى فيديوهات مؤلمة بشكل كبير اكتر من كده ربنا يحفظنا يارب

[youtube]http://www.youtube.com/watch?v=IS1OZ4_ztOc[/youtube]

تمنياتى لحضرتك بحل المشكلة والسلامة،