المشاركة الأصلية كتبت بواسطة HHALAWANY
السلام عليكم ورحمة الله وبركاته ، يا شباب السوزوكي :)
عشان ما اطولش عليكم وعشان ماكتبش مواضيع كتيير ورا بعض حبيت اكتبلكم كذا سؤال في دماغي في موضوع واحد .... وعشان في النهاية انا وغير من اصحاب الماروتي الجداد كلنا نستفاد
قبل اي سؤال احب اذكركم اني شاري عربيتي "سوزوكي ماروتي" جديدة زيرو
اولا : لما باجي انقل اي نقله سيان من الاعلى الى الاقل او العكس ، العربية بتنط مني
ياعني زي ماتقولوا كده كأني بدوس فرامل ووراها بنزين مرة واحدة !!
مع العلم انها مش بتبطل مني والحمدلله
ولاكن مشكلتي هي وزي ماقلتلكم في النقلات ، مجرد اني انقل اي نقلة ما "بعد الاول طبعا" بحس ان العربية بتنط !!
ناس قالولي لما تيجي تنقل تشيل رجلك على طول من الديبرياج مرة واحدة ..
عملت كده طبعا ولا المشكلة معاية موجودة برضو
وناس تانية قالتلي اني مادوسش بنزين وانا بشيل رجل وبرضو النتيجة هي هي !!
لاكن انا لما بنقل واشيل رجلي براحة كده من الديبرياج وفي نفس الوقت بزود بنزين على خفيف .. ساعتها العربية بتنط مني اه ، بس مش جامد اوي
انا بقا عاوز اخليها تبقى سلسة معايا ..ولحد النهاردة مش قادر افهم اي السنس بتاعها او ايه الغلط اللي انا بعمله لما باجي انقل .....
الموضوع من رجلك مع التعود هتجيبها اعمل حسابك نقلة الأول مش زي باقي النقلات و النقلة في السرعات القليلة مش زي السرعات العالية
الأول واحدة واحدة هتطلع عادي لكن باقي النقلات انقل شل دبرياج و حط في نفس اللحظة بنزين و عشان تتعود روح مكان فاضي و افضل انقل ع التاني و التالت لحد ما تتعود
ثانيا :
بما اني كفتة على بفتيك في موضوع العربيات ده عامتا .. فانا بصراحة مش عارف اعمل اي تظبيطات ، عارف ان بعض الاخوة قالولي سنترلوك وانزار وليد ابيض واستيكر مثلا .. وغيرهم ..
بس مشكلتي اني فعلا مش عارف انواع ومش عارف حد معين ارحله !! ، كمان انا مقلق ان حد يديني حاجة وحشة او يشتغلني في فلوس وخاصتا اني لوحدي وماعيش حد يكون بيفهم معايا !!
وحتي لو اشتريت شيء ما ، برضوا هاحتاج اني اروح لحد يركبهولي زي الكاسيت مثلا !!
وبرضوا خايف ان اعمل اي حاجة في العربية يجي التوكيل يقولي انها خرجت كده من الضمان ويغلس عليا !!!
فهل اجيب وخلاص وزي ماتيجي تيجي ، وادور انا على كهربائي او اي صنيعي ايا كان واقوله اعملي كذا ولا استنى لما اتحصل على الشخص اللي ممكن يفيدني اكتر ويجي معايا ؟؟
ولا اعمل ايه ؟؟
للعلم اي حاجة هتركبها التوكيل هيقولك الضمان
بخصوص الانذار و السنتر وولف نوع محترم جداااا و توكيله في اخر جسر السويس ورا اسواق القنال الاتنين بـ300 ج بالتركيب
بخصوص الساوند سيستم عامة انسي حوار الكاسيتات و الانواع الصيني اللي مش باين لها معالم جيب حاجة سي دي و فيها فلاشة و aux و السماعات كذلك
بس قبل اي حاجة لازم تقولي ميزانيتك اخرها كام للساوند سيستم حتي لو هتجيب نص العدة و تكملها قدام بالاضافة انك انسي الرف اللي ورا فصل رف كونتر او mdf
رد عليا و هبقي اشرحلك باقي حوار التركيبات و الاماكن
ثالثا :
هل فيه اماكن قريبة من وسط البد تانية بتبيع اكسسوارات عربيات وكاسيتات كويسة غير التوفيقية
هل في واحد كويس ممكن ارحله في وسط البد او المهندسين او الجيزة يركبلي الكاست مثلا
وهل هو بيبقى عنده الكاسيت اشترية واركبه منه ولا اروح اجيبه الاول من حتة تانية وباعدين اروحله اركبه بس ؟؟
عايز اي حاجة قدامك مكانين التوفيقية و ش دمشق
بس نصيحة انزل التوفيقية يوم الجمعة الصبح قبل الصلاة عشان لو نزلت اي يوم تاني هتدعي عينا ههههههههههههه
رابعا :
شوفت نوع كاسيت فلاشة بس اسمه "وولف" ب300 جنيه تقريبا .. حلو ده ممكن اجيبه ولا وحش ؟؟
كمان هل ممكن يتركب عندي عادي جنب الساعة مثلا .. بس طبعا هايتطر يقص ولا لأ
والاهم من ده وده الضمان او التوكيل مش هايغلس عليا فيه ؟؟
والمهم برضوا .. السماعات بتاعة الكاست بتتجاب بمقاسات معينة "كعرض او عمق" ولا اي سماعة على حسب الخامة او النوع تتركب على الباب مثلا وخلاص !!!؟؟؟ والافضل كام واات ؟؟
رد عليا في الاسئلة اللي فوق و هقولك ع الهيد يونت و السماعات و كل اللي انت عايزه
خامسا :
انا شفت دريكسيون احمر في اسود بس صغير شوية شكله عجبني .. ممكن اجيبه واركبه عادي عند اي حد ولا مايحبزش دلوقتي الموضوع ده وهل سهل تركيبه ولا معقد وهايطول ؟
ولو فرضا عادي مش خطر مثلا اركبه عند مين ؟؟؟
نصيحة متشيلش الطارة الفبريكة و للعلم الطارات اللي بيتقال عليها سبور هتعملك مشاكل في الدورانات لأن قطرها اصغر تلاقيك لفيت الطارة 4 لفات و كنت بتلفها لفتين بس و كمان عشان محدش يخربلك حاجة سيبها زي مهي
ممكن تجيب طارة كسوة و ديه اسعارها من 15 فيما فوق ع حسب الخامة و الشكل بس لازم تجيب ع المقاس بالظبط
وشكرا ...
باعتذر جداااااا على الاطالة والرغي .. بس بجد انا حاسس اني لوحدي ومحتاس في بعضي ومحتاج استفسر على كام سؤال ؟؟
وشكرا للمرة التانية ؟؟
واتمنى الرد على حسب النقط الموضحة كلها نقطة نقطة :)
تحياتي