الموضوع: كام سؤال كده هايفيد المبتدئين :)

المشاركة الأصلية كتبت بواسطة HHALAWANY

السلام عليكم ورحمة الله وبركاته ، يا شباب السوزوكي :)

عشان ما اطولش عليكم وعشان ماكتبش مواضيع كتيير ورا بعض حبيت اكتبلكم كذا سؤال في دماغي في موضوع واحد .... وعشان في النهاية انا وغير من اصحاب الماروتي الجداد كلنا نستفاد

قبل اي سؤال احب اذكركم اني شاري عربيتي "سوزوكي ماروتي" جديدة زيرو

اولا : لما باجي انقل اي نقله سيان من الاعلى الى الاقل او العكس ، العربية بتنط مني
ياعني زي ماتقولوا كده كأني بدوس فرامل ووراها بنزين مرة واحدة !!
مع العلم انها مش بتبطل مني والحمدلله
ولاكن مشكلتي هي وزي ماقلتلكم في النقلات ، مجرد اني انقل اي نقلة ما "بعد الاول طبعا" بحس ان العربية بتنط !!

ناس قالولي لما تيجي تنقل تشيل رجلك على طول من الديبرياج مرة واحدة ..
عملت كده طبعا ولا المشكلة معاية موجودة برضو
وناس تانية قالتلي اني مادوسش بنزين وانا بشيل رجل وبرضو النتيجة هي هي !!
لاكن انا لما بنقل واشيل رجلي براحة كده من الديبرياج وفي نفس الوقت بزود بنزين على خفيف .. ساعتها العربية بتنط مني اه ، بس مش جامد اوي
انا بقا عاوز اخليها تبقى سلسة معايا ..ولحد النهاردة مش قادر افهم اي السنس بتاعها او ايه الغلط اللي انا بعمله لما باجي انقل .....

بص حاول وانت بتنقل متعملش اللى بتعمله مع الاول يعنى وانت بتنقل سيب بنزين دوس دبرياش انقل فى الثانيه اللى بتنقل فيها دى شيل رجلك على طول من الدبرياش ونفس اللحظه بنزين وخلى بالك كل الكلام ده عادى فى الاول مع الوقت هتعرف السنس بتاع الدبرياش والبنزين والفرامل ومش بعيد نلاقيك نازل فى اوتوكروس ولا حاجه

ثانيا :
بما اني كفتة على بفتيك في موضوع العربيات ده عامتا .. فانا بصراحة مش عارف اعمل اي تظبيطات ، عارف ان بعض الاخوة قالولي سنترلوك وانزار وليد ابيض واستيكر مثلا .. وغيرهم ..
بس مشكلتي اني فعلا مش عارف انواع ومش عارف حد معين ارحله !! ، كمان انا مقلق ان حد يديني حاجة وحشة او يشتغلني في فلوس وخاصتا اني لوحدي وماعيش حد يكون بيفهم معايا !!
وحتي لو اشتريت شيء ما ، برضوا هاحتاج اني اروح لحد يركبهولي زي الكاسيت مثلا !!
وبرضوا خايف ان اعمل اي حاجة في العربية يجي التوكيل يقولي انها خرجت كده من الضمان ويغلس عليا !!!
فهل اجيب وخلاص وزي ماتيجي تيجي ، وادور انا على كهربائي او اي صنيعي ايا كان واقوله اعملي كذا ولا استنى لما اتحصل على الشخص اللي ممكن يفيدني اكتر ويجي معايا ؟؟
ولا اعمل ايه ؟؟

معتقدش ان الضمان ممكن يقولك حاجه على موضوع التعديل ده لانها عربيتك وانت حر فيها طالما كل حاجه شغاله فى العربية وزى ماهى هيقولك مليش دعوه لو الحاجة دى باظت واى كهربائى نضيف هيعملك اللى انت عاوزه هو مش هيعمل عملية جراحية يعنى

ثالثا :
هل فيه اماكن قريبة من وسط البد تانية بتبيع اكسسوارات عربيات وكاسيتات كويسة غير التوفيقية
هل في واحد كويس ممكن ارحله في وسط البد او المهندسين او الجيزة يركبلي الكاست مثلا
وهل هو بيبقى عنده الكاسيت اشترية واركبه منه ولا اروح اجيبه الاول من حتة تانية وباعدين اروحله اركبه بس ؟؟

بص فى اماكن كتير لموضوع عدة الصوت ده بس فى الاول وفى الاخر الموضوع ليك انت يعنى هتركب حاجة نضيفة هتعيش معاك وهتلاقى كل اللى انت عايزه فى التوفيقية إن شاء الله لاننا كلنا بننزل نجيب حاجة العربية من هناك سواء تظبيط او حاجة فى العربية والحرفيين برضه فيها الكلام ده

رابعا :
شوفت نوع كاسيت فلاشة بس اسمه "وولف" ب300 جنيه تقريبا .. حلو ده ممكن اجيبه ولا وحش ؟؟
كمان هل ممكن يتركب عندي عادي جنب الساعة مثلا .. بس طبعا هايتطر يقص ولا لأ
والاهم من ده وده الضمان او التوكيل مش هايغلس عليا فيه ؟؟
والمهم برضوا .. السماعات بتاعة الكاست بتتجاب بمقاسات معينة "كعرض او عمق" ولا اي سماعة على حسب الخامة او النوع تتركب على الباب مثلا وخلاص !!!؟؟؟ والافضل كام واات ؟؟

خامسا :
انا شفت دريكسيون احمر في اسود بس صغير شوية شكله عجبني .. ممكن اجيبه واركبه عادي عند اي حد ولا مايحبزش دلوقتي الموضوع ده وهل سهل تركيبه ولا معقد وهايطول ؟
ولو فرضا عادي مش خطر مثلا اركبه عند مين ؟؟؟

لا هو الموضوع مش معقد ولاحاجه هو هيفك الطارة اللى عندك ويركبلك التانية بس انا شايف انك تتعيش مع الطارة دى شويه لحد ماتتمكن منها خالص وبعد كده شوف لو مش حاببها ممكن تغيرها ولو حسيت التانية مش عجباك بتركب طاره العربية تانى

وشكرا ...
باعتذر جداااااا على الاطالة والرغي .. بس بجد انا حاسس اني لوحدي ومحتاس في بعضي ومحتاج استفسر على كام سؤال ؟؟
وشكرا للمرة التانية ؟؟

واتمنى الرد على حسب النقط الموضحة كلها نقطة نقطة :)

تحياتي

شكرا M!do على الاهتمام :)

ايه ياشباب .. 24 مشاهدة ومافيش غير واحد بس معلق !!
قول اللي في نفسك يمكن تفيد برضو :)

المشاركة الأصلية كتبت بواسطة waelgam2005

انا هرد عليك فى حتة النقل انا كنت برضه كدا فى الاول ومش عارف اخد على العربية اول ما استلمتها عشان حوار النقل ده بس اخدت عليها وانت ان شاء الله هتاخد عليها انت بس خد بالك وانت بتنقل الاول متشلش رجلك من على الدبرياج مرة واحده وسايسها وحمل بنزين وسيب دبرياج يعنى نسبه وتناسب اللى تدوسه فى البنزين تشيلو فى الدبرياج لحد ما تسيب الدبرياج خالص طبعا موضوع النسبه والتناسب ده هيقل فى النقلات اللى اكبر بعد كدا يعنى لما تيجى تنقل على التانى رفع رجلك من على الدبرياج هتبقى اسرع حاجات بسيطه وطبعا التالت سرعه رفع رجلك من على الدبرياج هتبقى اسرع والرابع طبعا هتبقى اسرع لكن بلاش تشيل رجلك مرة واحده دى من على الدبرياج وخاصة فى الاول والتانى لانها اكيد هتنط منك

جزاء الله خير يا باشا ... شكرا على المعلومة وجاري التنفيذ :)