ايه اللى جاب الدولار للصاج ؟

**amr 2** · 14-04-2013 03:52 PM

بسم الله الرحمن الرحيم
ايه اللى جاب الدولار للصاج ؟ نازل اشترى ( و انا من المنصورة ) شويه صاج للعربيه الريتمو علشان هدخلها سمكرة وبوهيه . و إذ بى افاجاء بزيادة الاسعار بشكل لافت للنظر وكلهم بيقولك الدولار وازمته مع انى متاكد ان الصاج دة من صنع مصانع مصريه 100 % .
يعنى مثلا لما تلاقى جوز الاعتاب ب 200 جنيه . وجوز الدوران الخارجى الخلفى ب 100 جنيه . وجوز الفجاوى الخارجيه ( مش البطيخ ) ب 100 جنيه ولسه السمكرى عايز نصف لوح صاج يشتغل بيه . يبقى دخلت فى 500 جنيه صاج فقط غير اجرة السمكرى .
وبعدين تلاقى علبه المعجون بيقولوا زاد سعرها 8 جنيه والله اعلم كيلو البويا وصل كام ( دول فعلا فيهم حاجات استيراد ) وايجار الفرن كام ؟ والفرش حل وتركيب و حل الماتور والتانك وتركيبهم
يعنى بالصلاة على النبى شكلها هتوصل لـــ 3000 جنيه بتظبيط الاكصدام والكهرباء . والله العمليه ماعدتش جايبه همها فى الاخر راكب ريتمو وكل الفلوس اللى هتتصرف دى مش هترفع من سعر العربيه .

ياريت اللى يعرف اسعار الخامات والخدمات يقولى علشان يبقى عندى فكرة . زى مثلا ( علبه المعجون ؟ علبه معجون الفايبر لزوم الاكصدام ؟ كيلو البويا للفرن عادة مش ميتالك بالمثبت ؟ اجرة السمكرى بالتقريب كدة ( تغيير اعتاب ودورانات خلفيه وفجاوى وتلقيط كام حاجه على الماشى كدة ) ؟ ايجار الفرن او تكلفه الرش ؟ يعنى اللى جرب ممكن يحكى عن تجربته وله جزيل الشكر .

**lanos2004** · 14-04-2013 04:00 PM

استهبال فى اى حته
مافيش ضمير عند البشر

**ahmedteam** · 14-04-2013 04:34 PM

كل الناس سايقه الهبل طالما مفيش رقابه من حد

ربنا يعدى الايام دى على خير

**blazer** · 14-04-2013 05:38 PM

انا حجزت لاب توب يوم الجمعه من موقع على النت وعملتله اوردر
لاقيتهم بيكلمونى السبت بيقلولى الاب زاد سعره 450 جنيه!
بقله وانا مالى انا حاجز
قالى معلش اصل الدولار زار
فقلتله زاد ايه!!!!!
دا نقص انهارده 75 قرش
معرفش يرد وفضل يستهبل
حسبى الله ونعم الوكيل