اية الباركينج سنسور دة يا جماعة وبيعمل اية بالظبط أرجو الافادة؟

**mafia888** · 11-08-2008 01:14 PM

عاوز اعرف اية الباركينج سنسور دة يا جماعة ..هوا من معنى الكلام كدة انة حاجة بتفيد فى الركنات بس عاوز اعرف بيشتغل ازاى ومفيد لأى درجة من فضلكوا....مع جزيل الشكر...

**hazem_khidr** · 11-08-2008 02:39 PM

الباركنج سنسور
عباره عن حساسات بتركب في الاكصدام الخلفي
و بتنبهك لما بتقرب من اي حاجز خلفي و انت بتركن
سواء الحاجز دا كان حيطه او عربيه او عامود الخ الخ
و بيبقي عندك شاشه في العربيه من جوه بتقيس فاضلك كام متر علي ما تلزق في الحاجز دا.
فيه منه انواع بيبقي صفاره بس من غير شاشات

**Mystique** · 30-10-2008 06:05 PM

المشاركة الأصلية كتبت بواسطة hazem_khidr

الباركنج سنسور
عباره عن حساسات بتركب في الاكصدام الخلفي
و بتنبهك لما بتقرب من اي حاجز خلفي و انت بتركن
سواء الحاجز دا كان حيطه او عربيه او عامود الخ الخ
و بيبقي عندك شاشه في العربيه من جوه بتقيس فاضلك كام متر علي ما تلزق في الحاجز دا.
فيه منه انواع بيبقي صفاره بس من غير شاشات

بالظبط كدة زي ما أستاذ حازم قال

أنا مركباه عندي ب 350 جنيه

وليه شاشة بتقوللك مكان العائق بالنسبة للعربية (يعني وراها فالنص..على الناحية اليمين..ولا الشمال)..بالإضافة لتحديد المسافة الباقية بالأمتار وإعطاء صفارة متقطعة بيزيد سرعتها مع اقتراب العائق وف الآخر لما تقرب أكتر من حوالي 30 سم بيقوللك STOP

بيحس بكل العوائق..رصيف..عجلة..موتوسيك ل..حتى لو عمود رفيع أو جذع شجرة..أنا عندي بيحس بعواميد النور -اللي على حرف الرصيف- اللي على طرف العربية الخلفي يمين أو شمال..مش بيكونوا ورايا حتى فعلا.

مفيد جدا طبعا -خصوصا للي لسة محفظش ابعاد عربيته كويس أو بيخاف يقرب من اللي ورا قوي وف الحقيقة بتكون المسافة أكبر مما هو متخيل وهو جوة العربية- بيخليك بتركن ف أصعب الأماكن من غير ما حد يوقفلك وتقدر تزنق عاللي وراك لحد آحر كام سنتي من غير ما تريح عليه..برضه مفيد لو بترجع بضهر العربية ف شارع وفيه مشاة ورا العربية..أو طفل صغير -وده طبعا مش بيبان أبدا من الازاز ولا المرايات- بينبهك ليه.

**washable** · 01-11-2008 04:24 PM

اخى ماستيك كنت عايز اسالك انت مركبه فين ؟؟
انا ميعايا هوندا سيتى ؟؟ و بفكر اركبه

**Mystique** · 01-11-2008 10:26 PM

المشاركة الأصلية كتبت بواسطة washable

اخى ماستيك كنت عايز اسالك انت مركبه فين ؟؟
انا ميعايا هوندا سيتى ؟؟ و بفكر اركبه

على فكرة انا اخت

وأنا مركبة السينسور ف أسيوط فللأسف مش هقدر أفيدك مين يركبه ف القاهرة..بس أنا قريت موضوع هنا ف المنتدى عن محل أوبشن اللي ف 6 أكتوبر عنده حد بيركب الأجهزة وشكل شغله نضيف

هو على فكرة بيركب على أي عربية عادي وتركيبه مش صعب ولا محتاج مهارة للدرجة..هو محتاج دقة في خرم الاكصدام مكان الحساسات وبعدين التوصيلات العادية مع كهربة العربية.
بس لو عربيتك لسة ف الضمان ومش عايز تضيعه..بلاش تركبه بره التوكيل عشان ضفيرة الكهربا بتطلع بره الضمان

بالتوفيق

**د./اليشع ثابت** · 09-11-2008 03:50 AM

شكراااااااا يا رجالة على التوضيح و المجهود

بس هل ينفع يتركب كمان فى الاكصدام الامامى ولا لاءءءء

وشاكر لكم كل مجهود رائع و مفيد

**Shocky** · 11-08-2008 02:46 PM

زى ما الاستاذ حازم قاللك كدة
ودة شكلة على الاكصدام الخلفى لما يكون نازل فى العربية اصلاً

وبيتباع هنا فى مصر بس الدواير دى لونها اسود وفى ناس بترشها رش خفيف عشان تكون لون العربية

**Ibtal** · 11-08-2008 04:16 PM

it can also be in the front bumber for which the driver can not see its front bumber.

**Defender** · 13-08-2008 11:14 AM

ممكن نعرف تمنه غالي ولا رخيص

وبيعتمد علي موجات نوعها ايه

**Shocky** · 13-08-2008 01:45 PM

المشاركة الأصلية كتبت بواسطة mountofgem

ممكن نعرف تمنه غالي ولا رخيص

وبيعتمد علي موجات نوعها ايه

بالنسبة للأسعار بيبدأ من 250 جنية تقريباً
وفى اغلى من كدة كتير

بالنسبة لنوع الموجات مش عارف بالظبط لكن هو اشارتة بتعلى كلما اقتربت من حاجة ورا العربية رصيف او عربية تانية مثلاً

ودى صورة تشبة اللى موجود فى مصر