الموضوع: صيانة الـ 5000، وتجربة سيئة!

المشاركة الأصلية كتبت بواسطة D . a .\ AYMAN

أقولك بقة على الحل اللى أنا بعمله دايما مع الصفارة دي لما كانت بتظهر عندي بسبب أن نوع التيل وحش ... تجيب الزجاجة بتاعة الـ wd-40 اللى هو مزيل الصدأ وترش منه شوية على الطنابير من الناحيتين وعلى التيل برضه من الناحيتين شوية ... وجرب الأول العجلتين اللى قدام فقط .. ولو لاقيت في صوت لسة جاي من ورا يبقى رش عليهم همة كمان ... عشان برضه تتأكد الصوت كان جاي من ورا ولا قدام ... وبعد كدة إنسى صوت الصفارة ده لمدة لا بأس بها من الزمن ... وبإذن الله ليس له آثار ضارة ولا على التيل ولا الطنابير

بس هاتضطر تفك الكاوتش عشان تعرف توصل للطنابير والتيل اللى من جوة

...

أنا تجربتي معاهم .. إني فضلت منتظر لغاية الساعة 5 ونص عشان يضبطو الزوايا ويارتهم ما ضبطوها ... لأني ضبطتها برة برضه بعدهم ... همة للأسف فنيا ولا ليهم لازمة

عشان كدة أنا هاروح لعصام بإذن الله في المستقبل .. لمجرد المحافظة على الضمان ليس إلا وطبعا هو كويس في الصيانات برضه مش وحش ... وبينجز جدا في الوقت

والف مبروك الصيانة ... وربنا يباركلك في عربيتك ويحفظهالك اللهم آمين

جزاك الله خيرًا يا أيمن باشا. إن شاء الله أعمل بالنصيحة القيمة دي، وتأتي بنتيجة طيبة.

بس شكلي هأروح متابعة لصيانة الخمسة، عشان موضوع مؤشر البنزين المعلق ده. المؤشر كان شغال زي الفل، وأنا ورايح الصبح، فولت العربية من بنزينة شيل الموجودة في شارع التسعين عند المستشفى الجوي. روحت أبو رواش ورجعت، والمؤشر على وضع الـ Full tank!

يبدو أن العربية بطلت تستهلك بنزين...دي بركة عز العرب!

المشاركة الأصلية كتبت بواسطة al-farooq

+111

بس ياريت ال wd-40 يبقي بعد ما تركن العربية وهستخدمها تاني يوم ، يعني مترشتش و تخرج بيها ، انت ترفع فرامل اليد بعدين ترش بين التيل والطنبورة ، وبعدين تحرك العربية سنة قدام وترش ، وترجع تحركها سنة للخلف وترش ، و بعدين تركنها على كدة ، وتاني يوم وانت ماشي على الهادي تتأكد من الفرامل بتاعتك زيادة فى الأمان.

انا بعاني من صيانة عز العرب ، خصوصاً موضوع اللطعة دي ، والله حرام عليهم المفروض يشوفوا لهم حل ويخلصوا صيانة بسرعة ، يا إما يفتحوا فندق نجمة واحدة ولا من غير نجوم خالص حتي جنبهم الواحد ينام فيهم الخمس - ست - سبع ساعات دي.

انا عملت قبل كدة صيانة فى العجوزة كانت كويسة واتلطعت بردو بتاع 3 ساعات تقريبا بس كدة يعتبر في الانجاز مش زي الصحرواي ، اعتقد على السمعة عصام صفا اسرع واحد ، بس علشان اروح له دة سفر.

الف مبروك للصيانة ، وعقبال المليون.

بارك الله فيك أخي الفاروق، وشكرًا يا ريس على التتمة والإضافة القيمة دي لكلام أخينا الأستاذ أيمن.

المشكلة يا باشا في ظني عدم وجود نظام، وهرجلة، وسوء إدارة للوقت يعني قسم الميكانيكيا فضي كذا مرة، والعربية ملقحة برا، وعربيات جات بعدي، وتدخل وتخرج، وتخلص وتشمي. وناس تانية ملطوعة متذنبة...

الحاجة إللي لاحظتها فعلا، وده سمة غالبة في معظمنا كمصريين عمومًا، أن الفنيين والمهندسين، مش شغالين بقلب، يعني مش مقبلين على الشغل ولا توجد همة، يعني بيقضوا وقت، ويعدوا ساعات وخلاص، وعلى قد فلوسهم، على أساس أننا بنعمل صيانة ببلاش!

فضلاً عن الاستهتار والاستهبال، يعني كان عندي صوت في صيانة الألف، وجاي من الحوض. وقتها فكوا فرش القوائم الأمامية الفيبر فوق البرابريز الأمامي مع أنه ما فيش علاقة، والفني إللي فكهم، جاي يركبهم، تعافي واتغاشم على واحدة منهم كسر الكلبسة بتاعتها! وأنا ما أخدتش بالي غير من أسبوع تقريبًا، لقيتها مش راكبة كويس، فاتفكيت، وبأبص كده بعد ما وقعت، لقيت كلبسة مكسورة من الكلبسات الاربعة المثبتة لها!

حسبنا الله، ونعم الوكيل.

المشاركة الأصلية كتبت بواسطة raul_7

بطل تتعامل مع التوكيل و خليك مع عصام صفا هترتاح نفسياَ, كفاية ان العربية بيعملوا فيها كل حاجة ورا بعضها من غير لطع و بينجزوا.

إن شاء الله، شكله كده حيصل بإذن الله.

المشكلة أن لما جبت العربية جديد، كان في صوت خروشة أو بقللة مع دوسة البنزين، جاي من ناحية الحوض يمين. فكنت قريب على المركز، قولت أعدي أطمن على العربية، وكانت عاملة 600 كم، المهم رفعها وبص عليها، قالي محتاج تغير حاجتين:

بلية شداد
وطلمبة مياه

وده عيب عام في برسونا 2013، بل في ناس عندها عيب صناعة في الدينامو!

قالي روح اعمل الصيانة الألف في عز العرب، وإن شاء الله، يغيروهما لك في الضمان. قفلني من العربية. قولت كتر خيرك يا ريس، طيب البلية والطلمبة موجود في مرار العرب ده. قالي دي حاجة متوافرة على طول.

المهم روحت في صيانة الالف عز العرب، لم يقتنعوا بتخميني أن البلية والطلمبة عايزين يتغيروا حسب ما قولت لهم بناءً على طلب الباشمهندس عصام، والحاجة مش متوافرة عندهم ولسه هيبعتوا يجيبوها من كوالالمبور. غيروا وقتها سير الكاتينة لأنه كان عليه رمل. والصوت ما رحش!
بس الحمد لله والفضل له، الصوت اختفى وحده بعد ما وصلت 2000 كم، ولم يظهر مرة أخرى!

فمن وقتها حاسس أنه أسهل حاجة عندهم التغيير، والله أعلم.