الموضوع: تقرير بتجديد رخصة الماروتى لسنة واحدة بدون فحص

[overline]

ازيكو يا رجاله عاملين ايه؟
انا النهارده قولت لازم اعتمد على نفسى واروح اجدد الرخصه لوحدى مع انى مش فاهم اى حاجه فى اى حاجه
اول خطوة عملتها جبت شهادة المخالفات من نيابة المرور عندى فى العاشر وللاسف مكنش ليهم مكتب جوا المرور جبته من مكان عندى تانى كدا جبت صورة من البطاقة والرخصة وادتها للموظف بعديها بعشر دقايق قالى معلهاش مخالفات وتعالى كمان ساعه استلمها قولت كويس بس الوقت ده كله اعمل فيه ايه روحت رايح المرور وقولت اعمل شوية هبل واستفاد بالساعه دى بدل ما استنى الشهادة لما تطلع
روحت مرور العاشر من رمضان وجبت ورق تجديد رخصة ملاكى بدون فحص ودفعت 3 جنيه تقريبا وبعديها روحت عملت وثيقة تأمين اجبارى ودفعت 82 جنيه واخدت الورق وروحت لموظف ترخيص الملاكى قطعت ورقة السداد عشان الحق الخزينة قبل ما تقفل الساعة 12 الموظف كتب فيها انى ادفع 150 جنيه روحت دفعتهم فى الخزينة وجبت استمارة 51 او مش فاكر كانت 151 المهم كانت بسته جنيه تقريبا او عشرة مش فاكر برضه جبتها وقشرتها من الظابط ووقفت على شهادة المخالفات
روحت راجع تانى للنيابة كانت الشهادة طلعت اخدتها وروحت رايح على المرور تانى وادتها للموظف الدوسية كله دبسهم فى بعض وقالى استنى شوية لما انده عليك واستنيت شوية لحد ما البينات دخلت الكمبيوتر ونده على اسمى وادانى ورقة انى استلم الرخصة الجديدة روحت استلم الرخص الجديدة لقيت الشبكة واقعه كانت ساعتها الساعه 12 ونص تقريبا ووقفت شوية وزهقت وروحت ماشى قولت خليها بكره استلم الرخصة بدل الوقفة .
اجمالى التكلفة 150 +82+6+3= 238
ودى كانت رحلتى مع المرور

[/overline]

المشاركة الأصلية كتبت بواسطة wael_kamel

انا شايف ان ده انجاز ولازم تفتخر بيه مش كل وحدات المرور تقدر تعمل كل الاجراءات فى يوم واحد
السلام صعب قوى
حلوان بعيد عنك
النزهه جميل جدا ممكن تخلص فى ساعه
مبروك ياباشا

صدقنى انا مصدقتش نفسى بصراحه انى عملت ده كله لوحدى اصل انت متعرفش انا ابيض فى حوار الورق ده او انى ادخل مصلحة حكومية واخلص ورق فما بالك بالمرور بقى انا قولت اجرب ياصابت يا خابت والحمد لله طلع اللى تخاف منه ميجيش احسن منه :)