الموضوع: تقرير مفصل عن تويوتا يارس 2011 مواصفات خليجي ( سعودي )

العربية موديل 2011 ياباني 1300 سي سي سعودي ثمنها 52000 ريال كاش

الكماليات
اوتوماتيك - سنترلوك - ريموت كنترول - زجاج كهرباء في الاربعة ابواب - ABS - عدد 2 ايرباج - مرايات كهرباء - رفع وتنزيل كشافات العربية لفوق وتحت - صندوق بين الكرسيين الاماميين لوضع الاغراض

تم استخدام العربية لمدة سنتان وعاملة 68000 كيلومتر

المميزات
نعومة الدركسيون والباور
ارتفاعها عن الارض مسافة كويسة فلا تحك في المطبات
التسارع جيد داخل المدينة لكنة علي الصحراوي يحتاج الي وقت علي السرعات العالية فوق 140 كيلومتر
العربية قوية وتتحمل المشقات فبطبيعة عملي مهندس مدني كنت بخش بيها المواقع ومطلع عنيها لكن لم تشتكي ولم يتاكي الكاوتش حتي الان
التكيف قوي علي السرعات العادية داخل المدينةويبشد جدا فوق 100 كيلومتر وانت طالع فبظر اننا اقفل بعض فتحات التكيف من السقعة
التقفيل كويس ورغم المطبات والتراب لم اسمع اصوات تزييق للعربية حتي الان
لم اعمل صيانة للعربية غير تغيير زيت الماتور وفلتر الماتور وتنظيف فلتر الهواء فقط كل 5000 كيلومتر
تم تغيير تيل الفرامل الامامي عند 35000 كيلومتر
وتم تغيير البطارية عند 40000 كيلومتر
بمشي بيها كتير علي سرعة 190 كيلومتر وكنا اتنين في العربية
والعربية بيتقفل بيها العداد علي 200 بس بياخد وقت عبال لما العربية تجمع
الفرامل جيدة وبتوقف العربية علي سرعات عالية
استهلاك البنزين قليل لا يذكر
وجود مخابئ كتيرة لوضع الاغراض
سماعات العربية كويسة وقوية جدا و Bass كان كويس وسماعات اليارس احسن من الكورولا بمراحل كبيرة
فتح تنك البنزين والشنطة من الداخل
وفتح الشنطة بالريموت كنترول يفتح الشنطة ويخليها متواربة وجود Fog Lights كان لذيذ ومبيخبطش في المطبات

العيوب
اول مجيت اسافر بالعربية علي الصحراوي وجبت 140 كيلومتر كانت هتجيلي سكتة قلبية بسبب عدم الاتزان ولما العربيات تعدي من جنبيك بسرعة بتحرك عربيتك وكانها ريشة ومع التعود وحفظ عادات العربية بقيت اسوق عادي علي 180 كيلومتر بس لازم تمسك الدركسيون بايدك الاتنين استحالة تسوق اليارس علي السرعات دة بايد واحد وتشوف العربيات اللي تعدي اسرع منك عشان تعمل حساب رجة عربيتك ولكن تبقي المشكلة في حالة وجود رياح كانت العربية تقلب مراجيح فطر امشي علي 80 كيلومتر بس طبعا رياح السعودية لا تقارن برياح مصر ( السعودية اشد بكتر )
الصاج ضعيف جدا واقل خدشة تعلم عليه
لا يمكن اعتبار الكنبة ضيقة لان اصلا حجم العربية صغير
عدم وجود دواسة مسند للرجل الشمال في الاوتوماتيك
فقر اكسسوارات وجماليات التابلوة بس لانهم اصلا مصنعين العربية عشان تخدم شريحة معينة من الناس من ناحية الدخل
الكاست كان شرائط وCD مع بعض وCD كان Audio فكان اخرة 16 اغنية
عدم وجود فتحة USB or AUX
ضعف العزل الصوتي والحراري فكنت بسمع صوت الماتور وانا جوة العربية وقافل الزجاج ولما بقفل التكييف بحس بحرارة الماتور عند رجلي بنسبة بسيطة
عدم وجود انذار
والعربية دايرة كنت تتهز جواها تحس انك قاعد فوق الماتور من الهزة فمكنتش اعرف انام جوة العربية وهي شغالة ودة بسبب حاجة في ماص صدمات واهتزازات الماتور
التراب كان بيلزق علي التابلوة ومبيتشلش بمنديل لازم تعملة بفوطة وماء

استخدام العربية كان لوحدي وساعات واحد جنبي ونادرا جدا لو حد قعد علي الكنبة

_________________________

اللون الاحمر للمداخلات الادارية فقط
يرجى مراجعة قواعد المنتدى
م.ع 7

المشاركة الأصلية كتبت بواسطة janagabr

جزاك الله كل خير علي الافادة
انا غيرت فلتر الهواء مرة واحدة
والمياة عمرها ما نقصت من ساعت ما اشترتها مزودتش مياة غير مرة واحدة لحد معملت بيها 67000 كيلو
ولا غيرت بوجيهات ولا اي حاجة من الكلام دة
ورغم كدة عمرها مابطلت مني ولاهنجت ولا قطعت ولا حرارة عليت نسيت اصلا اننا معاية عربية
التويوتا بسم الله ماشاء الله لا يعلو عليها
عرفت انا لية الخليج بيعشقوها هي واللكزس طبعا اللكزس من انتاج تويوتا قسم السيارات الفارهة

المشاركة الأصلية كتبت بواسطة Ahmod

بشكرك على التقرير لكن لي تعليق على بعض النقاط

اعتقد ان صوت الماتور كان عالي وبيدخل عندك لجوة الكبية بسبب مشكلة اما في فلتر الهوا - محتاج يتغير - !! او زيت الماتور !! - استخدام زيت مش مناسب -

لان الياريس معروفة انها صاحبة المحرك الصامت والالات الجر الصامتة !! ومش من المفروض انك تكون بتسمع اي حاجة وانت جوة العربية لدرجة اني احيانا العربية بتبقى دايرة وبدورها تاني لاني مش واخد بالي انها دايرة !!!!


دي مشكلة اما فلتر هوا او البوابة عموما عايزة تتنضف !! اخر مرة غيرت فلتر الهوا امتى !! ؟

اكيد بتلاحظ ان ال rpm بينزل عن ال 0.5 بالتالي بتحس بالاهتزاز وده غالبا بيحصل لما تبقى واقف في اشارة ودايس فرامل وانت معشق العربية على وضع ال d

بمجرد تتحل مشكلتك هتلاقي الاعراض دي راحت نهائيا لان زي ماقلتلك في النقطة الاولى ان المفروض لو الياريس حالتها تمام وانت قاعد جوة او حتى واقف برة العربية مستحيل تقدر تعرف العربية دايرة ولا مبطلة !!!!!


!!!!!! ؟؟ ارجح ان ده هو سبب المشاكل اللى طالعة عند حضرتك !! حضرتك مشيت بالعربية نحو ال 70 الاف كم بدون عمل اي صيانات !! ؟ ومع ذلك العربية ماشتكتش من حاجة وربنا يحفظهالك

وده الطبيعي من اي عربية عليها علامة تويوتا !!!

المفروض ان حضرتك تكون غيرت على الاقل فلتر الهوا مش اقل من مرتين !! والبوجيهات ودورة التبريد عموما محتاجة اكيد تنضيف

البوابة والحساسات محتاجة تتنضف / زيت الفرامل محتاج يتغير !!! والمفروض كمان 10 الاف كم كمان تغير فلتر البنزين !!!!!! ويستحسن كمان تغير معاه زيت الفتيس بما انك بتمشي بالعربية على سرعات عالية كتير

-----------

انا طبعا متفق معاكم ان العربية خفيفة وثابتها ضعيف على السرعات العالية لكن هي مش مصممة لكدة

العربية ناعمة جدا وعالية جدا عن الارض فطبيعي انها تبقى ثابتها محدود

المفروض انها عربية مدينة وبالتالي لو حضرتك حابب تزود الثبات شوية يبقى هتعرض الكاوتش وتركب طقم جنوط هيحللك المشكلة بنسبة كبيرة