الموضوع: تحذير من شراء السارة البروتون الجين 2 2013

المشاركة الأصلية كتبت بواسطة tamerosman

انا شايف ان الجين 2 بالنسبة لثمنها ...تعتبر اعلى value for money فى السوق المصرى
يعنى الى بيقول الخامات مش اوى او الفرامل او اى حاجة تانية مش عجباه .. يشوف اﻻول هو دافع كام و المبلغ الى دفعة كان ممكن يشترى ايه تانى

انا عن نفسى الثبات و قوة الصاج و الشكل الرياضى الخارجى و شكل التابلوه و الكراسى الرياضية و اداء الموتور شايف انه مستحيل حد يﻻقيه فى عربية بالسعر ده .

بالنسبة للفرامل انا شايف انها طبعا مش زى فرامل المرسيدس بس معقولة يعنى مثل افضل من النترا 2005 الى كنت راكبها 5 سنين قبلها و اقل من مازدا 3 برضه ركبتها سنة ....تقريبا اداءها متوسط بس مش سىء ابدا هى بس الدواسة واطية شوية و مش باللمس عايزة بس تكبس جامد

طب انا عايز ايه غير كدة اديكو قلته صاج قوي وثبات ملوش مثيل وشكل تحفه ٠ طبعا ماحدش يقدر يتكلم عن الكامبرو انجين الوحش بدون مبالغه ٠ انا قلت قبل كده انا كان معايا سيات ابيزا غنيه عن التعريف بس الجين تو بصراحه محسيتش باى اختلاف من حيث المشاكل العاديه اللي كانت في الابيزا او الجين٠بالعكس بقي من حيث الثبات فال الجين تو بصراحه اثبت٠

المشاركة الأصلية كتبت بواسطة dramrmostafa

تحذير ابعد تماما عن البروتون الجين 2 و البيرسونا

انا عربيتي عامله 800 كم

و اسوأ من ما تتخيل انا اتخدعت في العربية دي خدعة عمري

1 من اسوأ تقفيل السيارات اللي ممكن تشوفها لدرجة ان اي عربية تقفيل مصري احسن منها.
*ملحوظة انا رفضت استلام عربيتين عشان عيوب التقفيل دي

2سيئة جدا جدا في الفرامل انا لسه مكملتش 800 كم ولا عملت صيانة 1000 و روحت التوكيل مرتين

3 استهلاك بنزين بشع لدرجة ان العربية متوسط استهلاكها داخل المدينة 7.5 الي 8كم/ ليتر يعني 150/160 في الصفيحة

4 بتنزل فيها عيب في الزوايا و مش بيعرفوا يضبطوها

5 لما تشغل التكييف تحس ان العربية تحول صوتها الي غسالة فول اوتوماتيك من صوت مروحة التكييف.

6 حرام فيها الفلوس اللي بتدفعها في تمنها و قطع غيارها حيث انها ليست في مستوي الجودة التي تستحق هذه المبالغ.

و مفيهاش حاجة عدلة غير العفشة و الثبات بصراحة

علي فكرة يا جماعة انا ما اشتريتش العربية دي عمياني و لكن بعد دراسة شاملة من اراء الأعضاء

هذه شهادة حق عشان ماحدش يتدبس و معظم السيارات بها نفس العيوب زاد او نقص و لكن فعلا عيب الفرامل الأكثر شيوعا

انا مش عارف هاعمل ايه بس في الأغلب هعرض العريبة للبيع و ربنا يعوض عليا

اخي العزيز طبعا انت لو نفسك قفلت مالعربيه فاطبعا ربنا يعوض عليك ويرزقك احسن بس زي ما انت قلت انك مجبتش العربيه الا بعد دراسه يعني اكيد لقيتها كويسه اما بالنسبه للمشاكل اللي حضرتك ذكرتها فالبنسبه لاستهلاك البنزين فا ده يتوقف علي عوامل كتير وسواقتك برده
اما موضوع الزوايا ده مشفتش حد قال كده ان بتنزل فيها عيب ومبيتصلحش طب ازاى ما في ناس جايبنها ٢٠١٣ ومذكروش اي حاجه من دي فاعتقد مش المفروض تعمم ممكن تكون حاله فرديه عندك
التكييف بكل امانه وحياديه صوته عالي شويه اه بس عمري ماحسيت انه زي الغساله او بيرجرج العربيه٠ علي فكره اغلب التكيفات في عربيات كتير عالسرعه العاليه بهبط العربيه اما في الجين فا ماشاء اللهعال١٧٠ وبشغل التكييف وبتسحب بزياده كمان لو عايز
طبعا الصاج والعفشه والكامبرو انجين فانت قيمتهم بنفسك انهم كويسين السوال هل في حاجه اهم من التلاته دول عايزهم يكونوا كويسين
اعتذر عن الاطاله بس بكل صراحه الجين تو عربيه ممتازه بشكل عام
ملحوظه انا كنت راكب بولو الماني وابيزا سيات اسبانى قبل كدة اتمني لككل خير

اللهم صل على محمد وعلى آله وصحبه أجمعين

عليه افضل الصلاة و السلام

المشاركة الأصلية كتبت بواسطة mido_soliman

بالنسبالى انا مش حعلق الاخوة الافاضل ردوا بزيادة كمان
هوة بس انا كل اللى بطلبة منك حاجة واحدة بس لو ينفع يعنى
انا عايز اشوف العربية دى !!!!!

بجد والله عايز اشوفها ونتقابل انا وانت بعربيتى وعربيتك ونشوف اية اللى مدايقك منها
اية رايك ؟
انا فى اكتوبر
لو انت فى اى وقت رايح التوكيل او بتروح اكتوبر بجد ياريت تقابلنى
وتحياتى لك

تصدق انك أستاذ ، و الله أنا كمان حسيت انه بيبالغ بشدة ، و لا كأنه قاصد، و الله أعلم

أسمحولي هضيف تجربتي مع العربية وأنا حالياً 28 ألف كيلو
1- عيوب التقفيل:
موجودة زي أي عربية في الدنيا بس في حالتي كانت بسيطة جداً فلا ترقي لأني أقول عليها عيوب..(دا مقارنة مثلاً بالكوري اللي بقا مولع وعبارة عن موتور وصندوق صاج)

2- الفرامل:
أنا كان معايا فيرنا وطبعاطوب الأرض أشتكي من فراملها بس أنا الحمد لله كنت بعرف أتعامل معاها وأهم حاجه في أي عربية هتركبها أنك تعرف تقدر فراملها كويس بمعني تقدر العربية محتاجه مسافة قد أيه عشان تقف علي أختلاف سرعاتك.
تخيل بقا لما ركبت الجين لأول مرة حسيت أن فراملها أسوء...أه والله بس أكتشفت أن الموضوع بمنتهي البساطة مش أنها أسوء لكن الموضوع هو طول مشوار الفرامل يعني بتحتاج تدوس أكتر من عربيات تاني وفي مرحلة معينة هيشتغل معاك ال abs (دا علي أعتبار أن الفرامل أصلاً سليمة).
في حالة صاحب الموضوع ممكن يكون ماستر عجلة من العجل أو أكتر أو الماستر الرئيسي فيه مشكلة ودا ممكن يبان بالكشف علي العربية زي ما أخونا قالوا في عصام وصفا أفضل من التوكيل
الحالة التانية أنك فعلاً مقلق من موضوع طوول مشوار الفرامل...بالمناسبة لسه كنت سايق مرسيدس سي 180 فراملها علي الشعرة لدرجة أني فرملت أول مرة علي سرعة بطيئة كنت هلبس في الأزاز :) ففعلاً دا ممكن يكون سبب.
لو العربية بقا بتزحف ودا عن تجربة أحد الأعضاء ممكن جداً يكون كوتش سئ مش هتخسر حاجه روح أكشف عليه في بريدجستون وهيقولولك لو فيه حاجه...أنا عارف أنه لسه جديد بس معلش أعرف أن كان هو السبب ولا لأ عشان لو مش هو أستبعده وشوف غيره.

3- الحدفة اليمن
أتظبطت في توكيل العجوزة مع صيانة الألف مع أنهم معندهمش ظبط زوايا علي فكرة...وأحياناً بتحتاج ظبط زوايا وأحيان تاني بتحتاج تبدل العجلة اليمين شمال.

4- أستهلاك البنزين
كل اللي أقدر أقولهواك في الموضوع دا أن للأسف الموضوع دا حظوظ يعني عربيات وعربيات بس عن تجربة أن شاء الله هيتظبط معاك بعد صيانة العشرين بشكل ملحوظ

أخيراً...ربنا يعوضك خير لو كانت العربية فيها مشاكل بس أن شاء الله تتحل وأخيراً أقدر أقولك أن علي كل عيوب الجين هي أفضل عربية في فئتها بالسعر دا والكماليات دي علي الأطلاق
تحياتي

شباب بدور على جين 2 ومش هلاقى احسن منكوا. اللى يعرف عربيه للبيع مضمونه انا اكون شاكر جداا ياجماعه