تركيب تكييف فى فيات ريتمو

**mohammedaly** · 12-08-2008 12:39 PM

السلام عليكم ورحمة الله وبركاته

انا عايز استفسر يا جماعه منكم على موضوع كده

هل ينفع اركب تكييف على ريتمو 1300 و للعلم ماتورها حالته كويسه ,,, وانا شايف فى التابلوه فتحات شبه اللى بتبقى فى العربيات المكيفه وفى زراير درجات وحاجات كده بس اعتقد دى بتاعه التهوية يعنى بتدخل الهوا اللى جاى فى وش العربية والله اعلم ,,, بس عامة انا عايز اعرف الموضوع ده ينفع ولو كده يكلف كام وهل هيبقى ضرورى التابلوه يتغير ولا ايه

منتظر مساعتدكم يا جماعه والسلام عليكم ورحمة الله وبركاته

**ahmed1981** · 12-08-2008 08:33 PM

طالما الموتور 1300 CC فمينفعش
لو الموتور 1500 CC ممكن ينفع

**mohammedaly** · 13-08-2008 04:07 PM

ازاى و فى سيارات 1100 و اقل وبيركبلها تكييف

يا ريت يا جماعه لو حد يعرف حاجة عن الموضوع ده يساعدنى

**hazem_khidr** · 14-08-2008 09:27 PM

المواتير اللي حضرتك بتتكلم عليها ال 1100 و فيها تكييف دي بتبقي مواتير حديثه
انما موتور الريتمو تقنيته قديمه غير كده ال 1300 حجمه صغير
لو موتور 1500 زي ما الباشمهندس احمد قال يبقي ينفع
لانه هو هو نفس موتور الريجاتا و اعتقد مش حيبقي فيه مشاكل لو ركب.

**mrghost** · 16-08-2008 07:07 PM

انا معايا شاهين 1400 وريتمو 1300 وركبت للشاهين تكييف يعنى مش شرط يكون الموتور 1500 وبعدين الكورولا القديمه هى والصنى موتورهم 1300 بتكييف وباور يعنى حمل كبير بس شغاله عادى

**hazem_khidr** · 16-08-2008 08:48 PM

المواتير ال 1300 بتاع الكورولا و الصاني يا محمد
مصممين علي اساس ان يبقي عليهم تكييف يعني مصممه لتحمل المجهود المبذول للتكييف
غير كده تقنيتهم اعلي من مواتير الريتمو(عدد صبابات اكتر و تقنيات في فتح و غلق الصبابات و عومدان كامه ..الخ الخ)
فبالتالي قوه المواتير دي اعلي
ضيف علي كده عمر موتور الريتمو بالمقارنه بعمر موتور الكورولا حتلاقي فرق اقل شئ 10 سنين.

**mrghost** · 17-08-2008 10:05 AM

ممكن بس ياحازم الشاهين القديمه كانت 1300 و1500 كانت بتنزل بتكييف عادى وكانت شغاله تمام التمام وفيه عربيات كتير 1300 قديمه وفيها تكييف اهم حاجه حالة الموتور وممكن يسأل علشان يتأكد الاول كذا واحد بتاع تكييف وبعد كده يقرر لان التكييف غالى ب2700 جنيه
وبعدين انت يتحب ال132 ولا ايه

**mrghost** · 18-08-2008 10:05 PM

انا كنت عند بتاع التكييف النهارده وسألته علشان حضرتك وقالى يركب ليها تكييف عادى وحسب الموتور بيركبوا مقاس الكمبروسر ولو عاوز عنوان بتاع التكييف انا تحت امرك هم ناس شغلهم نضيف قوى ومنظمين فى الشغل وانا ركبته للشاهين ب2700 جنيه مش عارف الريتمو نفس الثمن ولا اقل

**mohammedaly** · 19-08-2008 05:21 PM

انا باشكركم كلكم يا جماعه على ردودكم وواضح كده ان موضوع التكييف ده مالوش لزمة ,,, بس ادى الواحد استفاد من المعلومات اللى قولتوها

وشكرا ليكم كلكم

**mohammedaly** · 19-08-2008 05:23 PM

باشا انا ما اخدتش بالى من ردك الاخير ,,, الف الف شكر ليك على اهتمامك بسوالى وانا ليا كلام معاك على الخاص ان شاء الله ,,, عايز استفسر منك على شوية حاجات لانى لقيتك عامل موضوع انك جبت ريتمو ,, ربنا يبارك لك فيها