الموضوع: تجربتي مع جهاز تتبع للسيارة

سالتهم بيبعوة 1750 الان

المشاركة الأصلية كتبت بواسطة sv065

الإسادة الأفاضل قسم byd

السلام عليكم

بناء علي طلب نجم المنتدي باسم باشا حبيب الملايين ححاول أحكي لحضراتكم تجربتي مع أجهزة التتبع

في البداية أنا إشتريت جهاز متجمع محلي في مصر بواسطة أحد المهندسين الأفاضل المتخصصين وعنده خبرة حلوة في تصميم وتركيب الأجهزة دي ومكوناته مستوردة كان بحوالي 1750 جم وكان الرقم كبير عليا شوية خصوصا إن الموضوع ده حديث علي مصر إلي حد ما ومش منتشر لكن قلت نجرب

والحقيقة الجهاز إشتغل شوية معايا وكنت معجب بيه خصوصا كان لما أديله رنه يفصل الماتور وكمان رنة يشغل الماتور يعني زي لوك وأنلوك كده بس للمحرك مش الأبواب وكان فيه لمبة مخفية في السقف تبين حالة الماتور مفصول ولا شغال

وبعدين ماعجبنيش أداءه والموقع اللي كنت باشتغل عليه منه لأنه كان مش بيجيب الموقع الفعلي يعني كان بيعمل ديلياي أو تأخير وصل لأكثر من كذا يوم يعني يجيبلي موقع السيارة من إسبوع مش مكانها الفعلي فكده يبقي الهدف الرئيسي منه مش متوفر وهو إني أقدر أحدد الموقع الفعلي في أي لحظة....

حاولت أتقبله وأتعايش معاه لكن للأسف ماعرفتش وبعد حوالي إسبوع أو 10 أيام كلمت المهندس اللي إشتريته منه فالحقيقة كان الراجل متفهم جدا وقال لي مفيش مشاكل وفكيته ورجعته والحمد لله وأخدت الفلوس كاملة والراجل الصراحة طلع محترم جدا ورفض أي مقابل لعملية الفك والتركيب رغم إني حاولت معاه كتير فربنا يبارك له لأنه من الشباب الطموحين واللي دماغهم كويسة وعندهم أفكار رائعة

نرجع لنقطة البداية تاني هي اني مازلت محتاج لحهاز تراكر كويس وموقع كويس أتتبع من خلاله العربية واتحكم فيها بدون مشاكل ومايكونش مكلف ....

بالصدفة لقيت موقع مصري عالنت عامل إعلان وكلام جامد جدا قمت اتصلت بيهم وحاولت أعرف منهم التفاصيل المهم بعد عدة مكالمات استخلصت إن الشركة متخصصة في مجال التتبع للسيارات التي تؤجر السيارات والشركات اللي عندها إسطول سيارات مثلا بمعني إنك لو صاحب شركة تاجير سيارات أو شركة عندها إسطول سيارات وعاوز تراقب تحركاتهم وتتابع سرعاتهم علي الطرق وكده الشركة دي حتكون مفيدة جدا لأن موقعهم متخصص في مراقبة عدة سيارات والتحكم فيهم في نفس الوقت

عندهم الأجهزة كانت بدء من 1900 جنيه + 100 ج تركيب وده مش مشكلة لكن المشكلة كانت إنك تشترك في الموقع بتاعهم المخصص للتحكم في الجهاز كان إشتراك سنوي 300 جنيه طبعا إذا عندك عدة أجهزة لو شركة كبيرة مش حتكون مشكلة لأن السعر كده حيدوب في المجموع لأنه برنامج واحد ولكن الإشتراك سنوي فده لقيته مش حيناسبني يعني كل سنة 300 جنيه والمسؤل بتاع الشركة اللي كنت باكلمه كان بيستغرب إني عاوز جهاز واحد لعربية واحدة وإشتراك واحد وفهمني إنه فيه خصائص كتيرة مش حتكون مفيدة أوي للإستعمال الشخصي

المهم صرفت نظر عنهم وبدأت أبحث عن شركة تانية لقيت الموضوع ده نادر ومش لاقي شركات تكون بيتبيع جهاز وعندها إشتراك في موقع لتشغيل الجهاز والتحكم فيه من النت غير شركة في طنطا ولكني استبعدت المشوار وقتها وباقي الشركات بتبيع جهاز تحكم من الموبايل فقط

وبالصدفة كان فيه صديق في الصين جابلي جهاز من هناك وركبته عند محل عادي في شارع دمشق من بتوع الكماليات وشغلته كان يرن عليا لما افتح الباب ولما اتصل بيه يبعت لي رسالة بالموقع بس كان تقريبا راكب مش مظبوط أوي فبعد حوالي شهر ونص كان الجهاز زي مايكون مش راكب أصلا يعني مكنش بيستجيب لأي حاجة وحاولت أستخدم موقع أورانج اللي عرفت إنه يهودي بعد كده علشان أحاول أتتبع السيارة لكنه كان فاشل فلغيته ...وبالتالي مكنتش باتحكم فيه غير من الموبايل بالرسايل وطبعا مكنش فيه موقع كويس أشترك فيه أعرف حالته والعربية فين وكده واللي مابقتش بتشتغل حتي بعد كده هي كمان

وخطرت علي بالي فكرة إني أشوف الشركة اللي في طنطا إذا كان ممكن يفحصوا الجهاز ويشوفوا ماله مات ليه ؟؟ وهل بيصلحوه ولا إيه ؟؟ وإذا كان ينفع أشترك في الموقع بتاعهم ولا ما ينفعش؟؟

وفعلا إتصلت بيهم وكلمت المسئول هناك أ. خالد والحقيقة هو رحب جدا بالفكرة وطلب مني أبعت له الجهاز بالبريد السريع يفحصه ويشوف ماله وإذا إشتغل تمام يعمل لي إشتراك في الموقع بتاعهم وفعلا بعتت الجهاز في البريد شركة ميدل إيست الساعة 12 نص الليل ووصل عنده طنطا تاني يوم الصبح علي طول الساعة 11 وب 13 جنيه وربع بس.

المهم بعد شوية كلمني وقاللي إن الجهاز تمام بس كان فاضي شحن لأن فيه بطارية داخلية زي الموبيل وشغله وجربه عنده يوم كامل وظبطه وعمل لي حساب علي الموقع بتاعهم وفعلا بادخل منه عليه لحد دلوقت والجهاز تمام وعلي فكرة هما بيبيعوا نفس الجهاز بالظبط عندهم علشان كده كان سهل الإشتراك في موقعهم وعندهم كمان موديل تاني فيه إمكانيات أكتر

عموما باختصار أحاول أبسط خصائص الجهاز :-
*أول حاجة ودي حتصدع الواحد لو نازل يقضي مشاوير كتيرة بالعربية هي لما باب العربية بيفتح بتتصل عليا في الحال وممكن التغلب علي الصداع عن طريق عمل رقم العربية بلاك لست علي موبايلي مؤقتا لحد مااخلص مشاويري.
*لما انا أرن علي العربية تبعت لي رسالة عالموبايل فيها موقعها بالظبط علي جوجل وسرعتها والوقت والتاريخ.
*فيه زرار sos إستغاثة يعني تحطه في مكان مستخبي في العربية وإذا ضغطت عليه تبعت رسالة إستغاثة للأرقام اللي أنا معرفهم مسبقا علي الجهاز ده في حالة إذا حد ثبتك علي الطريق لا قدر الله
*وأقدر أفصل المحرك برسالة وأرجعه تاني برسالة من موبايلي او أي موبايل تاني بس عن طريق كتابة باسورد في الحالتين
*أقدر أظبط الجهاز في عدة وظايف الصراحة ماجربتهمش هما إذا تعدت السيارة سرعة معينة تبعت لي رسالة تنبيه أو أحدد لها منطقة علي الخريطة إذا تجاوزتها تبعت لي رسالة تحذير أو إذا البطارية بتاعة العربية إتفصلت تبعت لي رسالة تحذير وبطارية الجهاز تشغله لمدة حوالي 15 ساعة وإذا العربية إتقطرت بونش تبعت رسالة تحذير وإذا إتخبطت تبعت رسالة تنبيه وبعض الخصائص اللي من هذا القبيل.
*طبعا الموقع بتاع الشركة بيديني تحكم في كل الحاجات دي بالكامل من النت ولكن فعليا بالتجربة أحيانا التحكم من النت بيكون مش فعال ربما السيرفر بيكون مشغول او النت ضعيف مش بيرسل الأمر للجهاز في العربية مش عارف بالظبط السبب لكنه مش من الجهاز ...لكن مش علي طول برضه يعني أحيانا ولذلك أقدر اقول يعني الرسايل بالموبايل أفضل علشان تضمن أي امر يتنفذ في الحال والموقع بيفيد أكتر في أنك تشوف تحركات السيارة في تاريخ سابق وبيجيب فترة كبيرة تقريبا شهر أو أكتر مش متذكر بالظبط ويجيب سرعاتها كانت كام أو تشوفها هي فين اللحظة الحالية

حاولت ألخص لكم تجربتي بالكامل وأرجو أكون ماطولتش عليكم...

خالص تحياتي

مليووووووووووون لايك

للعلم حضرتك من اسباب انى هشترى البى واى دى على فكره

كل يوم بيزيد حبى للمنتدى و للقسم ده بالذات بسبب الاعضاء المحترمين جدا و المشرفين المحترمين

ان شاء الله لما ربنا يكرمنى و اشنرى العربيه اكيد هقولك تبعتلى العنوان على الخاص

خالص احترامى

يا باشا الف شكر على الافاده الجميله دى بس ياريت عنوان الشؤكه وارقام تلفونتها وشكراااااااااا