انطباعى السريع عن الكيا ريو سيدان :)
ده انطباع اولى بعد قيادة العربية لساعتين تقريبا
يعنى موش كافى اطلاقا انك تعتمد علي التقرير ده بأى شكل
نتكلم بقى اول ما يميز الريو سيدان عن محبوبتي ار بى ( لاجل الموضوعية ) والالنترا رحابة الصالون الداخلى ، تحس ان الصانع الكورى استغل مسافات الصالون الداخلى للسيارة صح فبالرغم من ان ال3 عربيات حجم واحد لكن حسيت ان الريو سيدان اوسع واريح من الار بى داخليا ( متقوليش ازاى انا حسيت كده الصراحة )
ثانى ما يميز الريو ان الخامات الداخلية المستخدمة لتابلوه السيارة والفرش الداخلى تتفوق بجدارة عن الار بى واعتقد تتفوق ايضا عن الالنترا من حيث جودتها ، حتى زراير رفع الزجاج اجود وأحسن .
نيجي بقى لشكل العدادات وشكل التابلوة عامة الحقيقة يتفوق باكتساح عن الار بى والالنترا واهم ما يميز الريو توافر جميع الاوبش اللى ممكن تفكر فيه واللى مفكرتش فيه ،
طبعا وسائل الامان حدث ولا حرج
عزل العربية يتفوق على الار بى الصراحة لدرجة انى مسمعتش صوت المحرك وانا بشغله ( بلا مبالغة فعلا )
من الاخر عربية جودة وكفاءة وتستاهل كل قرش يندفع فيها وعربية مدينة من الطراز الاول
لكن نيجى بقى لاهم عيب من عيوبها
اهم عيب يا جماعة فى العربية واللى هيخليكم تتردوا فى قرار الشراء انها مطلعتش فى فيلم Fast
And Furious
:)
