مشكلة فى عداد بنزين الفلوانس

**mohamed110** · 26-04-2013 12:03 PM

عندى مشكلة فى الفوانس2013انى لما بفول العربية العداد الديجيتال بتاع البنزين بيكون ملخبط يعنى يكون مدينى ان البنزين الفى العربية يمشينى 700 كيلو و فجأة يبقى 600 كيلو لخبطة جامدة ايه السبب و الحل ؟

**Refaat33** · 26-04-2013 12:34 PM

أعتقد العدد بيتغير حسب نمط السواقة , يعني لو ماشي في زحمة هيديك عدد كيلو متر أقل من لو كنت ماشي في طريق سفر مثلا .

**MARTINDALE** · 26-04-2013 02:15 PM

ده بيتغير حسب نمط السواقه وحسب سرعتك .... يعني انت لو ماشي في وسط البلد هتلاقي ان استهلاك البنزين 8 كيلو لكل لتر . وطبعا هيأثر على الرقم اللي انت بتبض عليه اللي بيحسب المتبقى .
لما تكون على طريق مفتوح وماشي بسرعه 100 هتلاقي الاستهلاك اصبح 13 كيلو لكل لتر والرقم المتبقى زاد .
المهم بقى من ده كله انك تركز على حاجه اساسيه ..... هل مؤشر البنزين بعد التفويله بيطلع للاخر ؟؟ وهل بينزل مع الاستهلاك بشكل منتظم ؟؟ لان هي دي المشكله اللي في الفلونس وبيحلها التوكيل .

**hamaka** · 26-04-2013 03:16 PM

بالضبط زى مالرجالة قالوا ، العربية بتحسب متوسط لاستهلاكك بشكل منتظم ، و عدد الكيلومتر اللى باقى بيبقى على أساس المتوسط مش الاستهلاك اللحظى ، يعنى لو انت طالع من البيت و العربية مسجلة متوسطك 8 لتر لكل 100 كيلو هيقسم اللترات اللى باقية على 8 و يضرب فى 100 يطلعلك باقى قد ايه كيلومتر، لنفرض بقى انت دخلت على طريق زحمة أو فتحت تكييف ، هتلاقى الاستهلاك اللحظى نط بقى 12 أو 13 مثلاً لكل 100 كيلو بس المتوسط بيعلى بالتدريج مع مرور الوقت و المسافة فا تلاقى الكيلو متر اللى باقى نزل جامد و العكس لو مشيت فى طريق سريع المتوسط يقل فى الكيلو اللى باقى يزيد ، جرب و انت طالع من البيت تصفر متوسط استهلاك البنزين عشان لو المتوسط عالى هيحرق معاك بنزين زيادة و هتلاقى الرقم اللى باقى من الكيلو عمال يعلى معاك رغم انك المفروض بتمشى كيلوهات زيادة ، و شوف كمان زى ما قال Martindale باشا حكاية مؤشر البنزين بعد التفويله اذا كان بيطلع للاخر ولا لأ عشان سمعنا عنها فى الفلوينس بس متقلقش حتى لو موجودة بتبقى بسيطة ان شاء الله...