امس كنت بافكر اعمل موضوع عن تغيير كاوتش اللوجان الزبالة . النهارده عملت حادثة بسببه
امبارح بس كنت بافكر اعمل استطلاع على منتدانا عشان اغير الاطارات - ماركة الباروم -
الزبالة - اللى بتزحف على الارض
وكنت عايز اخد رأى الاعضاء عشان الواحد ما يضمنش الطرق - وقرأت امس عن عضو اشترى بريدجستون
ب 450 جنيه الفردة
قلت الواحد يضحى ب 1800 او 2000 جنيه احسن ما يعمل حادثة تكلفه مبلغ محترم
وفعلا اللى حسبته لاقيته بعد اقل من 24 ساعة من تفكيرى فى تغيير الكاوتش
وانا رايح الصبح الشغل النهارده الساعة 7.50 دقيقة وقبل مطب صناعى عربية بيجو كبيرة 7 راكب
احجمها كبير اكبر من البيجو الى احنا عارفينها وهدت جامد قبل المطب
طبعا العربية اللى وراها ما لحقش يهدى ولا يتنيل قام لبس فيها وكانت عربية دايو لانوس موديل اوائل الالفينات
العربية بصراحة انا بعد ما فقت من اللى حصلى الراجل كان معاه المدام - العربية بقت ساندوتش من الامام ردياتير وكبوت واكيد حاجات تانية
وانا لبست فيه بوم جامد وطبعا السبب كاوتش اللوجان الزبالة طبعا اول حاجة
حصلت وانا الحمد لله كنت رابط حزام الامان
المهم فضلت قاعد مذهول عدة ثوانى من اللى الخبطة اللى حصلت لى
نزلت سمعت صوت تششش بحسب فى حاجة اتحرقت طبعا
- بس لاقيت الردياتير اتخرم او اتكسر لأن الصدر اللى امامه مباشرة اللى ورا الشبكة دخل جامد لجوا
لدرجة ان المروحة لما اجى ادور العربية بتعمل صوت احتكاك عالى
طبعا كده مش هاقدر ادورها اطلاقا لازم بالزق او عربية انقاذ
- وطبعا وش الفانوس اليمين التكسر علامة اللوجان وقعت الكبوت من الامام فيه خبطة مع احتكاك حوالى 5 سم بالطول و 10 سم بالعرض تقريبا
-والنمر وقعت وجنب الكبوت من اليمين عمل فراغ بينه وبين جسم العربية فراغ حوالى 1 سم وا اقل
- الشبكة السوداء اللى تحت اتقطع منها اجزاء كتير
- فانوس الشبورة اليمين خرج لبره
- الاكصدام فى مكانه زى ما هو - سبحان الله
- لما جيت افتح الكبوت ما فتحش الا بالعافية عشان الخبطة
انا اتصلت بصديق يجيى يقطر ها لى بس للاسف القطرة ما دخلتش لانها منفصلة بتتدخل قلاووظ لان
مكانها اتغير يمين شوية عشات خبطة العربية
المهم هو كان رايح يرخص عربيته قلت له امشى انت ما تعطلش نفسك وانا هتصرف
المهم اتصلت بوالدى بالرغم انى ما كنتش عايز اقوله عشان ما يزعلش بس اضطريت اتصل بيه
جه ومعاه صديقه بعريية قطرت العربية من الصاج اللى اسفل العربية - انا كنت خايف لاحسن ما يستحملش ورفضت
ولكن والدى اى خسائر انا هاتحملها فطبعا سكت
وفعلا ما حصلش حاجة لان المسافة كانت جوالى 3 كم لغاية البيت
وطبعا الردياتير فضى كل الميه الخضرا اللى فيه
اللى انا اصلا ما غيرتهاش من ساعة ما اشتريت العربية
على فكرة اانا عامل 25700 كم
موديل 2012 فول اوبشن
وطبعا سالت على الردياتير فى التوكيل بدون تركيب 1381 جنيه بالتركيب 1800 جنيه
ولسه ما اعرفش صدر العربية اللى امام الردياتير هيتكلف كام انا ناوى اصلحه عند ورشة العقيد خالد -
هى اصلا ملك الحاج / على واللى شغال فيها واحد اسمه احمد هو اللى بيعمل الشغل بايده - بس شهرتها جت انها ورشة العقيد خالد
ربنا يستر السمكرة ما تتكلفش كتير
بس كل ده مصاريف الوحد مش متوقعها اطلاقا ده غير الوقت اللى الواحد هايخده فى الورشة
نصيحة الى كل مالك سيارة ماركة لوجان لو كاوتشك ماركة باروم غيره فورا - وما تستناش زيى لغاية ما تعمل حادثة
دى نصيحة لوجه الله ما تضيعش نفسك وعربيتك حتى لو هتجيبه بالقسط
اعتبر نفسك بتشترى عربيتك من جديد خاصة لو كانت زيرو
