الموضوع: بعد حيرة طويلة ,, اخيرا حجزت الاليزيه والحمد لله

الحمد لله حجزت السى اليزيه انهاردة ,, وللاسف ليس لنا حرية اختيار الالوان لأن الوكيل متعاقد على 3 الوان فقط وهما الاسود والفيانى السماوى ,, واخترت انا السماوى لانى تقريبا كنت حابه على العربية ديه

اولا: ليه انا اخترت العربية ديه بالذات وانا حتكلم عن الاسباب اللى خلتنى اختارها بس فى شكل مقارنة بينها وبين النيسان صنى الشكل الجديد لان انا خلاص كنت حختار الصنى بس تراجعت فى اللحظات الاخيرة , طبعا ده من واقع بحثى فى الفترة اللى كنت بختار فيها بدون ادنى خبرة فى الستروين , واكيد خبراء القسم يفيدونا اكتر فى الكلام ده

كنت محتار حيرة شديدة جدا بينها وبين النيسان صنى الكل القديم والجديد والكيا ريو

طبعا الكيا ريو برغم التكنولوجيا والكل والتطور انا اصلا مش بستلطف الكورى ولا بحس انى ممكن اركب عربية كورى وارتاح فيها بعد ما اتعودت على الالمانى

النيسان صنى طبعا انتشار كبير جدا فى السوق وسعر تنافسى ممتاز وامكانيات مش موجودة فى اى عربية بالفئة السعرية ديه بس للاسف برغم كل ده كل ما اروح اتفرج عليها احس انى قدام عربية صينى وخصوصا ان مكوناتها كلها هندى وصينى مادا الفتيس بس اللى يابانى وكنت خلاص ححجزها بس مكنتش مقتنع ولا حاسس انى حركب عربية جديدة او اعلى من اللى انا راكبها ده غير بقى عيوب التقفيل المصرى وضعف الصاج الرهيب

ليه بقى اخترت الاليزيه

اول حاجة التفيل الاسبانى , العربية ما شاء الله تقفيلها محترم , وده بيبان من صدر الكبوت من جوة كل حاجة مترتبة ومكانها ,, مش زى الصنى على سبيل المثال وكعبلة الاسلاك اللى فيها وربطها بالشكرتون يعنى بعدنا عن التقفيل المصرى والمكونات المصرى ( مع احترامى الكامل لبلدى , بس المشكلة ان احنا مش بنعمل الحاجة صح ومش بنعملها بضمير ) وهى متفلة فى اسبانيا , مدينة فيجو


ثانيا : الماتور 1600 سى سى 115 حصان , بفارق كبير ع ن الصنى اللى بيدى 99 حصان , وده يعنبر موتور قوى جدا بيعمل من 0 الى 100 كيلو فى 9.4 ثانية للمانيوال , وده رقم تسارع محترم جدا ,, وبرغم انى مقدرتش اوصل لتاريخ الماتور ده او معلومات كتير عنه بس يكفى ان هو هو الماتور اللى نازل فى البيجو 301

ثالثا : استهلاك بنزين معقول ومحترم جدا بالنسبة لماتور زى ده ,, ولكن يتفوق الصنى عليه بفارق بسيط لا يكاد يذكر , وطبعا ده بالنسبة للمعلومات المذكورة فى البرشور لكل شركة , وطبعا الاستهلاك على ارض الواقع هو اللى حيبين و حيفرق

رابعا : حجم العربية ممتاز و الوسع الداخلى اكتر من ممتاز سواء فى الكنبة الخلفية او الكراسى الامامية وطبعا حجم العربية متفوق على الصنى والشنطة واسعة جدا

خامسا : الشكل والمظهر الخارجى جذاب جدا وشيك اوى , ويعطيك احساس بفخامة العربية وانك راكب عربية فى فئة اعلى من فئتها

سادسا : واضح ان الصاج محمل جدا واقوى من الكورى اللى موجود دلوقتى زى اللنترا والريو واكيد اقوى من الصنى بكتير , وده بيبان فى الفديوهات على اليوتيوب , ان فعلا الكبوت تقيل وبيحتاج دفعة قوية لاعلى لفتحه ,, واهم حاجة انك بتقفله وانت مطمن ,, مش خايف احس يطبق وانت بتقفله


سابعا : الخامات الداخلية فعلا جيدة ,, وباين فيها انها عربية اوربى ,, والطابلوه فخم جدا وخاصة فئة الاكسيكلوسيف ,,

ثامنا : السعر طبعا اقل من الكيا ريو بفارق كبير ومقارب للصنى


واخيرا
مش قلقان خالص من قطع الغيار وان شاء الله حتكون متوفرة والعربية حتاخد حقها

ولكن قلقان فقط من التوكيل لانى حسيت بتكاسل وتباطؤ فظيع من الناس اللى شغالة فيه ,, ومعندهومش اى معلومات عن العربية اللى هما المفوض وكيلها ومش عارفين اذا كان فيها ايمبوليزر ولا لا

احتمال السعر يزيد ويارب ما يزيد

تقريبا اول دفعة وصلت الميناء وحاليا بتتخلص جماركها وخلال اسبوعين او اقل الناس حتبدأ تستلم


وياريت كل واحد برده حجز يقولنا هو اختار ليه الاليزيه ,, ومعاد استلامه امتى


وعايز فى النهاية اعتزر لكل ملاك الصنى لو فيهم حد حيزعل من كلامى ,, بس بجد بشوف العربية متستاهلش وحرام الفلوس اللى بتتدفع فيها وانها لا تنتسب لشركة نيسان اطلاقا