الموضوع: حجزت خلاص Sx4 والحمد لله

السلام عليكم ورحمة الله

انا حبيت اشارك الاخوة الافاضل فى المنتدى الرائع ده فرحتى ويارب يتمها على خير

انا خلاص حجزت Sx4 وهاستلم ان شاء الله آخر الاسبوع

انا كنت عايزة الاول اجيب جين2 وكنت مترددة جدا وسالت الاخوة فى منتدى بروتن وشكروا فيها وانا كانت عجبانى بس اعتراضى عليها كان على الصالون بتاعها انا شايفة انه فقير شوية واماكن الزراير بتاعة الشبابيك مش صح بصراحة المفروض يكون فى الابواب لان ده بيكون اسهل التحكم بيه اثناء القيادة لانى كان عندى تجربة قبل كده فى عربية مماثلة وكنت لازم ابص عشان افتح او اقفل الشباك وكمان عدم وجود اى شى فى بابها من الداخل مخلى شكل الباب فقير جدا خصوصا ان مسند الباب رفيع قوى زى مايكونوا عاملينه عشان تمسك الباب وتقفله بيه وخلاص وطبعا ده مش تمام

المهم انا كنت اول مرة اشوف Sx4 كانت راكنة فى الجراج اللى باركن فيه وكان السايس عارف انى هابيع عربيتى وانى هاكبرها فقالى ماتاخدى دى ايه رايك فانا كنت لسه مااعرفش عنها شئ فقربت منها ولما شوفت حجمها وشوفت فخامتها وكمان سوزوكى اسم مش شوية قولتله ايه يا عم هو انا معايا فلوس لعربية زى دى وسيبته ومشيت ولما دخلت القسم ده ولقيتكوا بتتكلموا عليها وبتقولوا سعرها 107 ماصدقتش
المهم فضلت اقرا عنها فى النت فترة وعرفت عنها كل شئ ولما كلمت التوكيل قالولى مفيش منها الدفعة اللى نزلت خلصت والدفعة اللى جاية قدامك عشان تستلمى شهر ونص وانا ماقدرش استنى المهم ربنا وفقنى وكلمت طارق اسماعيل فى اسكندرية وقالى عندوا اتنين فرحت قوى وحجزت النبيتى واللى عنده دلوقتى سودة للى عايزها العربية ماشاء الله من اللى قريته عنها عربية ممتازة وعلى فكرة اللى شجعنى كمان اجيبها ان توكيلها هنا فى اسكندرية ممتاز لان والدى معاه صنى واتعامل معاهم كتير وهم فعلا ناس محترمين جدا وعلى كفاءة وخبرة عالية يعنى الحمد لله انا حاسة انى ربنا وفقنى للاختيار الصحيح ويارب تكون العربية كويسة زى ما قريت عنها

وعلى فكرة العربية اللى تحت فى الجراج صاحبتها جايباها من اربع شهور وانا اتكلمت معاها وهى بتشكر فيها جدا

وان شاء الله لما استلم واجربها هاقولكوا ايه اخبارها باستمرار