الموضوع: ما هى احسن طريقة للفصال مع البائع بدون استفزاز

من الاخر ده طبع كل المصرين لو مفيش فصال واشترى يقول اضحك عليا ولو فاصل ونزل حاجة يبقا مبسوط حتى لو غليا الطبع غلاب ههههههههههههه

المشاركة الأصلية كتبت بواسطة welsherif

دايما مشترى المستعمل بيواجة موقف ان عندما يجد العربية المناسبة اللى بيدور عليها فى السوق و يكون البائع ليس ذو خبرة (منزلى) و من متصفحى الانترنت فغالبا بيطلب سعر مغالى جدا غير واقعى و غالبا ده عند بداية عرض العربية للبيع وعند مواجهة البائع بالسعر المتداول او الواقعى للتنفيذ يستفز و يرفض العرض بالرغم انه حيضر للنزول بالسعر بعد عدة محاولات لكن سيكون البيع تم مع شخص اخر .
فما هى افضل طريقة لاقناع هذا البائع بالسعر المراد عند بداية عرض السيارة فى السوق بدون الدخول الى طريق مسدود؟

يا باشا أنت جيت على الجرح

أنا اليومين دول عايز أغير عربيتي و بدور على عربية مستعملة لحد دلوقتي حصل معايا الموقف ده مرتين خلال شهرين

المشكلة أن البايع بيبقى حاسس أنك بتخدعه و بتفطس سعر العربية

و فعلا العربيتين اتباعو لناس تانية بالسعر اللي أنا كنت بتكلم فيه من الأول (سبحان الله)

بس أرجع و أقولك أن ده في الأول و في الأخر نصيب

الحمدلله أنا بعرف أتكلم و أتحاور كويس و بهدوء بس ده مش نافع

بجد نفسي أعرف ايه الطريقة دي يا ريت لو حد عنده رأي أو اقتراح أو خبرة يشاركنا

المشاركة الأصلية كتبت بواسطة muhmado_furp

انا شايف ان من البداية طالما السعر مبالغ فيه
يبقي بلاش منها

و الله كلام معقول

المشاركة الأصلية كتبت بواسطة muhmado_furp

انا اروح اشتري مع المعقول او غالي سنه مع الفصال تبقي معقوله

أصحاب العربيات اللي بيتكلمو من الأول في السعر المعقول أو (الغالي سنة) قليلين

بطبيعة الحال الناس معندهاش خبرة في بيع العربيات
و كمان الناس معتقدة أن علو سعر الدولار رفع سعر العربيات المستعمله الى أرقام فلكية

عشان كده اللي بيبيع غالبا بيطلب سعر مبالغ فيه في الأول و لما العربية تقعد فترة ما حدش عايز يشتريها
ينزل سعر العربية شوية و تقعد فترة تاني يروح منزل السعر شوية تاني و هكذا.......
و لما يزهق و يضطر يبيع بالسعر المعقول

يصطاده تاجر من اللي قاعدين ما وراهمش حاجة غير اصطياد العربيات و الزباين ( رزقهم بردو )

المشاركة الأصلية كتبت بواسطة emad_2020

من الاخر ده طبع كل المصرين لو مفيش فصال واشترى يقول اضحك عليا ولو فاصل ونزل حاجة يبقا مبسوط حتى لو غليا الطبع غلاب ههههههههههههه

هههههههههههه
ده فعلا طبع المصريين مفيش كلام

المشاركة الأصلية كتبت بواسطة mohab.nabil

ممكن العربية تبقى تستحق انها تبقى اغلى من السوق ، لأن العربيات الاستعمال المنزلى بتبقى افضل كتير كحالة و استهلاك من السوق فطبيعى ان صاحبها يطلب فيها سعر اغلى من سعر التجار لأن التاجر دايما بيبقى معاه عربيات تعبانة و عايز يكسب فيها فيشترى العربيات التعبانة و يشدها شوية و يبيعها بسعر كويس عشان الناس تشترى

يا أستاذ مهاب كلامك مضبوط
فعلا في عربيات استعمال منزلي و حالتها بتبقى تحفة
يعني مثلا فبريكة بره و جوه و كيلومتر قليل و صيانة توكيل و مش محتاجة مصاريف نهائي

و تستحق أنها تبقى أغلى من الطبيعي بتاع السوق
الفكرة كلها أغلى أد ايه

يعني مثلا عربية متوسط سعرها في السوق تعمل من 95 ألف (حالة جيدة) الى 100 ألف (حالة ممتازة) مثلا
و العربية دي فبريكة بره و جوه و كيلومتر قليل و صيانة توكيل و مش محتاجة مصاريف نهائي
تبقى أغلى 2 أو 3 يعني تبقى ب 102 أو 103 أو تبقى عربية ماحصلتش و تبقى ب 105مثلا
لكن عمرها ما تبقى ب 110 و لا حتى ب 106

و لا ايه رأيك يا أستاذ مهاب؟

المشاركة الأصلية كتبت بواسطة mohab.nabil

كل واحد اكيد بيبقى عارف قيمة عربيته ايه ، الاعلانات مالية الدنيا و مبقاش فيه حاجة مستخبية

با أستاذ مهاب أنا متفق معاك في أن كل واحد عارف قيمة عربيته
بس عارف قيمة عربيته بالنسبة لنفسه مش بالنسبة للسوق

و وقت البيع المهم قيمة العربية دي و سعرها بالنسبة للسوق و المشتري
و دي قيمة العربية اللي غالبا معظم الناس ما يعرفهاش

و بالنسبة للاعلانات هي فعلا مالية الدنيا و على عينك يا تاجر زي ما بيقولو
و عندك مواقع كتير زي كونتاكت كارز و دوبيزول و هتلاقي

في المواقع دي معظم الناس بتطلب سعر بناء على أسعار العربيات التانية المعروضة (اللي أصلا سعرها مش واقعي)
الناس مش بتطلب السعر بناء على القيمة السوقية الحقيقية للعربية (طبيعي لأنهم فعلا ما يعرفوش)
و ده اللي بيخلي العربات دي ما تتباعش لفترات طويلة لحد ما صاحبها يعرف قيمتها بالنسبة للسوق

طولت في الكلام معلش بس في الأخر يهمني جدا رأيك با أستاذ مهاب