بسم الله الرحمن الرحيم
حابيب انقل تجربتي البسيطه في صيانة ال 1000 لعربيتي الجديده - ولله الحمد - الاي اكس 35 في فرع غبور العبور ,,,,للاستفاده ونقل الخبرات ورغم اني عضو جديد معاكوا الا اني استفدت كتيييير اوي من المنتدى وكان مرجع معتمد ليا في مواضيع كتير

المهم انا كنت حاجز امبارح اول معاد 8:30 لأنب بحب انجز وكنت عايز اطلع على الهياكل بعد كده عشان عندي تخبيط جامد في الشنطه.... وصلت اول واحد الحمد لله الساعه 7:50 ماكانوش لسه اشتغلوا طبعا

على 8:20 فتحوا ....اتفضل اركن وخد رقم وقابل مهندس الاستقبال ... قابلت م/ امير بولس - او لويس مش فاكر اوي بس الصراحه راجل محترم رغم اني مقدرتش اعمل غير 40% من اللي كنت عايزه

مبدئيا كده قولتله صيانة الالف و
1- السنتر مش بيقفل لوحده ,,,لو سمحت ظبت الموضوع ده لاهميته القصوى في الزمن ده
هو السنتر كده ومش بتظبط !!!!- ده كانت الاجابه
2- طب عايز ازود شوك سينسور عشان العربيه مافيهاش !!!!
لسه لحد دلوقتي معندناش حاجه اضافيه تركب لعربيتك
3- الكلاكس - وما ادراك ما كلاكس الهيونداي: قولتله انا راضي ركبلي بتاع الالنترا الكوبيه - انا كنت سمعته في المعرض وهو صوته احسن شويه من باقي الهيوندايز
قاللي يافندم انا مقدرش اغيره غير لو بايظ وكمان مش هقدر احطلك حاجه تانيه غير اخوه
طب ليه ياسيدي !!!! هي التعليمات كده !!!!!!!!!!
قولتله طب بوظ الكلاكس وغيرهولى بالكوبيه ....قاللي سورى نو واي
طب ياسيدي اومال ازاى في مراكز معتمده بتغيره وبتكتب في الضمان انه اتغير عندها ؟؟؟
الاجابه كانت معرفش
قولتله انت كده كأنك بتقوللي روح غيره بره وريح روحك قولتله طب بيني وبينك في اي خوف اني اغير بره وتحصل لا قدر الله مشكبه في الكهرباء وتطلع بره الضمان ؟؟
قاللي الصراحه انا نفسي مغير السماعات والكاسيت ومركب زينون في الالنترا وطالع بره ضمان الكهرباء
المهم قاللي ممكن الفلاشر مثلا يضرب او حاجه في العدادات وممكن مايحصلش حاجه.
قولتله افادكم الله يلا نلحق ندخل العربيه عشان فيه بتاع 5 سبقونا من كتر الرغي بتاعنا
4- اخر حاجه قولتله بس شيك على العفشه ورا عشان في تخبيط عنييييييييييييف جدا هو غالبا من الشنطه بس انت برضه اتأكد
ده بقى كانت اوكيييييه معاه

راح بص على العربيه وقاللي شيل كل اللي يخصك ويهمك ,,,, قدامها قد ايه ياهندسه ,,,ساعه ونص بالكتير

قلت كده عظيم اوي - الساعه كانت 9 - الحق اخلص واطلع على الهياكل وارجع البيت بدري
طلعت الاستراحه وضربت نسكافيه وقعدت اتفرج عالورشه والعربيات والمنظر ده كان مبهر بالنسبالي لأني اول مره ادخل صيانة غبور وكنت مفتقد الحكايه ده جدا في توكيل كيا ومن قبليها فيات

وانا قاعد بقى في الاستراحه عمال افكر في موضوع الكلاكس اللي واكل دماغي ده اعمل فيه ايه ؟؟ كلمت مركز الاقصى - مركز معتمد - عندكوا ياسيدي كلاكسات ؟ ايوه يافندم عندما هيونداي الاصلي يا سيدي انا مش عايز هيونداى عندك ايه تاني ؟؟ قاللي ميكسوا فرنساوى بكام ياسيدي ؟؟ ب 100 جندي من غير تركيب ,,,طيب تركبهولي وتكتب في الضمان انك غيرته ؟؟ قاللي طبعا ياباشا ده شئ اكيد
قلتله انا جايلك على الضهر كده ان شاء الله

على 10:15 عربيتي اختفت ولقتهم بدوا ينادوا على تسليم العربيات ....قولت خير هانت.....شويه ونزلت ابص عليها ,,,مش لقيها برضه - لعل المانع خير - بسأل المهندس قاللي طلعوا يجربوا عشان يشوفوا موضوع تخبيط الشنطه

على 11 كده ندهوا عليا ....روحت للمهندس امير قاللي كله تمام بس لازم تطلع على الهياكل عشان الشنطه....ماشي ياسيدي والكلاكس ؟؟؟؟ سليم وماقدرش اعمل فيه حاجه

روحت دفعت 350 جنيه عدا ونقدا واستلمت ولفيت اروح على الهياكل وهنا هيبتدي الفيلم !!!!!!!

ركنت قدام الباب عشان الراجل مارضاش يدخلني غير لما اقابل مهندس الاستقبال والساعه كانت11:10 بالظبط .

دخلت الصاله لقيت شابه كده قاعد على الشمال للاستقبال....المهم بقولها انا عندي تخبيط في الشنطه وعايز حد يشوفها .....قالتلى والله سوري,,,,تعالا يوم تاني من بدري عشان احنا مش بنستقبل حالات عاديه - مش حوادث - بعد 11 !!!!!!!!!!!!!!!!!!!!!!!!!!!!!!!!!!!!!!!!!!!!!!!!!

طبعا بعد الابتسامه الجميله قلبت وشي وكشرت وبقولها انا كلمت خدمة العملاء 100 مره وقلتلهم اني هحتاج الهياكل ومحدش قاللي الساعه 11 خالص !!!!!!!!!!!!!!!!!!!!!!!!!!!!!!!!!!!!!!!!!!!!!!!!!! !!!

قالتلي شوف المهندس احمد ,,لو بسيطه ممكن يرضى يعملها ,,,,روحت للمهندس احمد ودار نفس الكلام اللي دار بيني وبين الشابه بالحرف وفي الاخر قاللى تعالا نبص عالعربيه ونشوف اذا كانت بسيطه ولا ؟؟
راح معايا نبص عليها وللاسف عملي فيلم وده هطول ومش عارف ايه وايه وايه ,,,,,
قلتله حددرتك انا نش ماشي انهارده غير لما تصلحولي العربيه ,,,,الصوت مزعج جدا وانا مش هقدر اجي يوم تاني !!!!!!!!!
قاللي مقدرش اعملك حاجه,,,لو تحب تكلم المهندس عادل المدير كلمه ومش هيعملك حاجه برضه
ماشي يا سيدي فين المهندس عادل ؟؟ اتفضل .
روحت للمهندس عادل وقابلته في مكتبه وهو راجل هادئ ومحترم ومختلف عن الاتنين اللي فاتوا
ودار نفس الكلام اللي فات بالظبط بالكلمه والحرف للمره التالته على التوازي
وبرضه جه معايا يشوف العربيه وده هطول واحنا على اخرنا و... و .... و......

قولتله ده انا جاى من 7:45 وحرام امشي من غير مااخلص !!!!! وانا جايلكوا من اخر الدنيا عشان سمعتكوا بقت احسن من فرع ابو رواش

قاللي تعالا نروح للمهندس أيمن مدير الفرع ,,,ولو وافق خلاص اوك
روحنا للمهندس ايمن مدير الفرع والصراجه قمة الادب والذوق,,,,سمع القصه في كلمتني وقال طبعا اعملوها ودخلوها شكرت الراجل وخرجت بره واخيرا سلمتهم العربيه

الساعه كانت 11:50 مثلا ,,,,والله مافاتش ربع ساعه ولقيت العربيه طالعه ,,,,,ماكونتش مصدق نفسي

خلاص تمام يا برنس ؟؟؟ تمام يابشمهندس ,,,,ظبطنا القفل بس وكله تمام ,,,,,,خت العربيه وروحت طاير عالاقصى عشان الكلاكس

الجزء التاني من الرحله
روحت الاقصى وسلمت العربيه والمنظر ماكانش عاجبني اوي الصراحه ,,,وخصوصا لقيت واحد بيتخانق انهم وقعولوا المساحه وهما بيشتغلوا !!!!!!! مع واحد صاحبي كان بيشكر فيهم اوي !!!!

المهم استنيت لحد ماقابلت المهندس وقولتله هغير الكلاكس وهتكتب في الضمان انك غيرته
قاللي لا يابيه ,,,,تغيير الكلاكس هايطلعك من ضمان الكهرباء
اومال انا كلمتكوا الصبح وقولتولي ااااااااااااااه ليييييييييييييييييييييييه ؟؟؟؟؟؟؟؟؟
معلش يمكن اللي رد عليك مش فاهم اوي ,,,,وبعدين نصيحتي بلاش تغيره احسن عشان تحافظ على عربيتك وتحافظ عالضمان
قولتلته انا هسمع نصيحتك ومش هغيره وطلعلي العربيه

بس انا خلاص كانت كبرت في دماغي وهغيرك ياكلاكس يعني هغيرك....متحاولش تهرب

وروحت طالع على فرح اللي ورا المحكمه الدستوريه ,,,وقولتله توكل على الله وغير الكلاكس
الولد جه يشتغل بقى ,,,مش عارف يعمل ايه ويفك ايه ؟؟؟ اول مره يشتغل في العربيه ده
المهم فضلت واقف فوق دماغه ,,,,فك الاكصدام بالشبكه - حته واحد - وفك الكلاكس القديم وركب الجديد ولكن .....جه عند التوصيل قلتله ماتقصش الفيشه ولاتقشر في الضفيره !!!!!!!! واضح ؟؟؟

اومال اعمل ايه يابيه ؟؟؟ قولتله تشوفلي طريقه توصل بيها توصيلاتك في الفيشه الاصليه باي شكل كان قاللي هيتهز يا بيه وهايعلق منك ,,,,قولتله اتصرف شوف فيشه عندك تركب في الاصليه وتوصل من خلالها,,,,قاللي طب ثواني,,,,,قلب المحل لحد ما لقى فيشه تركب في فيشة العربيه الاصليه وبكده مالعبنااااش في الضفييييره نهائيا

والمفروض التوكيل مالوش عندي حاجه كده

اخر حاجه بقى اقوللوكوا عليها اني ركبت الميكسو الفرنساوي ب 120 جندي

هذا وبالله التوفيق .....اخوكم أحمد (مهندس معماري )

: