السلام عليكم ورحمة الله
انا ملاحظ ان عدد الاعضاء الاسكندرانية لملاك SEAT بسم الله ماشاء الله زاد وقرب يبقى اكتر من عدد الاعضاء اللى من القاهرة وباقى المحافظات
طيب ازاى نبقى فى مدينة واحدة ومساحتها مش كبيرة مقارنة بالقاهرة ومنعرفش حتى شكل عربيات بعض!!!!!!
يعنى مثلا من يومين كان فيه عضو من قسم VW شاف عربيتى ومكنش يعرف انها بتاعتى وحصل مكالمة بينى وبينه فى التليفون عشان كان عنده مشكلة فى عربيته وبيقولى هى عربيتك لونها ايه؟؟ قولتلوا اسود!! قاللى فىها جنط سيات 16 وكنت ماشى بيها من اسبوعين ناحية طريق الرأس السوداء؟؟ وفعلا طلع انا
واكيد انا ممكن اكون شوفت عربية حد منكم على البحر ومعرفش انها بتاعت حد معانا وجايز كمان اكون شديت معاه خصوصا انى اليومين دوول بشوف ابيزا كتيييير
انا حابب اننا نتعرف على بعض ونعمل تيم اسكندرانى حلو ونتعرف على مشاكل عربيات بعض عشان يبقى عندنا خبرة فى التشخيص ومين الميكانيكية الكويسين ولو حد لا قدر الله عطل فى حتة ومحتاج حد يساعده
انا حضرت قبل كده مقابلة للقسم فى 6 أكتوبر القاهرة وكانت تجربة جميلة جداااا واستفدت منها كتير واتعرفت على ناس محترمة جدا وده لينك المقابلة تقرير مقابلة قسم سيات مارس 2013
انا بقترح تكون المقابلة فى منطقة واسعة وفيها اضاءة كويسة وكافيه لو حابين اننا نقعد شوية وتكون فى نص البلد عشان تبقى قريبة لكل الناس زى مثلا عند عصير مكة سموحة او عمارات ظباط مصطفى كامل عشان يبقى فيه مكان واسع نركن فيه
ياريت كل واحد يدخل يقولنا على اقتراحه واليوم اللى يناسبه
سلام
المفضلات