المطبات في التراث الشعبي والثقافة المصرية !

**zalpany2000** · 04-05-2013 06:04 PM

ثقافة المطب

اثار هذا الموضوع لدي ال3 مطبات المباركة اللي اتحطت في ظروف غامضة علي كورنيش المعادي ، واللي اتشالت برضو في ظروف غامضة !!!

فرملة .... صرير عجلات ... ثم "دب" *صوت رزعة* او الخطوتين الاولي والتانية ثم "كراش" *صوت تحطيم*... صوت مألوف جدا جدا في مصر ... بغض النظر عن ملاهي السبتية ولعبة twisted ....l ....l اللي بنلعبها كل يوم علي الطرق المصرية اللطيفة والمسلية ... الا انه يبقي المطب اكتر ظواهر السواقة المصرية انتشارا وتأثيرا في حياة قائد السيارة اللي ربنا ابتلاه بالسواقة في شوارع المحروسة.

والمطب مفترض انه شئ منخفض للأسفل ... الا اننا علشان شعب افتكاسات بنسمي البتاعة المبلبزة من الطريق دي مطب ... ماشي مايضرش ... ويمكن تعريف المطب علي انه شئ استغفر الله العظيم بيتعمل كنوع من الاحتفال برصف طريق جديد ... بيقوم بعمله مجموعة من المتبرعين اللي فاتحين محلات او عندهم بيوت بتبص علي الطريق المرصوف جديد ده ... لحد النهاردة انا مش واثق من الغاية من ورا عمل المطب .... الا انه نادرا ما لا تصاحب فكرة عمل المطبات أفكار سودوية لا تخلو من السباب واللعن لكل اللي بيركبوا العربيات ... وتصاحبها في العادة حالة من الحزق والعصبية ويبقي نهار اهلك اسود لو وقفت تتكلم مع اللي بيعملوا المطب لو صادف حظك الهباب انك بتشهد هذا الحدث المهيب المهبب.

للمطب في الموروث الشعبي مواصفات خاصة لا تمت بأي صلة للمواصفات الامن والسلامة العالمية

1- لازم يكون في حتة متدارية ومحطوط في طريق سريع
2- لازم يكون في حتة عتمة تماما ولو لا سمح الله فيه عامود نور جنبه مافيش مانع الولا حكشة ينشلك اللمبه بالنبلة امعانا في التمويه
3- لازم يكون غبي ... رادع لأي حقير تسول له نفسه انه يعدي عليه بسرعة تتجاوز .0000000000001. كيلو متر في الساعة
4- لازم بأي حال من الاحوال ارتفاعة يتمكن من انه يلمس علبة الشكمان ويا حبذا لو يوقعهولك او يحكلك شاسيه العربية ايا كان موديل عربيتك ،، وانسي تماما افتكاسة انك تاخد المطب بالورب علي الاربع عجلات ... هايجيبك هايجيبك
5- لازم يكون متصمم بحيث انك لو عديت علي الطريق ده يوميا تغير مساعدين عربيتك بمعدل مرة كل 3 شهور مثلا انا بقيت شاكك ان الناس دي قاسمة مع koni و Monroe و غيرهم من شركات انتاج المساعدين ...
6- لازم تشعر تشعر بالمطب ... يعني تشوف نجوم السما وانت فوقه ... وتحس انك هاتخد غطس في الاسفلت وانت نازل من عليه
7- في بعض الاحيان المفتكسة بيكون عرض المطب لا يتجاوز ال5 سنتيمتر مع ارتفاع لا يقل عن 15 سنتيمتر بزوايا حاده وده بيمثل تحدي في حد ذاته واختبار لا يجتازه الا السائق المصري المخضرم واللي فاهم كويس ان الرزع ده شئ عادي
8- المطب علشان يفتتح لازم تتدشدش فيه بتاع 15 - 19 عربية في بداية افتتتاحه وتدشينه
9- يحظر حظرا باتا استخدام اي اشارات سابقة للمطب او استخدام اي طلاء عاكس او بوية معفنة لتمييزه
10 غالبا ما ينتظر السكان والمواطنين بجوار المطب وفي بعض الاحيان تزدهر تجارة قصب السكر وبعض التسالي علي هذه المطبات لخدمة المواطنين اللي جايين يضحكوا علي اللي بيلبسوا المطب وعادة ما تسمع عبارات تشجيعية من المواطنين زي (اديلوا ... البس ... هههههههه .... اشرب يا فالح) كنوع من الشماتة في السائقين الوحشين

والمطب في الموروث الشعبي والثقافة الشعبية المصرية علامة علي السطوة وفرض السيطرة ... يعني لو انت عندك محل او عندك بيت علي طريق ومن عيلة كبيرة وعندك عزوة وأهل وما عملتش مطب فيما يبدوا انها بتبقي شتيمة للعيلة ... وقد يكون المطب ده نوع من انواع الدعايا علي اساس انك لو بتعديه وانت سايق هاتتسلي وتبص يمينك وشمالك علي بترينة المحل وممكن تركن وتنزل تشتري ... او تتجوز(قد يستخدم المطب للتعريف بالعرايس اللي ممكن يبقوا قاعدين في الشباك اللي بيطل علي المطب ) :D

وفي بعض الاحيان تلجأ الحكومة لمثل هذا الحل في بعض الطرق مراعاة لعبور المشاه ... مطبات الحكومة احلي بقي ... ماتخفش مش هاتترزع فيها ... وكمان بتبقي في حتة منورة -بس مش بعيد ولاد الحلال يبعتواحكشة يعتمهالك كنوع من المفاجأة- وفي الغالب ليها سبب وجيه ... زي مثلا انهم شايفين ان الزحمة في طريق ما قلت شوية ... فعايزين يزودوها ... او صعبان عليهم انك بتروح بدري فعايزينك في الشارع علشان ما تروحش وتشغل التكييف والكهربا ... او انهم بيشجعوا العيال السريحة علشان يبيعوا علي المطبات ... وفي بعض الاحيان القليلة للغاية ... بيكون المطب قبل منطقة عبور مشاه او في تقاطع مهم ...

يا خلق هو ... والله دي فلوس غلابة ... والمطب مش بيحميك ولا بيحمي اللي بيعدي ... لو اللي جاي علي سرعة أكل المطب هاتبقي مصيبة هايتقلب وهايموتك انت واللي بتحميه ... غير انك هاتعطل طريق الناس ...وهاتوقف حالك وحالهم

يا حكومة .... حتي لو سبب المطب حميد ... ده استسهال ... دول العالم اخترعت اشارات ... وأنفاق او كباري عبور مشاه من القرن ال 19 وانتوا لسه بتحطوا مطبات !!! ... فكر جديد لوجه الله

تابعوني علي مدونة الخرابة

الخرابة

**magic girl** · 06-05-2013 04:43 PM

شارعنا طوله 350 متر فيه 6 مطبات.. ولااااا أي إندهاش d: و اليوم اللي بيبقى معايا ناس في العربية و بعدي يا العربية بتحك في المطب يا بنزلهم يمشوا للبيت d:

**zalpany2000** · 06-05-2013 05:55 PM

اول مرة اروح جامعة كفر الشيخ ... كنت رايح ادي محاضرة وكان فيه عربية واخدانا موديانا هناك ... وبدون مبالغة كان الطريق من قبل طنطا لحد الجامعة (المفروض انه طريق سريع) بمعدل كل 10 متر مطب من نوع السيف ده ... والراجل السواق كان معاه لانسر شارك ما كملتش 10000 كيلو ... كان هاين عليه يعيط

**youssef_u** · 06-05-2013 06:03 PM

امبارح كنا ٥ شباب في العربية بسم الله ما شاء الله واقل واحد وزنه ٧٠ كيلو ... لبست شوية حفر على شوية مطبات والله رجعت البيت الحراره للنص ( دايما في الصيف و عالطريق السريع و مشغل تكييف بيبقا للربع بس ) و ريحة شياط مصدرها مجهول ممكن تيل الفرامل او الكاوتش ،،، ركنتها وقلت لبابا العربية بتولع :)

**S O P H O S** · 10-05-2013 06:25 AM

احنا عندنا مطبات وفيها شارع

**rahmanboud** · 10-05-2013 03:23 PM

يا جماعة بلاش إفترى المطبات إتعملت علشان تجبرك تهدى كل شويه غصب عنك كى تشاهد جمال الطبيعه بالشوارع المصريه من إضاءة موزعه بطريقه هندسيه على الطريق ولافتات الإرشاد الإليكترونيه وإرشارات المرور المزوده بالكاميرات الحديثه وما شابه ذلك يعنى من الآخر تشجيع للسياحة بطريقه جديده

**blazer** · 10-05-2013 04:05 PM

الى بيسافر على الطرق الزراعيه بيعرف يعنى ايه المطب يستخبى ويطلعلك فى الضلمه :d
فعلا تحب ان المطب معمول ليه تمويه عشان تلبسه
فى شارعنا الى طول لا يتجاوز ال 400 متر فيه 6 مطبات دا غير الحفر الى فى الشارع
وكل واحد فايض عنده حبه اسمنت يعمله مطب بى
دا غير طبعا الحديد الى محطوط فى الشارع عشان الناس تحجز بيه بعربياتها و سبب ازمه فى الركنة