الموضوع: اسواء 60 سياره دخلت مصر

وجهه نظري ان نسبه كبيره لفشل اي عربيه راجع للتوكيل او المستورد ليها في مصر بالاضافه الي عوامل تانيه زي الجمارك طبعا و غياب الرقابه.
بالنسبه للتوكيل لو كان دون المستوي فهو مش هيهتم بالمواصفات و هيستورد ارخص و اقل حاجه من بره زي ما بيحصل و ما بيهتمش بالدعاية و لا بتوفير قطع الغيار و لا بتدريب الفنيين حتي و لا استيراد معدات الصيانه اللازمه .

بالنسبه بقي للجمارك فطبعا بسبب الزيادات المبالغ فيها علي الجمارك و الرسوم المختلفه للتجديد و اعتبار اي حاجه في العربيه كماليات لعبت دور كبير في ان المستورد يدور علي ارخص حاجه او يجيب العربيه فاضيه من بره و هو يحطلها كماليات من هنا و من كتر الحاجات اللي بتتشال من العربيه بنلاقي نفسنا راكبين في الاخر موديلات فريده من نوعها مواصفاتها مختلفه تماما و اقل عن اي حته تانيه في العالم وعلشان نبقي متخيلين الوضع قد ايه سيء بقينا بنتكلم عن موتور مختلف زي مثلا العربيه بره بتنزل موتور ٢٠٠٠ سي سي او اكتر في حين ان عندنا هما ال ١٦٠٠ سي سي ده اخرها مع ان سعرها أغلي بكتير من بره

بالنسبه لغياب الرقابه دي طبعا أدت الي ان الاسعار زادت بطريقه وهميه و العيوب اللي بتظهر كمان زادت و بقينا سوق كبير لكل ما هو رخيص أما بالنسبه للسيارات الغاليه بقي سعرها مبالغ فيه جدا بالاضافه طبعا لان حل المشاكل اللي بتظهر بقي قليل جدا لان اللي بيشتري يعتبر ادبس في العربيه و يتحمل بقي

طبعا كل ده الي ان المستهلك اصبح بلا حقوق و لو نظرنا للموديلات الناجحة و المنتشره هنلاقي دور الوكيل واضح جدا في تسويق السياره و نجاح الموديل حتي لو كان فيه عيوب و مع انتشار العربيه بيبدأ الفنيين في الشغل فيها لحد ما يحلوا المشاكل و تصبح سعرها و اعتماديتها كويسين و العكس صحيح لو نظرنا للماضي و الحاضر ممكن نشوف بسهوله توكيلات زي فيات مثلا او عز العرب عملت ايه في عربياتها

اللى عمل الفيديو ده ظلم عربيات كتير اوى
زى البيجو 404 - اولا مش هى دى النعش الطائر اللقب ده بيطلق على 504 الاستيشن بالاضافه الى ان العربيه انتاجها من 60- 75 و ماينفعشى نقيمها اصلا دلوقتى لأنه فعلا عدى عليها 38 سنه على الاقل