امتحان السواقة

**Kamal-1** · 18-08-2008 12:14 AM

السلام عليكم
أولا العضوية مستعارة من kemo0o ربنا يخليهولنا

المهم انا رايح بكرة اطلع الرخصة بس قلقان شوية عشان عندنا الامتحان زي المرسوم في الصورة

هل المسافات بتكون قليلة ولا بعيدة شوية ولا ايه النظام؟؟؟؟
المشكلة الكبيرة ان عمري ما ركبت مانيوال غير مرة او مرتين

كمان في ناس قالت لي لو سقطت هتقعد 3 شهور على بال لما تمتحن
وبعدين ايه ظروف مدرسة السواقة اللي قي المرور دي ؟ بتعمل حاجة ولا ايه بالضبط

وفي ناس قالت لي لو انت مقدم مدرسة وسقطت لا قدر الله بيقولك تعال بعد اسبوع

الكلام ده بجد ولا ايه يا جماعة

**mokhtar** · 18-08-2008 01:21 AM

ربنا ما يجيب قلق ان شاء الله هتطلعها من اول مره خد اللينك ده موضوعى عن الرخصه وانا بطلعها http://www.nilemotors.net/Nile/showt...t=20417&page=2

المهم عشان انت مابتسوقش مانيوال وانت فى الاختبار خليك على السلانسيه يعنى الدبرياج لو عربيه المرور ممكن بيبقوا معليين السلانسيه شويه تدوس دبرياج للاخر وتبدأ ترفع براحه هتلاقيها اتحركت وخليك معاه لو عايز تسرعها شويه ارفع الدبرياج للاخر ولو عايز توقفها او تبطء السرعه دوس دبرياج المهم مش هتنط منك ومش هتخنقك بس بالنسبه للمسافات اللى بين الاقماع لازم تتقدر كويس وده مش هييجى الا بالتدريب عليها عشان كده انصحك تدخل مدرسه قياده ممكن السريعه بتبقى مده قصيره ويعلمك الاختبار والاشارات والكمبيوتر وتخش على طول ..وان شاء الله تنجح على طول واى استفسار انا تحت امرك

..mokhtar..

**Kamal-1** · 18-08-2008 01:27 AM

متشكرين يا استاذنا على النصيحة الغالية

**MEDO_AHMED2** · 18-08-2008 01:31 AM

يا باشا انا رايى تدور على اى وسطة بالفلوس او بالمعرفة ويعديلك الموضوع وانت قاعد على كرسيك باشا من غير متدور عربية حتى

**Bossy_Fadl** · 18-08-2008 04:12 AM

انا عاوزة اسال سؤال

هو الواحد بياخد دور عشان امتحان السواقه؟

و لا بيروح في اي وقت؟

و كمان لو سقطت معرفش اطلعها بالفلوس بعدها علطول ؟

يعني لازم استني تلات شهور عشان برضه اطلعها بالفلوس؟

و علي فكرة يا صاحب العضوية المستعارة(اصلي مش لاقيه اسم اناديك بيه)

ههههههه

بيقولو انك تدي للسواق اللي هيركب جنبك فلوس

يعني عشرين جنيه و لا حاجة عشان يعديك

غير كده هتسقط

و الله اعلم

هما اللي بيقولو كده

بوســــــي

**hazem_khidr** · 18-08-2008 05:01 AM

بالنسبه للمسافات بتكون معقوله لكن لازم تاخد حذرك شويه و خصوصا من القمع الشمال في الصف التاني دا
اوووووف كله بيغلط فيه و هو بيرجع
.......
الاول بتطلع قدام و انت داخل قدام حضن علي القمع اليمين في الصف الاخير(نقطه نهايه الامام)
علشان لما تكسر الدركسيون ما تخبطش في الشمال
و بعدين تضبط نفسك تحضن علي القمع الشمال في الصف التاني و انت راجع
و لما القمع يبقي عند الباب عندك
اكسر الدركسيون يمين كله بكده لا حتخبط في الشمال ولا اليمين
و ترجع بالراحه اووووووووي و تضبط ضهر عربيتك بين القمعين الباقيين
و الف مبروك الرخصه:)
.........
حاول دايما تخلي صوت العربيه عالي علشان ما تبطلش منك لانها لو بطلت حتسقط لا قدر الله.
وبالتوفيق ان شاء الله و ابقي طمنا عملت ايه:)

هو الواحد بياخد دور عشان امتحان السواقه؟

و لا بيروح في اي وقت؟

و كمان لو سقطت معرفش اطلعها بالفلوس بعدها علطول ؟

يعني لازم استني تلات شهور عشان برضه اطلعها بالفلوس؟

لاء يا بوسي
انتي بتروحي تقدمي و تمتحني كمبيوتر في نفس اليوم و تمتحني سواقه برضه
ولو سقطتي بتاخدي اول مره شهر علي ما اعتقد و تاني مره شهر برضه و تالت مره تلات شهور دا النظام اللي كان متبع زمان
و بتبقي علي فكره علي حسب الضابط
يعني لو سقطتي ممكن تروحي تقوليله انا مسافره بره و محتاجاها و ممكن اجي الاسبوع الجاي مثلا
لو ضابط كويس حيوافق اما لو ضابط غلس حيعقدها.

**Bossy_Fadl** · 18-08-2008 07:26 PM

يعني عادي يا حازم اروح في اليوم اللي يعجبني و امتحن

خلاص تمام كده

ربنا يسهل

طيب قولي انا امتحن فين؟

انا ساكنه في الهرم

يبقي تبع ايه انا؟

**hazem_khidr** · 18-08-2008 07:30 PM

ايوه تروحي اي يوم
معاكي اي مؤهل دراسي
شهاده باطنه و شهاده نظر
و خدي معاكي حوالي 8 صور احتياطي
و صوره البطاقه الشخصيه
روحي قدمي عليها و حتمتحني
اعتقد انك تبع مرور فيصل لو ساكنه في الهرم

**Bossy_Fadl** · 18-08-2008 08:27 PM

تصدق كل الورق موجود و مفيش مشاكل

ما عدا موضوع المؤهل الدراسي ده

معايا شهاده نحو الامنيه تنفع؟:laugh:

ميرسي يا حازم علي مساعدتك ربنا يخليك

**hazem_khidr** · 19-08-2008 04:42 AM

تصدق كل الورق موجود و مفيش مشاكل

ما عدا موضوع المؤهل الدراسي ده

معايا شهاده نحو الامنيه تنفع؟:laugh:

ميرسي يا حازم علي مساعدتك ربنا يخليك

هههههههه
ما تفكرنيش ب (نحو الاميه ) ارجوكي
جايبين عربيه لخالي من بورسعيد
و المعوق اللي جايبنها باسمه لا بيعرف يقرأ ولا يكتب
ولازم علشان ننقل العربيه باسمنا نطلع رخصه سواقه
و علشان نطلع الرخصه بقي هو فالقني كل شويه يتصل بيا
يا استاذ حازم عملت ايه في شهاده (نحو الاميه) حتطلعها لنا ولا لاء
اوووووووووووووووووووووووف
موال منيل و مهبب و يوم اسود يوم ما جه في دماغنا نجيب العربيه دي:(