بسم الله الرحمن الرحيم
بعد الموضوع الأكثر من رائع ده قررنا انا ومجموعة من اعضاء المنتدى واصدقائى نأخذ اجازة ونستمتع بالبحر والمناظر الجميلة للشعب المرجانية والاسماك، وعليه اتفقنا من الاستاذ مصطفى لترتيب يوم للرحلة وتم الاتفاق على يوم الجمعة 24/5 وكنا 8 افراد.
فى البداية عايز اقول قد ايه حسيت من الاستاذ مصطفى من قبل ما نتقابل قد ايه هو انسان محترم وواخد الشغل جد وبيتعامل بطريقة محترفة، حسيت بده من اهتمامه بتزويدنا بالتفاصيل والاهتمام بمراجعة التعليمات السابقة للرحلة والاهم التأكيد اكثر من مرة على اهمية الوصول للشاطئ على اقصى تقدير الساعة 8 صباحا للاستمتاع بالوقت حتى الساعة 5 مساءا.
فى صباح يوم الجمعة تم التجمع والالتقاء مع الاستاذ مصطفى فى المكان المحدد للمقابلة ثم توكلنا على الله ووصلنا الشاطئ حوالى الساعة 9 وذلك بسبب تأخير مننا عن الميعاد المتفق عليه.
ارجع تانى واقول ان الاستاذ مصطفى راجل فاهم الموضوع كويس وبياخد من وقت الرحلة كتير عشان يدينا التعليمات نظرى على الشاطئ الاول ثم التطبيق العملى فى البحر ثم الرجوع للشاطئ للتعليمات النظرية للمرحلة التالية ثم التطبيق فى المياه وهكذا حتى مرحلة الغطس الحر.
ناس تانية كتير مش بتدى التدريب كل الوقت ده ومش بتدى لأعضاء الرحلة كل الاهتمام ده.
فى البداية تم تدريبنا على استعمال النظارات وقصبات الهواء وكيفية التنفس وعايز اقولكم انا واحد عملت سنوركل كذا مرة قبل كده وكنت فاكر حاجة زى دى مش محتاجة شرح بس اللى شرحه لينا الاستاذ مصطفى فعلا اول مرة اسمعه وساعدنا كتير فى باقى اليوم للاستمتاع بالبحر بدون مشاكل.
ثم بعد ذلك تم توزيع الLife Jacket لكل واحد مش متمكن من السباحة ولكل اللى مش بيعرفو يعوموا خالص، ثم الدخول للمياه لأعماق اكبر من المرحلة الاولى.
ثم فى المرحلة الثالثة يتم التلقين والتدريب على الغطس الحر ويتم التدريب العملى داخل المياه والتقاط الصور الرائعة لكل اعضاء الرحلة من تحت المياه.
كل ده بنكون وصلنا للساعة 2 ونص او 3 العصر، وبنطلع للشاطئ عشان الغداء لو عاملين حسابنا على اكل او لو متفقين على الغداء مع الاستاذ مصطفى اللى بيكون معاه شواية الفحم بتاعته والعدة كااااملة (حساب الغذاء خارج تكلفة الرحلة)
وبعد الغذاء بننزل المياه مرة اخيرة لمدة ساعة او ساعة ونصف، لكن احنا كنا ناويين نتغدا فى احدى محلات السمك على الطريق وبالتالى طلبنا من الاستاذ مصطفى انهاء اليوم وكان زعلان جدا اننا ماشيين بدرى وكان حاسس انه مدناش حقنا :) ومش بس وكده كان معانا صديق مبيعرفش يعوم ففضل فى اول المياه ومدخلش معانا رغم محاولات الاستاذ مصطفى معاه، ففوجئا فى اخر اليوم انه مش عايز ياخد فلوس من صديقنا ويقولنا هو ما استمتعش باليوم وبالتالى مش حقى اخد فلوس منه!!!! مش بقولكم راجل محترم وهمه الاول راحة واستمتاع العميل مش الفلوس، طبعا صممنا انه يقبل الفلوس من صديقنا لأنه مش ذنب الاستاذ مصطفى.
الصراحة اليوم كان اكثر من رااااااااااااائع والرحلة جميلة جدا بس يعيبها ان الشاطئ بلا خدمات (صفر خدمات) وده بسبب ان القرية لم تفتتح بعد والشاطئ مقفول لكن فى المقابل شاطئ القرية دى من اجمل شواطئ السخنة ويتمتع بالشعب المرجانية اللى بتجتمع حواليها كثير من الاسماك الجميلة التى يشتهر بها البحر الاحمر، الغير متوافرة فى الكثير من المناطق الاخرى.
يبقى اللى طالع الرحلة يعمل حسابه انه طالع يستمتع بالمياه ويستحمل فقر الخدمات فى الشاطئ واضطراره للاستحمام فى احدى الكافتيريات على الطريق (يوجد كافتيريا امام الشاطئ عشان متمشيش قبل الاستحمام لكن لا انصح بها)
حاجة أخيرة عكرت صفونا وهى عطل سيارة الاستاذ مصطفى فى الصباح واضطرارنا لركنها فى بوابات الوصول قبل السخنة، ان شاء الله تكون بسيطة يا زعيم وتخلص بسرعة ويعوضك خير ان شاء الله.
شكرا أستاذ مصطفى على اليوم الرائع ده وان شاء الله نكرر التجربة مرة أخرى وانصح كل الأعضاء انهم يطلعوا يغيروا جو ويريحوا اعصابهم بمشاهدة المناظر الجميلة تحت المياه.