طبعا ماختلفناش على ان الوصف التفصيلي للحوادث و منظر الجثث المتقطعة بيبقى صادم للمشاعر و ده بيتفاوت من شخص لآخر.. يعني فيه ناس ممكن فعلا مشاعرها تتأذي من تخيل منظر زي ده و ما تنامش بالليل، و ناس تانية تتأثر بس، انما بعد كده بتنسى و تكمل يومها عادي.
بس برضه بالتأكيد احنا متفقين على ان اللي بيكتب موضوع بيوصف فيه حادثة شافها مش بيكون متعمد انه يأذي مشاعر الناس و لا انه ما ينيمهمش الليل.. كل موضوع من دول ليه مبرراته، خصوصا الموضوع بتاع نص إنسان.. و وجهة نظري في الموضوع ده انا شرحته في رد سابق لية على سبعاوي اللي كلنا بنكن ليه كل مودة و احترام :)
مش عايزين يا جماعة الموضوع ياخد أكبر من حجمه و مش عايزين نقيد نفسنا بقواعد اكتر من اللي موجودة بالفعل.. يعني صعب كمان أحكم على الناس انهم يشوفوااللي يشوفوه برة و ييجوا هنا ما يقدروش يفتحوا بقهم و لا يفضفضوا باللي جواهم.. و بعدين احنا في منتدى سيارات و الحوادث في مصر مافيش أكتر منها.. يعني بأت حاجة شبه يومية للأسف.. فصعب ان ماحدش يتكلم عن الحوادث خالص في المنتدى.
يمكن المطلوب من اللي يكتب موضوع فيه حادثة انه على أد ما يقدر ما يغرقش أوي في وصف الجثث المتقطعة و الأشلاء و الدم الخ الخ الخ. و في نفس الوقت ممكن اللي بيتأثر اوي من قراية الحوادث ما يدخلش المواضيع اللي بتحمل عنوان حادثة او ما شابه.. و برضه باكرر تاني مع عدم الإغراق في التفاصيل و الحفاظ على مشاعر الناس.
متهيألي كده ممكن نوصل لحل وسط في الموضوع ده.
المفضلات