هبيع فيكترا واشتري فيكترا ( فيكترا b للبيع )

**creative_art** · 09-05-2013 02:03 AM

السلام عليكم ورحمة الله

يمكن عنوان الموضوع يبان غريب شوية بس انا قررت ابيع الفيكترا الى معايا

متقلقوش مش عشان حاجه .. ولله الحمد عربيتي اتصرف عليها جامد ومش مخليها عايزه حاجه ..

بس الفكره ان الاصدار الى معايا .. فيكترا B1 موديل 1997 مانيوال موتور 1600 واحد كامه

ودي عربية شغل واهلاك الى اقصي الحدود وموفره فى البنزين جدا .. من الاخر سيارة اسريه

وبامانه مكدبش عليكو انا بحب الجري .. فى نفس الوقت مبحبش اهين الفيكترا الى معايا لانى عارف ان الموتور ده مش زي ال 2000 سى سى .. بس هي مش بتحطني فى مواقف حرجه ولا وقفت منى ولا مشاكل ولا دياولو .. والى هيشتري يكشف للصبح طبعا

المهم فكرت اركب ايه .. لقيت انى عشان اركب حاجه اقارنها بالفيكترا هنط فى رينج الاوكتافيات والفولكس فاجن وانا حاليا مقدرش اطلع للرينج ده

بصراحه .. لقيت مش هركب حاجه اجمل من الاوبل

انا عايز 2000 سى سى سواء توين كام او كامه واحده .. وياسلام لو فيه CDX ..

يكون كيلومتر حنين ميزدش عن 160 - 170

وحالة الموتور والفتيس طبعا انا هكشف فى التوكيل وعلى حسابي ..

ده لو فى حالة حد معاه 2000 سى سى وعايز يبدل ب 1600

ولو حد هيدفع كاش برضه مفيش اي مشكله ..

نيجي بقه لمواصفات عربيتي .. نبدأ بأسم الله

فيكترا B1 موديل 1997 موتور كامه واحده single point injection

الكيلومتر 136 الف نسبة 60% منه سفريات والكشف يوضح

شاريها من اول مالك من الزيرو .. فواتير الصيانه من الزيرو موجوده .. كاتالوجات .. دليل التوكيل .. حتي وثيقة الشراء من منصور موجوده ..

وكذلك الامر كاسيت الفابريكه وكل حاجه الفابريكه

اللون ابيض .. لا يوجد خربوش واحد .. ولسه مرشوشه نضافه .. ( الباب الشمال دخل فيه موتسيكل وصلحته بنضافه فى الحرفيين )

صالون الفابريكه حالته 200% كل حاجه فيه تعمل بكفاءه ومفيش حاجه مفككه ولا اصوات ولا غيره

فرش جلد صناعي نضيف تفصيل ( الامانه مطلوبه )

التكييف يعمل بمنتهي بكفاءه

من الاخر عربيه هتعجبك ومصروف عليها للصبح .. اه والله :(

نقط مهمه لازم اقولها عشان الامانه

1 - زي ما سبق ووضحت الباب الشمال كان فيه خبطه من موتسيكل واتصلحت

2- ال ABS لايعمل وسعره 400 جنيه بدون فصال وممكن يكون شغال ومحتاجه حساسات انا مكشفتش عليه حتي

3- محتاجه جوز فوانيس امامى ( الموجودين حاليا الاوريجنال ولونهم بقه اصفر ) .. سعرهم 350 جنيه depo

غير كده اي مصاريف فيها انا متكفل بيها ..

نيجي للصور .. إحم :D

اول صوره دي وانا بركبلها السقف .. ( ستيكر كاربون شكله جميل مع الابيض وممكن يتشال عادى )

وده بعد ما السقف اتركب

طبعا كله يقول ماشاء الله :)

ودي صورتها من قدام مع العلم ان الاكصدام ده انا صلحته عند بتاع فيبر وبقه كويس

ز

ونيجي للصوره الاخير من الخلف .. :D

العربيه دي لو معاها جنط دهبي BBS هيبقي خطير وملوش حل

عموما .. المعاينه على الواقع افضل .. وطبعا نسيت اقول ان المكان فى الاسكندريه ..

بس فى حالة الجديه اوى اوى .. ممكن هنزل القاهره :)

نيجي للسعر ..

مبدأيا انا ببيع عشان اركب Vectra B2 او 2000 سى سى ..

ولو حد عايز يبدل اهلا وسهلا طبعا

يعني بيع نزاهه فقط ولو محصلش توفيق من عند ربنا فا هى جميله ومش هفرط فيها ..

عموما السعر 49000 ولو باذن الله انت جاد ممكن يكون فيه تفاوض بسيط جدا جدا

وده فقط لانها محتاجه مصاريف 900 جنيه .. ABS + فوانيس

وممكن عادى متغيرهمش انا بس عشان بحب اركب حاجه نضيفه .. فى نفس الوقت فيه زنقة وقت وفلوس ومش قادر اغير الحاجات دى

وعموما انا السعر ده والله طالب فيها الى انا دفعته + الي صرفته عليها عشان تبقي بالمنظر ده لانها كانت مرفوعه حوالي 7 سنين بأمانه وبدون مبالغه وكانت فوقيها جبل تراب ومحدش بيقربلها

وممكن اى حد يفتح كونتاكت يشوف رينج الاسعار "للحاجات النضيفه " وانا راضي بالى تحكمو بيه ..

بس خليني اقول ان دى مش عربية تجار .. دي لواحد ركيب المانى ولما يركبها ويشم ريحة الفابريكا هيعرف انا بتكلم علي ايه

وياريت ياجماعه رجاء شخصي .. بلاش تجار عشان محدش يزعل مني