تعمل ايه لو لاقيت حد قافل عليك وانت راكن؟

السلام عليكم
أمبارح كنت راكن عمودي علي الرصيف ولاقيت واحد ربنا يكرمه قافل عليا وشادد فارمل اليد. وطبعا حاولت أعرف هو فين ولا أي حد يعرفه فشلت ..... ربنا أكرمني وحاولت ازحزح العربيه قدام وورا رايح جاي رايج جاي لغايه ما عرفت أخرج من جنبه ...طبعا لأن العربيين اللي جنبي ما كانوش موجودين فكان في مساحه أقدر اتحرك فيها .... ولو كانوا موجودين كنت غنيت ظلموه جنب العربيه عقبال ما البيه يشرف ....
بعد ما مشيت فكرت هو ايه أحسن تصرف في الحالة دي مع البيه اللي راكن ....
طبعا في افكار انقامية :diablo1:كتيرة زي أقفل عليه واشد فرامل اليد أنا كمان واسيب العربيه ...وبلاها مشاوير ...
أو ممكن أقول ربنا يسامحه ...واروح في حالي .....

أنا قولت آخد رأيكم في التصرف اللي ممكن كل واحد يتصرف فينا في الموقف دا اللي اكيد كلنا تعرضنا ليه ...

اللى حضرتك عملتة صح , ودة التصرف السلمى الوحيد المتاح
هو غلطان انة مش مسابش الهاند مرفوعة طبعاً

موضوع جميل نشكرك علية يا اخى لكنة مكرر
نفس الموضوع كان مفتوح من فترة وجيزة جدا هنا فى المنتدى

الحقيقة انا حصل معايا موقف مشابه بس العربية كانت قافلة عليا ومش سايبة منفس افلفص منه

وفضلت 3 ساعات واقف فى الشارع وخرجت العربية بالعافية

انا مره نفس الموقف و زقيت العربيه بعربيتي لحد ما خرجت كنت مخلص الدرس و عاوز اروح اكتوبر و مش طالبه تاخير بس كان قافل من نحيه الشنه و عند شنطته

انا مرة كنت راكن فوق الرصيف اللي قدام كووك دوور اللي في روكسي جت واحدة وقفلت عليا :elvis:

مش عارف ليه مش قادرة هي كمان تطلع فوق الرصيف قاعدت نص ساعة ازمر واغنى وادور عليها :sleeping:

وفي الاخر الاقيها قاعدة في مطعم جوة وعمالة تتفرج عليا رحت راكب عربيتي وضااااااااخ خبط عربيتها :eek_yello:

لاقتها نزلت جري وتقولي مش تحاسب قولتها انتي الغطلانة وما تكلميش وخدي عربيتك واخلعي:policeman:

وهي بكل سفالة قالتلي مش لاما اخلص اكل ابقى انزل ( المشكلة انها ست كبيرة فوق ال 50 ):ANSmile13:

لولا الناس كان زماني دايس عليها بالعربية :nuke:

انا حصلت معايا نازل من الشغل وكنت راكن فى حتة كويسة وظل وميت فل لقيت عربية لادا قافل عليا من الجانب الشمال اللى بركب منة والجانب اليمين الرصيف قعت اكثر من نص ساعة ازحزح فى عربيتة وكنت عاوز احطها فى نص الشارع بس بالعافية خرجت العربية بعد ما نزلت الهاند بريك من الباب اليمين وامامى عربية بى ام ووراى عربية تانية المهم
انا اللى خربشت البوية عندى الباب الشمالى وانا بحاول اخرج
قعدت ادعى علية لغاية لما روحت المهم لان عربيتة لادا وعاملة زى الدبشة ومش فارقة معاة فى اى حاجة

انتظر 15 و عمل اللى تقدر عليه (كلاكس و سؤال البوابين و خلافه)
اكسر الزجاج
نزل الهاند بريك
حرك العربية
اتكل على الله
اللى يسيب عربيتة صف تانى و قافل على الناس يستاهل كده
دى الطريقة اللى قررت اتبعها بعد اللى شوفته

حصلت معايا مره وكنت متاخره وعاوزه اروح بسرعه
انا قعدت احاول واعافر بمساعده ولاد الحلال اللى فى الشارع طبعا وكنت متنرفزه جدا

معايا فى العربيه ورق اللى ذى الاستيكرات ده كتبت له على ورقه حرام عليك اتقى الله وانت بتركن كنت ممكن اخبطلك عربيتك ولزقتها على الزجاج الامامى ومشيت

والحل اللى محتمل لو حصل معايا موقف بغباوه هسيب العربيه واروح البيت بتاكسى

ايوة مرة حاصل معاية بس عربية كنت متسوبيشى اتوماتك وركنة على البارك


روحت اسئل وادور كل بوابين العماير لحد لم الحمد الله وحد قالى ايوة دى بتاعة وحد هنا فى شركة السياحة

قولتو طاب جيب المفتاح وطلعت وكنت فرحان بعد الحابسة الللى كنت فية

هههههههههه

حصلت معايا قبل كدة و فى جراج كمان المهم بعد معرفت اطلع روحت مريحلة فردتين على الأرض من الأربعة. صاحبى كان عاوز نعمل الأربعة قلتلة كفاية اتنين بس....حرام برضة.

السلام عليكم

حصل معايا برضو ف روكسي و انا راكن زي البشر عمودي ع الرصيف و روحت مشوار و رجعت لقت و احد حـ....... قافل عليا صف تاني لاء و اية دا كان مسنترها باظبط يعني مالهاش حل و اية كمان عربيتو سيات تقريبا ال هي اصغر م الفيورة و ارجي ازق يا معلم ما فيش و لا ادر اهزها الاقي المحترم مديها غيار وسايبها.
- ربع ساعه ف نص ف ساعة المحترم ما جاش لما كنت ها ادغدغهالو و بعدين ربنها هداني قمت موقف شلة من خمس ولاد محترمين كدة و هيلا هوب زيح يا عم و الله كنا ست سباب و مش قدرين نزحزحها البليهة دي و الحمد لله المهمه تمت.
- طبعا انا كا نفسي اشوف وش اهلة بس لحد ما مشيت ما جاش كان معايا قلم فلوماستر تخطيط من ال ما بيتمسحش كن ها اظبطو ع الزجاج الامامي بس ربنا ما كانش رايد اني القية ف الشنطة بتاعتي اكتفيت بورقة فيها جملتين محترمين و من غير شتيمة و الله و سبتهالو ع المساحات.
-المصيبة اننا لما زقينا العربية قفلنا ع العربية ال جنبي برضو و انا ماشي لقيت الراجل بتاع العربية ال جانبي جاي و عمال يزقها برضو قولت ف نفسي معلش بقي انت ال عليك الدور.

- و الله يا جماعة انا عارف انا البلد زحمه و انا الصف التاني شر لابد منة انما تركن صف تاني و تيد الفرامل او ما تمورش العربية دا شغل غنـــــــــم (لا مؤاخذه ف الكلمة)

الموقف ده انا شفته في ابوظبي
واحد امارتي في عربيه نيسان زد 350 وواحده جت قفلت عليه بعربيه لانسر 2006 راحت يمكن خمس دقايق تشتري حاجة وراجعه بس تقريبا طولت شوية
بس اخونا ده مستناش و قعد يحفر (يفرك) في المكان ودخان طالع مغرق المكان
طلعت الست دي تصوت جري وهيا فاكره ان عربيتها مولعه من الدخان
وفي الآخر الشرطه جت بس مشوها ودي والناس هلكت على نفسها من الدحك
ووقتها عرفت ان في قانون في ابوظبي (والامارات عموما) .. لو حد قافل عليك اتصل باداره المرور (او رقم الشرطه العادي 999) واديلهم رقم العربيه ولونها ومودلها (يعني علشان يتأكدوا انك فعلا واقف وراها) وبعدها هما يتصلوا بصاحب العربيه ينزل يشيلها خلال 10 دقايق ... ان منزلش الاداره ترجع تتصل بيك بعد ال 10 دقايق دي وتبعتلك ونش يشيل العربيه ومعاه عربيه شرطه تصادر العربيه وتعمل محضر + غرامه

حاليا الاجراء المتعارف عليه ان اي شخص بيبقا قافل على احد ما ... بيعمل كارت نوعا ما كبير وواضح او صغير بلون مميز وبيحطه على التابلوه ناحيه السواق عليه اسمه ورقم الموبايل بحيث اللي انتا قافل عليه ده يتصل بيك يقولك تعالى شيل العربيه

وللاسف الاجراء ده منفعش لما جيت اجربه في مصر في الجامعه لثلاث اسباب
1- في ناس رخمه جدا ملهاش لزمه هتاخد النمره و تستلمك
2- اصلا اللي انتا قافل عليه 80% مش هيكون معاه رصيد يرن لك اصلا فما بالك يتصل بيك
3- ولو اتصل بيك هيسمعك اسماء كل الحيوانات اللي ربنا خلقها ويقولك تعالى شيل العربيه كأنك العبد اللي جاي على القايمه بتاعت الوالده... فطبعا انتا مش هتشيل حاجة حتى لو هوا شخصيا وزير

اقتباس:

---

وللاسف الاجراء ده منفعش لما جيت اجربه في مصر في الجامعه لثلاث اسباب
1- في ناس رخمه جدا ملهاش لزمه هتاخد النمره و تستلمك
2- اصلا اللي انتا قافل عليه 80% مش هيكون معاه رصيد يرن لك اصلا فما بالك يتصل بيك
3- ولو اتصل بيك هيسمعك اسماء كل الحيوانات اللي ربنا خلقها ويقولك تعالى شيل العربيه كأنك العبد اللي جاي على القايمه بتاعت الوالده... فطبعا انتا مش هتشيل حاجة حتى لو هوا شخصيا وزير

---

:D :D :D :D :D :D :D :D

ححسبن فيه مقدامشى حاجه تانية اعملها

اقتباس:

---

المشاركة الأصلية كتبت بواسطة pendodo2002

عرفت ان في قانون في ابوظبي (والامارات عموما) .. لو حد قافل عليك اتصل باداره المرور (او رقم الشرطه العادي 999) واديلهم رقم العربيه ولونها ومودلها (يعني علشان يتأكدوا انك فعلا واقف وراها) وبعدها هما يتصلوا بصاحب العربيه ينزل يشيلها خلال 10 دقايق ... ان منزلش الاداره ترجع تتصل بيك بعد ال 10 دقايق دي وتبعتلك ونش يشيل العربيه ومعاه عربيه شرطه تصادر العربيه وتعمل محضر + غرامه

---

طيب لية مطبقوش الكلام دة عندنا :)

اقتباس:

---

المشاركة الأصلية كتبت بواسطة mohamed2002

طيب لية مطبقوش الكلام دة عندنا :)

---

لاسباب كتير مينفعش :
1- محدش فينا بيسجل رقم موبايله في المرور
2- محدش في مصر بيبقا ثابت على نمره موبايل اكتر من 6 شهور (مع وجود استثناءات)
3- الجماعه بتوع شرطه المرور لسا جايبين عربيات مكلفاهم شيء وشويات ... انتا كمان عايزهم يتصلوا بالموبايل ويخلصوا الكارت اللي لسا شاحنينه ؟؟؟
4- كتير من الاحيان الشخص اللي سايق العربيه مش هوا نفسه الشخص المسجله باسمه العربيه ... ممكن يكون الابن او الاخ او سواق او غيره
5- لان ده هيصلح الحال في مصر ... ولو الحال انصلح ... بتوع شرطه المرور هيبيعوا دره مشوي عند العجوزه
6- لو فرضنا ان الخدمه دي اشتغلت هتلاقي امناء الشرطه ربنا يكرمهم هيفتحوا اقسام المرور سنترالات ويقولك الدقيقه بـ 30 قرش
7- .... اعتقد كفايه