الموضوع: مفتاح الريموت للسيتروين سي4

المشاركة الأصلية كتبت بواسطة hamaka

تمنه فى التوكيل 1200 للأسف و بياخد بتاع أسبوع عشان بيجيبه من فرنسا و لازم يكون معاك الكارت اللى عليه الرقم السرى بتاع المفتاح...مش عارف فى حد بره بيعمله ولا لأ...

شكرا ليك

شكرا لكل الشباب المحترم اللي ردوا عليا بس أعتقد المفتاح مفهوش لعب في كهربة السيارة كمان المفروض انه بالضمان يعنى لو مشتغلش يرجع الفلوس و يا دار ما دخلك شر و أكيد يخاف علي سمعته و للا ايه

لسة ما روحتش و احتمال أنزل النهاردة فريد شوقى و اتفق معاه و مفيش فلوس الا بعد نجاح الشغل و الضمان

المشاركة الأصلية كتبت بواسطة shaheenOnco

ايه الاخبار ياباشا..عملت ايه؟؟رحت التوكيل ولا لفريد شوقي؟؟

سلام عليكم
أنا روحت امبارح لفريد شوقى علي الساعة 5 مساءا و قام مخللي شاب صغير عنده اسمه بيتر يفك الكونترول يونيت اللي علي اليمين فوق فى الموتور و ده مابياخدش وقت. بعد لما فكه قام عمنا فريد مفور الكونترول و مطلع الوحدة من الغلاف المعدني و عن طؤيق كاوية كهرباء مفور حاجة زي الآي سي من البوردة و دي فى حجم الكارت السيم اللي بيركب جوة الأي فون أو أصغر. جوة البتاعة الصغيرة دي طلع منها حاجة عاملة زى حجارة الولاعة صغيرة جدا و قام حاططها جوة جهاز صغير أوي زي الميمورى كارد ريدر و قام موصلها بالكومبيوتر و بكدة هو قدر يعرف الكود بتاع المفتاح. كل ده ليه لأنى ماعنديش الكارت اللي مدون عليه الكود.
بعد كدة قام مرجع الوحة الصغيرة أوي دي للكونترول و لاحم كل حاجة و مجمع الكونترول يونيت و أخونا بيتر راح مركب الكونترول في العربية و العربية دارت و كل حاجة تمام.
بعد كدة أعطاني ريموت بتاع سيتروين عليه العلامة بتاعة سيتروين و السلاح بتاع المفتاح المعدن ده بينطوي و يفرد داخل الريموت
كده المفتاح عاوز يتخرط عند بتاع المفاتيح قام باعتني و معايا أخونا بيتر لواحد فى شارع الأوتوستراد قدام أول شارع مكرم عبيد و اسمه عز الدين طه و معايا المفتاح الأصلي العادة اللي معايا من الأول و قام عمنا طه حارط المفتاح أبو ريموت و تم تجربته بيفتح الباب و الكونتاكت لكن العربية مش بتدور, ليه لأن المفتاح لسة لم يكود بعد. طيب عمنا طه أخد كام أخد 50 جنيه.
رجعنا تاني لعمنا فريد شوقى ٌام جايب الكومبيتر بتاعه و موصله علي العربية و بعد شغل ييجي ساعة كمان تم التكويد و تشغيل الريموت بنجاح تام بدون أي شغل أو لعب في الكهربة بتاعة العربية.
بعد كدة شكرا يا عم فريد عاوز كام قاللي 600 جنيه دفعتهم زي الشاطر و بقي عندي المفتاح الريموت و بدون ريموت و رجعنا زي الأصل
الوقت اللي اتعمل فيه المفتاح حوالي 3 ساعات و عمل سوفت وير جديد للعربية لأن و هو بيكود المفتاح حصل ما يسمي safety lock للعربية و حسب كلامه لأن الكونترول بتاع العربية أعتبر ان الريموت ده مفتاح دخيل علي العربية نظرا لطول عدم الاستعمال لأنه ضايع من زمان و كنوع من السيفتي للعربية عمل لوك علي الريموت الجديد فقام عامل reset للكومبيتر بتاع العربية و قام مكود المفتاح تاني و كل شئ عاد كما كان
دي تجربتي الأولى مع عمنا فريد شوقى و هو فاهم كويس شغله بس اتم شويتين تلاتة و مقابلته جافة شوية و ده زعلني منه في الأول و كنت ناوي بعد ما يخلص اني أقله دي آخر مرة ليا معاك لكن هو فهمني انه مضغوط و مانامش من يومين و الشغل متكربس عنده في الورشة و فعلا عزرته و خلصت القصة بنجاح