كنت حاجز سوبر صالون من شهرين من اتو ايجيبت مدينة نصر
المندوب قالى أنها ب ١١٧ ألف والتسليم من شهر ونص الى شهرين
العربية كانت فى الوقت دة ب ١٢١ ألف استلام فورى عند سمير الريان
روحت بعد شهرين المندوب قالى قدامك شهر كمان !! واحتمال العربية تمنها يزيد ٣ آلاف كمان
سالتة لية يا عم الحج ؟؟
قالى اصل عليها طلب جامد إحنا اتاخرنا فى التسليم لكل الناس ولو عايز تلغى الحجز مفيش مشاكل !!!
سيبت المعرض وروحت سمير الريان قالى العربية بقت ب ١٢٤ ألف جنية استلام فورى والمصرية نفس الكلام !!!
ولقيت العربية موجودة فى كل معارض مصر وبكل الألوان !!!
رجعت لاتو ايجيبت ولغيت الحجز

لو اى حد فكر شوية صغيرين مش هيشتري عربية ١٥٠٠ سى سى ب ١٢٤ الف متجمعة فى مصر و ٤٠٪ منها منتج محلى ويسبب عربية زى النيو أكسنت ١٦٠٠ سي سي متجمعة فى كوريا او يسيب عربية زى لانسر بومة ١٦٠٠ سي سي يابانى ١٠٠٪ ب ١٣٠ ألف اول فئة أوتوماتيك
ودى عربيات لديها اسم كبير فى السوق المصرى

عربية متجمعة فى مصر يعنى إعفاء من الجمارك يعنى توفير فى مصاريف الشحن من برة يعنى أيدى عاملة رخيصة .......

انا اقدر افهم حجز ٣ شهور او ٤ شهور لما تكون العربية مستوردة وتمنها فوق ٢٠٠ ألف ...
لكن حجز ٣ شهور او ٤ شهور فى عربية متجمعة فى مصر وفى نفس الوقت موجودة فى كل المعارض وفى كل المحافظات !!!!

دة ما لوش إلا تفسير واحد ان التوكيل بيعمل كدة عشان يشغل المعارض وتبيع بأوفر برايس
وفى الحالة دى شكرًا نيسان ... شكرًا للمنتج المحلى ...